Uá, magünrinchawagunbei Ubóu le ñein wabéi, magudúnbei ani magidarúnbei lídangiñe lubara lun lichugún amu katei leweñegua. Arufudahatu Bíbülia adüga lani Bungiu Ubóu le lun hawinwandun gürigia lidan lun súnwandan.

•   “Galangantehabei gürigia buítiña múa, haganóuba giñe lidan súnwandan” (Sálumu 37:29).

•   Ru lumuti Bungiu “múa luagu lebu, lun mánhingichun lan lídangiñe lubara” (Sálumu 104:5).

•   “Masansiragunti ubóu” (Apurichihati 1:4).

•   “Bungiu [...] adügübalin múa, aranseléi, le ederebudagüdübalin lun haganóun gürigia” (Isaíasi 45:18).

 Magumuchunbaña gürigia lau Ubóu le lau burí wuribu le hadügübei, lanarime hawiyeduni, o lau amu burí katei le hadügübei, lugundun mígirun lubaña Bungiu. Lubaragiñe lira, lagünrinchagubaña Bungiu “ha agünrinchagubalin ubóu” (Arufudúni 11:18). Ida luba san ladügüni katei le?

 Líchugubei Bungiu Larúeihan le siélubei heweñegua sun gumadimatiña ha ubouagubaña, ha siñaguabaña houngua lun hararamuni lagadeirun katei ubouagu (Danieli 2:​44; Matéu 6:​9, 10). Hesusu, le Liráü Bungiu, ligíaba arúeiha lidan Arúeihani le (Isaíasi 9:​6, 7). Dan le meha ya lubéi Hesusu ubouagu, adügati meha milaguru lun lagalumaruni liñawan dan (Márükosu 4:​35-41). Kei Lurúeite Larúeihan Bungiu, Hesusuba ariha lau ligaburi dan luma lau sun le asuseredubei ubouagu. Ladügayabei sun katei iserime ya ubouagu, lun ítara lan kei meha fuluri-agei Edén (Matéu 19:28; Lúkasi 23:43).

 Uá. Marufudahan tumuti Bíbülia katei le. Másiñati añahein lan ha asaminarutiña ítara liña lan lugundun úati gunfuranda hamani buidu ka lan mini tubéi Bíbülia lidan 2 Féduru 3:7, ñein lubéi lariñaga: “Sielu luma múa le guentobei, lareiduñein Bungiu lubame weyu lagünrinchawagun lau watu gemeti”. Ariha wamá bián katei le lunbei líderaguniwa gunfurandei ka lan mini lubéi dimurei burí le:

1.   Tidan Bíbülia, yúsuati dimurei ubóu o múa, sielu luma watu lun layanuhóun luagu ámuñegueinarügü katei. Kei hénpulu, lidan Sálumu 97:1, ariñagati: “Gúndaaguala sun múa! Gúndaaguala burí ubouhu le gíbebei lamidangua barana! Aburemei urúeibei!”. Yúsuati dimurei “múa” ya, lun layanuhóun hawagu gürigia ha ubouagubaña.

2.   Lidan bérusu burí le lubaragiñebei 2 Féduru 3:7, afuranguagüdawati le mini lubéi dimurei “sielu”, “múa” luma “watu gemeti” según le uágubei layanuhóua ñein. Ayanuhati bérusu 5 luma 6 luagu Guran le asuseredubei lidaaniwagu Noé. Günringua lumuti Bungiu “ubóu meha ligira lau lidunarina guran”. Gürigiarügüñanu meha wuribatiña, lidan amu dimurei, “ubóu”, agünrinchawagúa lidan Guran, ánheinti Ubóu le ídanbei wawinwanda, magünrinchawagunti (Agumesehani 6:11). Günringua lumuti giñe “sielu”, lidan amu dimurei, gürigia ha meha agumadihabaña ubouagu lidan dan ligía. Ligíati, gürigia meha wuribatiña óunwegubaña, magumuchagunti Ubóu le ídanbei wawinwanda. Séfuti Noé hama liduheñu dan le ladagarunbei Guran ani hagía abuinchagüdübalin Ubóu hau hadügawagun (Agumesehani 8:​15-18).

 Ítara kei meha ladüga lidunari Guran, agünrinchaguni lau “watu gemeti” le uágubei layanuha 2 Féduru 3:7, layanuhaña luagu hagünrinchawaguba lan gürigia wuribatiña ani mámaba Ubóu le ídanbei wawinwanda agumucha. Füramaseti Bungiu ñeinbei lan aban “iseri sielu luma iseri ubóu” le ídanbei “buídubei [lan] sun katei ñein, richagua” (2 Féduru 3:​13). “Iseri ubóu” le, o amu hawuyeri gürigia ha lúnbaña hawinwandun lidan, lábugiñebaña aban “iseri sielu” o aban iseri agumadihani, Larúeihan Bungiu. Lábugiñe lagumadihan Larúeihan Bungiu, ladügǘba sun Ubóu ábanme paraísu buin lau darangilaü (Arufudúni 21:​1-4).