Ariñagatu Bíbülia busén lan Bungiu “lun ua lan ni aban agamariduti mamarieidunga” (1 Tesalónikana 4:3). Arufudatu Bíbülia magíaguni lan agabarahani, lagamaridun wügüri wügüri líledi o würi würi tíledi o lagamaridun wügüri aban würi to úmaboun mamarieidun lan.

•  Ka uagu busén lubéi Bungiu lun lamarieidun wügüri tuma würi lubaragiñe harounrun hámagua?

•  Buídubei san lun hawinwandun úara lubaragiñe hamarieidun lun harihin anhein buídubei lubéi hanaagun houngua?

•  Ka lunbei hadügüni maríeitiña lun buidu lan lidin houn lidan habagari?

•   Bungiu agumeserubalin maríei. Adüga lumuti dan le lóundaraguagüdünbalin furumiñeti wügüri tuma furumiñetu würi (Agumesehani 2:22-24). Mabusenrunti meha lun lawinwandun aban wügüri tuma aban würi magunfulirunga lau buligasion le lanügübei maríei.

•   Subudi lumuti Bungiu kátima lan buídubei woun. Adüga lumuti maríei lun gayara lan lóundarun aban wügüri tuma aban würi lun sun habagari. Busenti yebe Bungiu lun lahuudun óundaruni le lun hounigirún sun tílana muna luma lun lanügün buiti houn. Samina humá luagun le: lun wácharagun aban ílagu keisi lubudubu, mosu wafalaruni adundehani le líchugubei gürigia le adügübalin. Ítarameme, mosu wafalaruni adundehani le líchugubei Bungiu anhein busén wabéi lun gunda lan wabagari keisi iduheñu. Súnwandan buídubei lan lidin woun ánhawa gaganbadi lun (Isaíasi 48:17, 18).

•   Gayaraati lanügün agamariduni mamarieidunga óunwenbu burí turobuli. Kéiburi dageinaü le mabusenrúati, sandi le lanügübei agamariduni luma hasandiragun gürigia houngua wuriba.

•   Ruti Bungiu aban idewesei houn gürigia: gayara lan gasaanigu hamá lau hagamaridun. Aban idewesei wéiriti lebegi lira. Gabaroun waméi ariha lani Bungiu ibagari kei aban katei sagüráuti. Ligía aguraba lubéi lun inebe lan idewesei le woun luma lun lídanrügü lan maríei wayusurei. Ítara luba warufuduni inebe lan maríei woun (Ebüréu 13:4).

 Lun gunda hamá maríeitiña lidan habagari, memegeiruntiña hásügürün aban dan awinwanda hámagua lubaragiñe hamarieidun “lun harihini anhein buídubei lubéi hanaagun houngua”, le ñein lumuti gayara lan hafanreinragun le oura habusenrun. Lubaragiñe lira, buítimati hanaagun houngua dan le sandí lan kada aban hádangiñe gani lan buligasion luma le aban ani nadagimeintiña úara lun haransehani turobuli. a Ani maríei adügübei lun lasandirun kada aban gani lan buligasion luma le aban (Matéu 19:6).

 Úatiña maríeitiña lun macharabaña lan. Íbini ítara, gayaraati gunda lan habagari keisi maríeitiña anhein hafalara adundehani le tíchugubei Bíbülia. Ariha wamá fiu lídangiñe:

•   Lúntimala le lemegeirubei le aban hetenira lárigiñe ábame hetenirun lun le hemegeirubei (1 Korintuna 7:3-5; Filipuna 2:3, 4).

•   Áfaagua humá lun wéiritima lan ínsiñeni luma inebesei le hasandirubei huougua eibu lásügürün dan (Éfesuna 5:25, 33).

•   Samina humá furumiñe lubaragiñe hayanuhan (Ariñawagúni 12:18).

•   Gaguraasun humá hubaruagua ani ferudunagua humá húmagua lau lóufudagun (Kolosana 3:13, 14).