Lidan meha binadu dan, ariñagati meha Bungiu houn ísüraelina lun híchugun diisi lídangiñe san le hagañeirubei sagü irumu lun hídehan lidan lawanserun áhuduraguni inarüniti. Ariñagatu Bíbülia: “Sagü irumu, gasu hadireirun diisi lídangiñe san lídangiñe sun ilaü le halubahan” (2 Lúrudu 14:22).

 Aban meha gumadi le lídangiñeti Lilurudun Moisesi lichugúniwa diisi lídangiñe san, lúrudu burí le líchugubei Heowá houn ísüraelina. Mama lábugiñeñanu Lilurudun Moisesi kristiánugu, ligíati, mama mosu híchugun diisi lídangiñe san (Kolosana 2:13, 14). Ligíati, gayaraati lídehan kada kristiánu lau lúmati keisi lasandiruni tidan lanigi, “mama lau magundani ni ladüga lariñawagún” lun lun líchugun, “lugundun hínsiñehabuti Bungiu lun le íchugubei lau ugundani” (2 Korintuna 9:7).

•  Le tariñagubei Bíbülia luagu lichugún diisi lídangiñe san: Binadu Daradu

•  Le tariñagubei Bíbülia luagu lichugún diisi lídangiñe san: Iseri Daradu

 Ayanuhóuati luagu lichugún diisi lídangiñe san saragu wéiyaasu lidan fánreinti tídangiñeti Bíbülia le subudiwabei kei Binadu Daradu. Lidan liibe-agei kesi, ayanuhóuati luagu lichugúniwa diisi lídangiñe san lárigiñebei lichugúniwa lúrudu burí houn ísüraelina (Lúrudu le ichugúbei lun Moisesi), lau sun lira, ayanuhatu giñe Bíbülia fiu wéiyaasu luagu lubaragiñe dan ligía.

Lubaragiñe lichugúniwa Lilurudun Moisesi

 Abürámü (Abüraámü) meha furumiñetibei gürigia le uágubei lariñawagúa ru lani lidiisin fánreinti (Agumesehani 14:18-20; Ebüréu 7:4). Genegeti ábanrügüñein lan meha wéiyaasu líchuguni Abürámü idewesei le lun lurúeite ani lufadirin Sálemü. Mariñaguntu Bíbülia ruya lani Abüraámü o lisaanigu lidiisin fánreinti.

 Hakobu le libari Abüraámü libiamanbei gürigia le uágubei lariñawagúa ru lani lidiisin fánreinti. Füramaseti meha Hakobu lun Bungiu anhein lan labinira, líchugubei lan “diisi lídangiñe san” lídangiñe sun le leresibirubei lúmagiñe lun (Agumesehani 28:20-22). Según hariñaguni fiu aturiahatiña Bíbülia, másiñati sákürifisiu lan hani animaalugu lidiisinbei fánreinti le líchugubei Hakobu. Lau sun füramase lan Hakobu líchuguni lidiisin fánreinti, mafosu lumutiña lira liduheñu lun hadügüni ligiaméme.

Lábugiñe Lilurudun Moisesi

 Aban meha buligasion houn ísüraelina lichugún diisi lídangiñe san ladüga ídehati meha lun lawanserun áhuduraguni inarüniti.

•   Yúsuati meha lidiisin fánreinti le ichugúbei lun hounigirúniwa lubúeingu Bungiu ha íchaagubaña houngua sunsuinagubei lun hídehan lidan lawanserun áhuduraguni lun ani mamúantiña meha lun hábunagun. Ligía meha asuseredubei houn lewitagu, fádirigu haganagua (1 Lúrudu 18:20, 21). Ru hamuti meha ísüraelina diisi lídangiñe san houn lewitagu ha mámabaña fádirigu, aba méhati hasagaruni lewitagu lidiisin fánreinti lídangiñe le ichugúbei houn lun híchuguni houn fádirigu (1 Lúrudu 18:26-29).

•   Genegeti giñe mosu lan meha lichugún ábanya libiaman lidiisin fánreinti sagü irumu, le meha ahuudubei dandu houn lewitagu kei houn mama lewitagu (2 Lúrudu 14:22, 23). Yusu hamuti meha ísüraelina idewesei le lidan burí hafedun espechaliti. Ani anihein meha irumu layusurún idewesei le lun híderawaguniwa gürigia ha gudemebaña (2 Lúrudu 14:28, 29; 26:12).

