Anihein san Bungiu lidan sun fulasu?
Óunabagülei le tíchugubei Bíbülia
Gayaraati larihini Bungiu sun katei luma layusuruni lubafu le ñein lumuti labusenra (Ebüréu 4:13). Íbini ítara, marufudahantu Bíbülia lídanñein lan sun fulasu luma lidan sun katei Bungiu. Arufudaharügütu aban lan sífiri ligía ani lidan lan aban fulasu leredera.
Ida liña san Bungiu? Aban sífiri Bungiu (Huan 4:24). Ligía siñá lubéi larihini ni aban gürigia (Huan 1:18). Lidan burí arufudúni le tídanbei Bíbülia, súnwandan láfuachun Bungiu lidan ligiaméme fulasu. Mariñawagúnti anihein lan lidan sun fulasu (Isaíasi 6:1, 2; Arufudúni 4:2, 3, 8).
Halía lawinwanda Bungiu? Lidan fulasu le ñein habéi sífirigu lawinwanda Bungiu, aban fulasu le menege lumuti ubóu le warihubei. Sielu laganawa (1 Urúeigu 8:30). Ayanuhatu Bíbülia luagu aban dan le ídanbei harufudagua sun ánheligu houngua ligibugiñe Heowá, a arufudati lira anihein lan aban fulasu le ñein lubéi lawinwanda (Hobu 1:6).
Anhein mámañein lubéi lidan sun fulasu Bungiu, le san lúgubu gayara lan lóunigirunina?
Anha. Lau sun lidan lan fulasu le ñein habéi sífirigu lawinwanda Bungiu, wéiriti lebereserun hau ha awinwandubaña ya ubouagu. Téniti lun lueirin áfaaguni le wadügübei lun gaganbadi wamá lun ani íderagua lumutiwa (1 Urúeigu 8:38, 39; 2 Krónikasi 16:9). Ida liña larufuduni Bungiu berese lan wau ani góunigi lániwa?
Dan le wafurieidun: Aganba lumuti Heowá wafurieidun lau lóufudagun (2 Krónikasi 18:31).
Dan le hiru wamá saragu: “Yarafati Aburemei lun lesefuruniña ha gáribei hasandirunu hanigi, ha féridi hamaalibei hemenigin” (Sálumu 34:18).
Dan le wemegeirun lubuidun adundehani: Yusu lumutu Heowá Bíbülia to Lererun lun líchugun lichú aau woun luma lun larufuduni üma le lunbei wafalaruni woun (Sálumu 32:8).
Saminaü burí charati luáguti halíañein lan Bungiu
Le hafiñerubei saragu gürigia: Anihein Bungiu lidan sun le ladügübei.
Le inarünibei: Mawinwandunti Bungiu lidan Ubóu ni lidan fulasu le ñein habéi burí waruguma (1 Urúeigu 8:27). Inarüni ariñaga tan Bíbülia abahüdagua tani waruguma “luéirigun Bungiu” ítara kei amu burí katei le ladügübei (Sálumu 19:1). Gama lumoun, úati mini lan lira winwan lan lidan sun le adüga laalibei, ítara kei mawinwandun lan aban gefeindihaditi lidan burí kuáduru le ladügübei. Ani ítara kei gayara lan wafurendeirun somu katei luagu aban efeindihati láurügü warihini kuáduru le lefeindihabei, arufuda lumuti giñe katei burí le gayaraabei warihini lídangiñe le adüga laalibei Bungiu igaburi “le marihínbei luagu”, kéiburi lubafu, lichú lau luma línsiñehabu (Rómana 1:20).
Le hafiñerubei saragu gürigia: Siñati suntigabafu lan Bungiu ni lun lasubudiruni sun katei anhein mámañein lubéi lidan sun fulasu.
Le inarünibei: Lubafu Bungiu sífiri sándubei, ligía layusurubei lidan sun le ladügübei. Seremei ubafu le, gayara lubéi lasubudiruni Bungiu sun le asuseredubei, gayara ligía ladügün furumiñeguarügü katei lidan furumiñeguarügü oura luma lidan furumiñeguarügü fulasu, memegeirunga lun ñein lan (Sálumu 139:7).
Le hafiñerubei saragu gürigia: Arufudati Sálumu 139:8 anihein lan Bungiu lidan sun fulasu, lugundun ariñagati: “Ánhana amudeira iñun sielun, abunhein ñein; ánhana ararira lábugiñoun múa, abunhein giñe ñein”.
Le inarünibei: Mama lariñaguña bérusu le anihein lan Bungiu lidan sun fulasu, lariñaguña lidan aban lubuidun igaburi gayara lan líderaguniwa Bungiu meberesenga halíañadiwa lan.
a Ariñagatu Bíbülia Heowá lan líribei Bungiu.
Háfuga hínsiñebei lan giñe le hun
ARUFUDAHANI SÚDINITI TÍDANGIÑETI LERERUN BUNGIU
Anihein san Bungiu?
Ariha humá fiu katei le arufudubalin gébuna lan lun wafiñerun luagu anihein lan Bungiu.
ÁLÜGÜDAHANI LE TÓUNABUBEI BÍBÜLIA
Ka san sífiri sándubei?
Anihein resun buiti lun tagúarun Bíbülia lun sífiri sandu “lúhabu” Bungiu”.
WAWAGU
Amuriaha humá habisidahóun
Ayanuha humá hama gefentiña luagu Heowá luagu óunabagülei le tíchugubei Bíbülia lun somu álügüdahani o lúntima hasubudirun hawagu.