Ínchaha tumutiwa Bíbülia lun gíchigadi wamá tídangiñe sun wanigi ani lau aban lubuidun igaburi. Dan le wadügüni lira, mámarügüñein gürigia le unbei wíchiga asagara buiti, sagatiwa giñe buiti lídangiñe (Ariñawagúni 11:25; Lúkasi 6:38). Ariñagati Hesusu: “Gúndaatimáati le íchugubei sügǘ láu le erésibirubei” (Hechos 20:35, Lerérun Búngiu to lánina iséri darádu).

•  Ka igaburi aubei lagundaara Bungiu dan le wíchugun?

•  Ka igaburi aubei magundan lan Bungiu dan le wíchugun?

•  Adundehani le tíchugubei Lererun Bungiu luáguti gíchigadi

 Barüti buiti dan le wíchugun tídangiñe sun wanigi. Ariñagatu Lererun Bungiu: “Lunti líchugun kada aban hídangiñe, keisi lasandiruni tidan lanigi; mama lau magundani ni ladüga lariñawagún hun lun híchugun, lugundun hínsiñehabuti Bungiu lun le íchugubei lau ugundani” (2 Korintuna 9:7).

 Agurabati Bungiu lun tídangiñe lan sun hanigi gíchigadi hamá ha áhuduragubaña lun (Santiagu 1:27). Wídehaña luma Bungiu dan le wíderaguniña ha mégeihabubaña, ani ariha lumuti wíchigadi keisi aban dúeiti (Ariñawagúni 19:17). Ariñagatu Lererun Bungiu wibihuba lan afayeiruahaü lúmagiñe Bungiu (Lúkasi 14:​12-14).

 Dan le wadügüni asaminareina wawouguoun. Kei hénpulu:

•   Lun waweiridagüdünu hanigi amu (Matéu 6:2).

•   Lun weresibirun somu katei leweñegua (Lúkasi 14:​12-14).

•   Lun wagañeihani wesefurun (Sálumu 49:​6, 7).

 Dan le wídehan lidan katei luma échuni le aubei magundan lan Bungiu. Kei hénpulu, wuribabei hamuga wíchugun seinsu lun somu gürigia lun láhureruni, lun labacharuadun o lun layusurun düroga (1 Korintuna 6:​9, 10; 2 Korintuna 7:1). Wuribabei hamuga giñe wíchugun seinsu lun aban gürigia le mabusenrunti lawadigimaridun lau sun gayara lan ladügüni (2 Tesalónikana 3:10).

 Dan le ladügün lun siñá lan wagunfulirun lau buligasion le ru laalibei Bungiu woun. Ariñagatu Lererun Bungiu lunti lan líchuguni hachügüdina tílana muna le hemegeirubei liduheñu houn (1 Timotéu 5:8). Mabuidunbei hamuga lun míchugun lani le hemegeirubei liduheñu houn ladüga líchugun houn amu. Lanwoun lira, magundanti meha giñe Hesusu hau ha máhabaña híchuguni le hemegeirubei hagübürigu ha derebuguhaña houn ladüga meha hariñagun sun lan le hámabei lunti lan híchuguni lun Bungiu (Márükosu 7:​9-13).