Dan le layanuhóuniwa luagu Migeli —o “san Migeli”, kei tagúarun fiu relihión lun— layanuhóuña luagu Hesusu lubaragiñe luma lárigiñe liabin ubouagun. a Ariñagatu Lererun Bungiu asigeneha lan Migeli luma Satanási lárigiñebei lounwen Moisesi ani íderagua lan aban ánheli lun lederegerún aban ñunsu lúmagiñeti Bungiu lun profeta Danieli (Danieli 10:​13, 21; Húdasi 9). Ageindaguati lubeiti Migeli luagu liricha Heowá luma hama láganiñu Bungiu. Ligía gadüna lubéi lun lanügüni iri le, le mínibei “Ka ítarabei kei Bungiu?” (Danieli 12:1; Arufudúni 12:7).

 Ariha waméi ka lan uagu gayara lubéi wariñagun Hesusu lan arükánhelibei Migeli.

•   Migeli arükánhelibei (Húdasi 9). “Hábuti ánheligu” mini lubéi dimurei arükánheli ani lídanrügüñein bián bérusu láfuacha dimurei le tidan Bíbülia. Lidan bián bérusu ligía, yúsuati dimurei arükánheli lun layanuhóun luagu ábanrügü gürigia, mini lan le, lúnrügüñein lan ábanrügü ánheli laguarúa ítara. Dan le tayanuhan Bíbülia luagu Hesusu lárigiñe láguyugun, ariñagati aban lídangiñe bérusu le rarí lan siélugiñe lau “lumalali hábuti ánheligu” (1 Tesalónikana 4:16). Kei aubei lariñagei bérusu le, ítara liña lumalali Hesusu kei lumalali arükánheli. Ligíati gayara lubéi wariñagun Hesusu lan Migelibei, le arükánheli.

•   Migeli hábutibei súdaragu ha siélubaña. “Aba ñein lan aban wuribu sielu, ñein lubéi lageindagua arükánheli Migeli hau lani ánheligu luma düragón” lememe Mafia (Arufudúni 12:7). Wéiriti lubafu Migeli sielu. Ariñagatu Bíbülia ligía lan ábanbei “hádangiñe ánheligu ha íñutimabaña” ubara (Danieli 10:​13, 21; 12:1). Adügati dimurei le lun lasubudirúniwa kei “hábuti súdaragu ha siélubaña”. Ítara liña lariñaguni David Aune, aban sásaamu tidan Iseri Daradu, luagu Migeli.

   Ábanrügüñeinya iri tayusura Bíbülia lun tayanuhan luagu ánheli le gabafubei hawagu ánheligu. Ayanuhatu luagu “lachülaagun Wabureme Hesusu siélugiñe lidan watu gemeti hau lani ánheligu ha gabafubaña” (2 Tesalónikana 1:​7, 8; Matéu 16:27). Lanwoun lira, ariñagatu Bíbülia: “Múdeiti Kristu sielun, ani anihein ñun luéigiñe lóunwenren Bungiu guentó hau sun ánheligu hama sun híbiri ubafu sielu lábugiñe lubafu” (1 Féduru 3:​21, 22). Mabuidunbei hamuga lun líriduni Heowá Hesusu luma Migeli gumadanme houn ánheligu lun hásügüragun hámagua. Garichatimati lun wasaminarun layanuhóuña lan luagu ligiaméme gürigia lau iri Hesusu luma Migeli.

•   “Lídanme oura ligía ábame lachülaagun Migeli [...] ábanbei dan lánina idiheri dan ligía” (Danieli 12:1). Lidan iñeñein le ídanbei tabürüdǘwa Bíbülia furumiñe, dimurei “liñuragun” ligía ásügürawagüdübei lidan bérusu le kei “lachülaagun”, yúsuati meha dimurei le lun layanuhóuniwa luagu dasi súdiniti le lunbei ladügüni aban urúei (Danieli 11:2-4, 21). Liñuraguba Hesukrístu, le unbei laguarúa “Lererun Bungiu”, kei “Harúeite sun urúeigu” lun lagumuchun hau sun láganiñu Bungiu, góunigi láñame lubúeingu Bungiu (Arufudúni 19:11-16). Ladügübei lidan lidaani “saragu asufuriruni le úagili libe lúmagiñe lagumeserun ubóu” (Matéu 24:​21, 42).