Tidan Bíbülia, anástasis liña dimurei le ásügürawagüdübei kei “águyuguni”, mini lan “lararamunya gürigia”. Dan le láguyuguagüdüniwa aban gürigia, ítara liña kamá hamuga aba lásaarun; ábaya labagaridun laumeme igaburi le meha luágubei lubaragiñe lounwen (1 Korintuna 15:​12, 13).

 Íbini madarirún lan dimurei águyuguni lidan fánreinti le subudiwabei kei Binadu Daradu tidan Bíbülia, ayanuhati fánreinti le luagu emenigini lánina águyuguni. Kei hénpulu, füramaseti Bungiu hawagu ha hilaguaañabaña: “Habagaridayaba, hásaaruba lídangiñe óunweni” (Isaíasi 26:19; Hobu 14:​13-15; Danieli 12:​2, 13).

 Halíaba san háguyugua hilaaña? Háguyuguba fiu gürigia lun hawinwandun sielu lun harúeihan úara luma Kristu (2 Korintuna 5:1; Arufudúni 5:​9, 10). Watu Bíbülia lun águyuguni le “furumiñeti ásaaruni lídangiñe óunweni” mini lan lira, ñeinbei lan ámuya águyuguni (Arufudúni 20:6; Filipuna 3:​11). Háguyuguba hiibe-agei gürigia lun hawinwandun ya ubouagu (Sálumu 37:29).

 Ka asuseredubei dan le láguyugun aban gürigia? Rúhali Bungiu ubafu lun Hesusu lun lásaaragüdüniña gürigia lídangiñe óunweni (Huan 11:25). Layusurubei Hesusu ubafu le lun láguyuguagüdüniña sun ha hilaguaañabaña “lídangiñe hamúaha” lunya gabagari hamá lau ligiaméme igaburi le meha hawagubei, ligaburi hayanuhan luma hasaminan (Huan 5:​28, 29). Sun ha lúnbaña hásaarun lun hawinwandun ya ubouagu, heresibiruba aban úgubu le lauti abun luma ǘgürügü le úati mégeiti luagu (Isaíasi 33:24; 35:​5, 6). Ánhañati ha lúnbaña háguyugun lun hawinwandun sielu, háguyuguba kei sífirigu (1 Korintuna 15:​42-44, 50).

 Kaba san águyugua lídangiñe óunweni? Arufudahatu Bíbülia “lásaaragüdübaña lan [Bungiu] hilaaña, dandu ha buídubaña kei ha wuribabaña” lun hawinwandun ya ubouagu (Adügaü 24:15). Haganagua ha buídubaña o richatiña, háguyuguba wügüriña hama würiña úaraguatiña kéiburi Noé, Abüraámü tuma Sara (Agumesehani 6:9; Ebüréu 11:11; Santiagu 2:​21). Haganagua ha wuribabaña o maricharaguntiña, añahein gürigia ha meha machansinbaña lun hasubudiruni Bungiu luma lun gaganbadi hamá lun lilurudun.

 Ánhañati ha asigirubaña arufuda maganbadi lun lilurudun Bungiu darí lun máraninaaña lan, máguyugunbaña. Ligíati, hilatiña sun gürigia ha lun súnwandan (Matéu 23:33; Ebüréu 10:​26, 27).

 Ídaba san lasusereda águyuguni? Ariñagatu Bíbülia lidan aban profesía lídanba lan lidaani larúeihan Kristu keisi urúei marihúaditi háguyugua ha lúnbaña hawinwandun sielu, ani gumeseti arúeiha lidan irumu 1914 (1 Korintuna 15:​21-23). Ha lúnbaña háguyugun lun hawinwandun ubouagu, hásaaruba lídanme lidaani Larúeihan Kristu le lánina Milu Irumu, adügǘwa ligíame Ubóu le ábanme paraísu (Lúkasi 23:43, Traducción del Nuevo Mundo; Arufudúni 20:​6, 12, 13).

 Gayaraati san wafiñerun luagu ñeinbei lan águyuguni? Anha. Ayanuhatu Bíbülia luagu nefu águyuguni ani ariha hamuti meha saragu gürigia (1 Urúeigu 17:​17-24; 2 Urúeigu 4:​32-37; 13:​20, 21; Lúkasi 7:​11-17; 8:​40-56; Huan 11:​38-44; Adügaü 9:​36-42; 20:​7-12; 1 Korintuna 15:​3-6). Láguyugun Lásaru aban lídangiñe. Barühali meha Lásaru gádürü weyu lúmagiñe lounwen dan le láguyuguagüdünbalin Hesusu ani gíbetiña gürigia arihiti milaguru ligía (Huan 11:​39, 42). Ni láganigu Hesusu siñati meha hasigeneruni susere lan milaguru ligía, darí lun hadügün aransehani lun háfaruni Hesusu lau sun Lásaru (Huan 11:​47, 53; 12:​9-​11).

 Ariñagatu Bíbülia gabafu lan Bungiu lun lásaaragüdüniña gürigia lídangiñe óunweni. Gayaraati laritaguni sun hawaguti ha hilaguaañabaña lugundun mébehati le liyaraabei aritagua. Ani kei ligía lan Suntigabafubei, úati ni kata gayaraati leredehani luéi ladügüni (Hobu 37:23; Matéu 10:30; Lúkasi 20:​37, 38). Gabafuti Bungiu lun lagiribudagüdüni habagari ha hilaguaañabaña houn ani busenti ladügüni. Ariñagatu Bíbülia: “Bagúaruña hamuga nun, aba hamugati nóunabunibu, barihiña hamuga nuagun lau ínsiñeni lugundun buguya adügübalina” (Hobu 14:15).

Saminaü burí charati luagu águyuguni

 Le hafiñerubei saragu gürigia: Lidan águyuguni, aba tóundarun uani luma úgubu.

 Le inarünibei: Arufudahatu Bíbülia dan le lan lounwen aban gürigia aba lan mabagarihali lan. Arufudahatu giñe úa tan aban uani to erederuboun wínwanñu dan le hounwen gürigia (Agumesehani 2:7; Apurichihati 9:​5, 10). Dan le láguyuguagüdüniwa aban gürigia, móundaragunti lúgubu gürigia ligía tuma aban uani móunwedaditu, lubaragiñe lira, adügǘwarügüyati gürigia o uani tuguya.

 Le hafiñerubei saragu gürigia: Háguyuguba lan fiu gürigia lun lagumuchúniwa hau reiti ñein.

 Le inarünibei: Ariñagatu Bíbülia hásaaruba lan ha adügübalin le wuribabei lun haguseragüdüniwa (Huan 5:29). Haguserawagüdüba gürigia ha luagu le lunbei hadügüni lárigiñe háguyugun, mama luagu le hadügübei lubaragiñe hounwen. Ariñagati Hesusu: “Ninarün hau luagu anitebei lan dan, ani anihán dan ligía, danme le haganbuni hilaaña numalali; ha ñǘdünbaña lau le nubeibei, gabagaribaña” (Huan 5:​25). Ánhaña gaganbadi gürigia ha águyugubaña lun lumalali Kristu o lun larufudahan, labürüdǘba hiri tidan “líburu to lánina ibagari” (Arufudúni 20:​12, 13).

 Le hafiñerubei saragu gürigia: Háguyuguagüdüwaba gürigia lau ligiaméme úgubu le meha hawagubei lubaragiñe hounwen.

 Le inarünibei: Dan le lounwen aban gürigia, aba lañaladun lúgubu (Apurichihati 3:​19, 20).