 Ida liña meha lasubudirúniwa átiribei lan ichugúti? Sagü irumu, díreitiña meha ísüraelina diisi lídangiñe san lídangiñe le líchugubei múa (Fádirigu 27:30). Anhein meha séinsuba lubéi híchiga kei lidiisin fánreinti, mosu meha híchugun wein lídangiñe san ligibuagun (Fádirigu 27:31). Mosu meha giñe híchugun “hádangiñe kada diisi ilügüniñaü” (Fádirigu 27:32).

 Lun meha hasubudiruni ísüraelina átiriñein lan lidiisin fánreinti hádangiñe habiñanigu ha lúnbaña híchuguniña, aba meha hadireiruni lidiisin animaalu le áfuridubei lídangiñe fárüga. Ariñagati meha lúrudu siñá lan hanúadiruniña habuidun-agei ni hariban-agei animaalugu ha lúnbaña híchuguniña, masansirun hamañame hawagu amu. Ani siñabei meha giñe hafayeiruni lidiisin fánreinti ligía lau seinsu (Fádirigu 27:32, 33). Ánheinti libiaman lidiisin fánreinti le ichugúbei lun fedu le adügǘbei sagü irumu, gayaraati meha hafayeihan lau seinsu. Íderagua lumutiña meha lira ísüraelina ha ñǘbuinbaña dísegiñe lidoun fedu (2 Lúrudu 14:25, 26).

 Ka dan híchigei ísüraelina lidiisin fánreinti? Mosu meha hadügüni sagü irumu (2 Lúrudu 14:22). Lau sun lira, madügün hamuti meha kada lisedün irumu, luéyuri meha emeraaguni irumu ligía ani malubahan hamuti meha ísüraelina hachari (Fádirigu 25:4, 5). Lidan burí kesi le, michugúnwati meha lidiisin fánreinti lidan lidaani alubahani. Lanwoun lira, sagü meha lǘrüwan luma lisisin irumu lídangiñe kada sedü irumu, afanreinha hamuti meha ísüraelina hámati hama gudemetiña luma hama lewitagu lidan libiaman lichugún lidiisin fánreinti (2 Lúrudu 14:28, 29).

 Ka meha abeichúni ibihúbei lau michugúniwa lan diisi lídangiñe san? Mayanuhanti Lilurudun Moisesi luagu ni aban abeichúni. Ru hamuti meha ísüraelina lidiisin fánreinti ladüga subudi hamani ligía lan lunbei hadügüni mama ladüga habeichúba lan. Mosu meha hariñagun ísüraelina ligibugiñe Bungiu gúnfulihaña lan luma lau híchuguni lidiisin fánreinti ani amuriaha hagía luma lun labiniruniña luagu le hadügübei (2 Lúrudu 26:12-15). Anhein meha míchugun hamá, híweruhaña meha luéi Bungiu (Malakíasi 3:8, 9).

 Aban meha san lueirin ihürügu lichugúniwa diisi lídangiñe san? Uá. Füramaseti meha Bungiu houn ísüraelina anhein lan híchigadi diisi lídangiñe san, labinirubaña lan saragu, ua ligíame hemegeirun (Malakíasi 3:10). Dan méhati le míchugun hamani, wuribati meha lidin houn. Mabinirun lumutiña meha Heowá, ani kei meha míchugun habalin le hemegeirubei fádirigu hama lewitagu houn, siñabei meha híderaguniña fádirigu hama lewitagu áhuduragua lun Heowá (Neemíasi 13:10; Malakíasi 3:7).

 Lidan lidaani Hesusu sigitiña meha gürigia íchigei lidiisin fánreinti. Lárigiñebeiti lounwen Hesusu aba memegeirúniwa lan lun lichugúniwa.

Lidan lidaaniwagu Hesusu

 Arufudati fánreinti tídangiñeti Bíbülia le subudiwabei kei Iseri Daradu dan le lan meha ya lubéi Hesusu ubouagu, sigí hamá ísüraelina íchigei lidiisin fánreinti. Subudi lumuti meha Hesusu mosu lan hadügüni. Lau sun lira, siadi lumutiña meha lábutigu relihión ladüga meha lueirin hadügüdarun hawagu gürigia lun híchuguni lidiisin fánreinti, metenirunga lun “arufudahani le wéirigutimabei lidan lilurudun Bungiu, kei burí: Richaguaü, gudemehabu luma gaganbadi” (Matéu 23:23).

Lárigiñe lounwen Hesusu

 Aba meha mámaali lan mosu lichugúniwa lidiisin fánreinti lárigiñebei lederegeruni Hesusu libagari wawagu. Adügati lounwen Hesusu lun lagumuchun lafalarún le lariñagubei Lilurudun Moisesi, laguburahóun “lidiisin fánreinti hámagiñe gürigia” laganagua (Ebüréu 7:5, 18; Éfesuna 2:13-15; Kolosana 2:13, 14).