Añahein saragu gürigia adüga hamuti álügüdahani le hóuniwagua ladüga súfurihaña lan saragu ani mámarügüñein óunabagülei háluaha, háluahaña giñe gurasu. Añahein giñe amu gürigia, ariha hamuti háfaraguniña nasi saragu huríu lidan lidaani Libiaman Wuribu Wéiriti kei áfarahani wéiritimati le susereelibei ubouagu ani hénrenguti houn lun hafiñerun luagu anihein lan aban Bungiu le ígiruti lun lasuseredun katei burí ítarati.

 Iyeeni: Wuribati lun wálügüdahan ka lan uagu lígira Bungiu lun háfarawagun saragu huríu lidan lidaani Libiaman Wuribu Wéiriti.

 Le inarünibei: Añaheinhaña wügüriña hama würiña ha meha afiñebaña luagu Bungiu álügüdahatiña ka lan uagu lígira lun lasuseredun katei wuribati. Kéiburi profeta Abakúku le álügüdübalin Bungiu: “Ka uagu barihagüdana saragu idiheri luma wuribani?” (Abakúku 1:3). Lubaragiñe meha ladeinhan Bungiu lun profeta le, ábarüga ladügün lun labürüdǘniwa álügüdahani le ladügübei Abakúku tidan Bíbülia lun wasagarun súngubei wagía buiti lídangiñe.

 Iyeeni: Meberesegúnti Bungiu lau larihiniwa asufurira.

 Le inarünibei: Iyereeguti wuribani luma asufuriruni lun Bungiu (Ariñawagúni 6:16-19). Ariñagatu Bíbülia “aba [lan] lírudun” Bungiu lidan meha lidaani Noé ladüga larihin “hanarime lan hariban gürigia ha ubouagubaña” (Agumesehani 6:5, 6). Chóuruti giñe gari lan lun Bungiu larihini lueirin igarigu le lanügübei háfaragun nasi saragu huríu lidan lidaani Libiaman Wuribu Wéiriti (Malakíasi 3:6).

 Iyeeni: Aban abeichúni lúmagiñeti Bungiu háfarawagun saragu huríu lidan lidaani Libiaman Wuribu Wéiriti.

 Le inarünibei: Ígirati meha Bungiu lun hagünrinchaguni rómana Herusalén lidan furumiñeti sígulu (Matéu 23:37–24:2). Lúmagiñe dan ligía, mabeichunti Bungiu ni aban rasa, ua ligía himei lan aban néchani luéi aban. Lidan ligaburi larihini Bungiu katei, “aban habu huríu hama ha mámabaña huríu” (Rómana 10:12).

 Iyeeni: Lun hamuga anihein lan aban Bungiu suntigabafu le hínsiñehabuti woun mígirunbei hamuga lun háfaragun nasi saragu huríu lidan lidaani Libiaman Wuribu Wéiriti.

 Le inarünibei: Lau sun mama lan Bungiu adügübei lun ñein lan asufuriruni, anihein dan lígirun lun lasuseredun luagu átiri dan (Santiagu 1:13; 5:11).

 Luagu ligiaméme resun le uágubei lígira Bungiu lun hasufurirun gürigia lidan sun dan le sügühalibei: lun lafurangudun fiu iyeeni le asagahóubei saragu dan lubaragiñe le. Furanguti tariñaguni Bíbülia Mafia lan agumadihabei lidan ubóu le, mama Bungiu (Lúkasi 4:1, 2, 6; Huan 12:31). Gayaraati líderaguniwa bián katei le tafuranguagüdübei Bíbülia lun gunfuranda wamani ka lan uagu lígira Bungiu lun háfaragun nasi saragu huríu lidan lidaani Libiaman Wuribu Wéiriti.

1.   Adüga lumutiwa Bungiu lau iyaraani lun wanúadiruni le wabusenrubei wadügün. Lau sun ariñaga lani Bungiu houn furumiñetiña gürigia, Adán tuma Ewa, ka lan lagurabubei hámagiñe, mafosurun lumutiña lun gaganbadi hamá lun. Hagía anúadirubalin houngua ka lan buídubei lumoun ka lan wuribabei ani barüti le hanúadirubei saragu wuribani lun sun ubóu (Agumesehani 2:17; 3:6; Rómana 5:12). Lúmagiñe dan ligía, súfurihaña gürigia ladüga burí luriban hanúadirun. Ariñagatu líburu Statement of Principles of Conservative Judaism (Halurudun huríu ha wéiribei hafalaruni binadu hechun): “Liibe-agei asufuriruni le ubouagubei, susereti ladüga luriban wayusuruni iyaraani le ichugúbei woun lun wanúadiruni le wabusenrubei wadügün”. Lubaragiñe lagidaruni Bungiu iyaraani le hawéi gürigia, rúhali dan houn lun hahandilihani katei lau hagaburi.

2.   Busenti Bungiu lun laranseruni sun wuribani le lanügübei háfaragun nasi saragu huríu lidan lidaani Libiaman Wuribu Wéiriti ani gabafuti lun ladügüni. Füramaseti Bungiu láguyuguagüdüba lan saragu míñunu hilaaña, íbini huríu ha háfaragubaña nasi lidan lidaani Libiaman Wuribu Wéiriti. Ladügüba giñe lun habulieiduni gürigia ha móunwegunbaña lidan wuribani ligía sun igarigu le hásügürübei (Isaíasi 65:17; Adügaü 24:15). Ínsiñeni le lasandirubei Bungiu hawagu gürigia, chóurugüda lumuti woun lagunfulirubei lan le füramase lubéi (Huan 3:16).

 Saragu huríu ha móunwegunbaña lidan wuribani ligía, ibihatiña hárügüdagun houngua luma lun hakipuruni hafiñen. Ka íderagubaliña? Gunfuranda hamani ka lan uagu lígira Bungiu lun ñein lan wuribani luma lau hasubudiruni kaba lan ladüga lun laranseruni.