Uá. Lau sun afiñe wamá, wagía gefentiña luagu Heowá, Bungiu lan adügübalin sun katei, mafiñentiwa lidan lan sisi weyu le wein-gádürüti oura ladügei. Ka uagu? Ladüga múaranti saminaü le luma le tarufudahabei Bíbülia. Akutiha wamá bián hénpulu:

1.   Lidura kada aban lídangiñe sisi weyu. Añahein ariñagutiña wein-gádürüñein lan oura lidura kada aban lídangiñe sisi weyu le ídanbei ladügǘwa sun katei. Gama lumoun, tidan Bíbülia, gayaraati layanuhóuña lan luagu aban dan migifetimati dan le layusurún dimurei “weyu” (Génesis 2:4 TNM; Sálumu 90:4).

2.   Lirumudiri Ubóu. Añahein hádangiñe gürigia ha afiñebaña wein-gádürüñein lan oura lidura kada aban lídangiñe sisi weyu le ídanbei ladügǘwa sun katei arufudahatiña fiúrügügili lan milu irumu ásügürüti lúmagiñe ladügǘn Ubóu. Gama lumoun, kei tarufuduni Bíbülia, aniheinhali meha Ubóu, waruguma, Weyu luma sun le líbiri katei le siélubei lubaragiñe lagumeserun sisi weyu le ídanbei ladügei Bungiu sun katei ubouagu (Agumesehani 1:1). Ligíati, masigenerun wamuti, wagía gefentiña luagu Heowá, ariñahani le aubei harufudei aturiahatiña siensia barühali lan Ubóu le saragu míñunu irumu lúmagiñe ladügǘn.

 Lau sun afiñe wamá, wagía gefentiña luagu Heowá, Bungiu lan adügübalin sun katei, mamahantiwa lun akutihani le hadügübei aturiahatiña siensia. Chouru wamuti úaragua lan le tariñagubei Bíbülia luma katei burí le arufuda láalibei siensia.