Anha, aban sífiri inarüniti Mafia, aban sífiri le meha agadeirubei ani aba lagarabaagun luagun Bungiu. Ligía “agumadihabei lidan ubóu le” (Huan 14:30; Éfesuna 6:​11, 12). Yúsutu Bíbülia fiu burí iri le arufudubalin ida liña lan sífiri wuribati le. Ariha humá fiu lídangiñe:

•   “Ebedaaguti” mini lubéi dimurei Satanási (Arufudúni 12:9).

•   “Marasualuguti” mini lubéi dimurei Mafia (Hobu 1:6).

•   Anihein dan wáwati lun tidan Bíbülia kei hewe ladüga gamañounhadi lan (2 Korintuna 11:3).

•   Íchaahati óuchawaguni (Matéu 4:3).

•   Yeeti (Huan 8:44).

Mama wuribani le hádanbei gürigia mini lubéi

 Añahein afiñetiña wuribani lan le hádanbei gürigia Máfiabei, íbini lidan Bungiu. Gama lumoun, abahüdaguatu Bíbülia luagu aban ayanuhani le ladügübei Bungiu luma Mafia. Lau sun lira, mafigounti luagu Bungiu ani harumati lidan sun katei. Ida lubati gayara lan ñein lan wuribani lidan? (2 Lúrudu 32:4; Hobu 2:​1-6). Kati gayaraabei wariñaguni luagu abahüdaguni tídangiñeti Bíbülia le ayanuhabei luagu lóuchaguni Mafia Hesusu, le mafigounbei? (Matéu 4:8-10; 1 Huan 3:5). Furanguti tarufuduni Bíbülia anihein lan Satanási.

 Añahein saragu gürigia afiñetiña ua lan Mafia. Lunti funa san taweiridun wanigi luagu katei le? Uá, ladüga ariñagatu Lererun Bungiu yusu lan Satanási sun luwuyeri iyeeni lun ladügüni le labusenrubei (2 Tesalónikana 2:​9, 10). Aban tídangiñe sádara tótima layusuruboun lafiñeragüdüniña gürigia luagu úa lan (2 Korintuna 4:4).

  Iyeeni: Nadagimeinti Mafia lun Bungiu.

 Le inarünibei: Lágani Bungiu Mafia, mama aban lubúein. Hágani giñe ha eseriwidubaña lun Bungiu Mafia, ligía léibaahanbaliña ani ru ligía hadurun (1 Féduru 5:8; Arufudúni 12:10).