Ida liña meha laríawagun Hesusu?
Óunabagülei le tíchugubei Bíbülia
Ibidiñewati lau ichouruni ida liña lan meha laríawagun Hesusu lugundun mariñagun tumuti Bíbülia. Arufudati le moun lumuti lan webereserun lau ida liña lan meha laríawagun. Lau sun lira, ariñagatu Bíbülia fiu katei woun le íderagubaliwa asubudirei ida liña lan meha Hesusu.
Ligaburi larihín: Huríu meha Hesusu ani másiñati galagante lani ligaburi haríawagun huríu túmagiñe lúguchu (Ebüréu 7:14). Genegeti aban lan meha laríawagun kei ha híbiri huríu lugundun, aban weyu, aweiyasuhati Galiléagiñe lun Herusaléun sin hasubudiruni gürigia (Huan 7:10, 11). Genegeti giñe aban lan meha labu laríawagun kei lánigu disipulu. Haritagua waméi mosu lan meha líchugun Húdasi Isükarióte chuti luagu lun gayara lan hasubudiruni wügüriña ha ñǘdünbaña árügüdei (Matéu 26:47-49).
Lídiburi: Mamiginagunti meha lídiburi Hesusu ladüga ariñagatu Bíbülia “nibusigarídüna lan lun miginagu lan lídiburi wügüri” (1 Korintuna 11:14).
Ídiumaü: Hádiumati meha Hesusu. Gaganbaditi meha lun lúrudu le ichugúbei houn huríu, le ariñagubei siñá lan líbuguni wügüri lígirugu lídiuma (Fádirigu 19:27; Galasiana 4:4). Iridúati giñe lídiuma lidan aban profesía le ayanuhabei luagu lasufurirun Hesusu (Isaíasi 50:6).
Lúgubu: Furanguti aban lan meha wügüri héreti Hesusu. Éibugati saragu san kilometuru dan meha le lapurichihanbei (Matéu 9:35). Biámañein wéiyaasu labugaguniña ha alugurahabaña ténpulurugu ténpulurugugiñe, garabagua lumuti hadabulan, sagá laña mudún hama bágasu ñéingiñe lau aban abeigülei (Lúkasi 19:45, 46; Huan 2:14, 15). Ariñagatu aban líburu: “Sun abahüdaguni le lídanbei Ewanhéliu, arufudati buidu lan meha lúragu o látuadi Hesusu” (Cyclopedia to lani M’Clintock luma Strong, bolumen IV, páhina 884).
Ligaburi larihín ligibu: Hínsiñehabuti meha Hesusu gudemehabu ligía, chóuruti arihúa lan meha igaburi le luagu ligibu (Matéu 11:28, 29). Áluaha hamuti meha sun hawuyeri gürigia lun heresibirun gurasu luma íderawaguni lúmagiñe (Lúkasi 5:12, 13; 7:37, 38). Íbini meha irahüñü buiti meha hasandiragun houngua luma (Matéu 19:13-15; Márükosu 9:35-37).
Saminaü charati luagu ida liña lan meha laríawagun Hesusu
Le hafiñerubei saragu gürigia: Añahein gürigia saminatiña wuri lan meha Hesusu ladüga ariñaga tan liliburun Arufudúni ítara liña lan lídiburi kei liyu mudún ani “lugudi kei buronse le írichawaguaali” (Arufudúni 1:14, 15).
Le inarünibei: Seini burí ayusurúbei lun tabürüdǘn líburu Arufudúni (Arufudúni 1:1). Layanuhóuña luagu lídiburi luma lugudi Hesusu keisi hénpulu, lun larufudúniwa fiu lídangiñe ligaburi Hesusu lárigiñe láguyugun. Mama layanuhóuña luagu ida liña lan meha laríawagun Hesusu dan le ya lubéi ubouagu. Dan le lariñawagún lidan Arufudúni 1:14: “Haruti lídiburi kei liyu mudún, kei niewe”, layanuhaña luagu koloru. Mini lan ídiburi haruti lueirin lichú aau le luágubei Hesusu ladüga wínwanhali lan saragu (Arufudúni 3:14). Mama lariñaguña bérusu le ítara liña lan lugule lídiburi Hesusu kei liyu mudún, mama giñe lariñaguña ítara liña lan kei niewe.
Lidan arufudúni, arihúati mirí lan lugudi Hesusu “kei buronse le írichawaguaali, le dáwaali lidoun régigi” (Arufudúni 1:15). Ariñagatu giñe ámiriha lan “ligibu kei weyu dan le lásüdün lau sun lere” (Arufudúni 1:16). Menefánti aban lan hénpulu arufudúni le, ladüga úati ni aban rasa le ítarati likolorun lura kei lariñawagún ya. Ladimurehaña bérusu burí le luagu Hesusu lárigiñe láguyugun ladüga labagariduña lan “lidan larugounga le ñeinhin lubéi mayarafadun lan ni aban” (1 Timotéu 6:16).
Le hafiñerubei saragu gürigia: Débiliti meha Hesusu ani mere ligía.
Le inarünibei: Úati meha débili lan Hesusu, lubaragiñe lira, héreti meha ani ganigi ligía. Kei hénpulu, arufudaguati lungua lau ganigi houn saragu gürigia ha ñǘdünbaña árügüdei (Huan 18:4-8). Chóuruti here lan meha Hesusu ladüga sarafangei lan meha ligía, aban wadagimanu le mégeibei saragu erei (Márükosu 6:3).
Kati uagu lemegeira Hesusu lun líderawagun anügei wagabu? Kati uagu hilagia lubéi habaragiñe wuribatiña ha ádarawagubaña úara luma? (Lúkasi 23:26; Huan 19:31-33). Lubaragiñe meha hádaraguni, féridihali meha Hesusu saragu erei. Marumugunti sun áriebu ladüga meha lueirin idiheri le lasandirubei (Lúkasi 22:42-44). Sun áriebu ligía, óusera hamuti huríu wuriba ani laruganbei súfurigüda hamuti giñe rómana (Matéu 26:67, 68; Huan 19:1-3). Másiñati anihán lan le adügübei lun hilagia lan Hesusu.
Le hafiñerubei saragu gürigia: Súnwandan meha hiru lan Hesusu.
Le inarünibei: Áyeiha lumuti Hesusu ligaburi Heowá, Lúguchi le siélubei, le unbei tagúara Bíbülia “Bungiu le gúndaabei” (1 Timotéu 1:11, Traducción del Nuevo Mundo; Huan 14:9). Arufudahati meha Hesusu houn amu ida luba lan gunda hamá (Matéu 5:3-9; Lúkasi 11:28). Ligía gayara lubéi wasaminarun arufuda lani meha ligibu Hesusu ugundani le lasandirubei.
Háfuga hínsiñebei lan giñe le hun
ARUFUDAHANI TÍDANGIÑETI BÍBÜLIA LE SÚDINITI
Ka uagu chouru wabalin ariñaga tani Bíbülia inarüni?
Anhein Bungiu lubéi abürügüdübarun Bíbülia agurabúati lun mítaran tan kei furumiñeguarügü líburu.
WAWAGU
Amuriaha humá habisidahóun
Ayanuha humá hama gefentiña luagu Heowá luagu óunabagülei le tíchugubei Bíbülia lun somu álügüdahani o lúntima hasubudirun hawagu.