Átiriñein san liri Bungiu?
Óunabagülei le tíchugubei Bíbülia
Ábanrügüñein liri Bungiu. Anihán ligaburi labürüdǘn lidan ebüréu: יהוה. Ánheinti lidan garifuna, ítara liña labürüdǘn: “Heowá”. a Yusu lumuti Bungiu Isaíasi le lani profeta lun lariñagun: “Au Heowabei, ligía níribei” (Isaíasi 42:8 Traducción del Nuevo Mundo [TNM]). Fuati liri Bungiu tidan Bíbülia kéiburi 7,000 wéiyaasu lidan binadu abürüdǘni, sügǘ lau furumiñeguarügü ligaburi laguarún lun o furumiñeguarügü amu iri.
Anihein san amu burí liri Heowá?
Lau sun ábanrügüñein lan iri tayusura Bíbülia dan le tayanuhan luagu Bungiu, inarüni wawa lan giñe lun lidan amu burí igaburi le arufudubalin ida liña lan. Wabaruaguóun, wadariruba aban lísüta lau ámuñegueinarügü ligaburi laguarún lun Bungiu. Ariha huméi arufuda lani kada aban lídangiñe ligaburi aguarúni le ka lan ligaburibei Heowá.
Ligaburi laguarún lun Bungiu |
Halía láfuacha tidan Bíbülia |
Le mini lubéi |
|---|---|---|
Alá |
(Úati tidan) |
Lídangiñeti árabe dimurei Alá. Mama aban iri dimurei le, “Bungiu” mini lubéi. Tidan burí Bíbülia to lídanboun árabe —luma lidan amu burí iñeñein— Bungiu mini lubéi dimurei Alá. |
Álüfa luma Omega |
Álüfa, ligía furumiñetibei létüra lidan lubuña dimurei güriegu, ánheinti Omega ligía lagumuhóunbei. Mini lan Heowá lan “lagumeseha luma lagumuchagüle” o “furumiñeti luma agumuhóuni”, mini lan le, ua lan ni aban bungiu suntigabafu lubaragiñe Heowá ani úabei giñe ni aban lárigiñe (Isaíasi 43:10). |
|
Aburemei |
Sálumu 114:7 |
Aburemei; lidan ebüréu ʼAdhóhn luma ʼAdhoním. |
Au Le |
Áfuriduni 3:14 |
Mama lariñagarügüña Bungiu luagu anihein lan ani winwan ligía, lidan binadu dimurei ebüréu, lafuranguagüdüña gabafu lan Bungiu lun ladügüni le mégeiwabei lun lagunfuliruni le labusenrubei ladügün. Gayaraati giñe lásügürawagüdün dimurei burí le kei “Au Le adügübalin le nabusenrubei nadügün” o “Au Le adügübei lun lasuseredun” (Traducción del Nuevo Mundo [con referencias]; abürüdǘni). Íderagua lumutiwa dimurei burí le lun gunfuranda wamani le mini lubéi liri Bungiu, Heowá, iri le áfuachubei lidan le aban bérusu (Áfuriduni 3:15, TNM). |
Bungiu |
Agumesehani 1:1 |
Mini lan dimurei le, furumiñeguarügü katei le unbei láhudurawagua, layanuhaña giñe luagu aban gürigia le héreti. Dimurei ʼElohím lidan ebüréu mini lan, le arufudubalin óunwenbu luéirigun, liricha luma lubuidun Heowá. |
Dübü |
Sálumu 18:2; 94:22 |
Aban lan aramudaguagülei le chóuruti Heowá ani gesefuhadi lan. |
Emeiditi |
Áfuriduni 34:14 |
Máhati lun láhudurawagun houn amu búngiugu. Adügati dimurei le lun wasaminarun luagu aban gürigia le “amuriahabei lun lúnrügü lan láhudurawagua” (Traducción del Nuevo Mundo [con referencias], abürüdǘni). |
Esefuhati |
Isaíasi 41:14 |
Le esefurubaliña gürigia lídangiñe figóu luma óunweni lau lani Hesusu sákürifisiu (Huan 3:16). |
Habungiute búngiugu |
2 Lúrudu 10:17 |
Ligía lan Búngiubei le íñutimabei hawéi sun búngiugu ha “móunitiña [...] lun ni kata” (Isaíasi 44:9). |
Máisturu |
Isaíasi 30:20, 21 |
Adundeha lumutiwa ani arufudaha ligía woun lun wabuidun guánarügü (Isaíasi 48:17, 18). |
Le íñugubei |
Sálumu 47:2 |
Ligía lan íñutimabei ubara. |
Le Warúeitebei lun sun dan |
Ligía lan laubei liñun-agei ubafu ani ligíaba lan lau lun súnwandan. |
|
Le adügübalin sun ubóu |
Isaíasi 40:28 |
Ligía lan adügübalin sun le aniheinbei. |
Nadagimeinti múa |
Isaíasi 64:8 |
Gabafu lan hawagu gürigia luma hawagu néchanigu, ítara kei gabafu lan aban nadagimeinti múa luagu múa le lúhaburugubei (Rómana 9:20, 21). |
Óunigiruti |
Sálumu 23:1 |
Góunigi lumutiña ha áhuduragubaña lun. |
Sándutimabei |
Ariñawagúni 9:10 |
Ua lan amu le sándutimati luéi (ligía harumatimabei igaburi). |
Suntigabafu |
Agumesehani 17:1 |
Ua lan gabafutimati luéi. Dimurei ebüréu ’El Schaddái, mini lan “Bungiu Suntigabafu”, ani fuati dimurei le sedü wéiyaasu lidan binadu abürüdǘni ebüréu. |
Úguchili |
Ligía lan íchugubei ibagari. |
|
Weiriei Mutu |
Danieli 7:9, 13, 22 |
Magumesehati; ñéingubeiñein lubaragiñe sun katei le aniheinbei (Sálumu 90:2). |
Fulasu burí le iridúbei lidan Abürüdǘni Ebüréu
Anihein burí liri fulasu le áfuachubei tidan Bíbülia, anihein liri Bungiu lidan, gama lumoun mayusurúnti iri burí le lun laguarún lun Bungiu.
Fulasu |
Le ñein lubéi láfurida tidan Bíbülia |
Le mini lubéi |
|---|---|---|
Heowá-nisí |
Áfuriduni 17:15, Reina-Valera (RVA) |
“Bungiu nufanidiranbei”. Aban Bungiu Heowá le úmounbei houdin lumutuniña áluaha aramudaguagülei luma íderawaguni (Áfuriduni 17:13-16). |
Heowá-salom |
Alidihatiña 6:23, 24, TNM |
“Darangilaü Heowá”. |
Heowá-sama |
Esekiéli 48:35, RVA |
“Anihein Heowá ya”. |
Heowá-yiré |
Agumesehani 22:13, 14 |
“Ru lumuti Bungiu le emegeirubei”. |
Ka uagu súdini lubéi lun lasubudirúniwa luma layusurún liri Bungiu?
Chóuruti súdini lan liri guánarügü Bungiu lun, lugundun adügati lun labürüdǘn tidan Bíbülia saragu milu wéiyaasu (Malakíasi 1:11).
Arufuda lumuti meha giñe Hesukrístu, le Liráü Heowá, saragu wéiyaasu súdini lan liri Heowá. Kéiburi dan meha le lafurieidunbei lun Heowá, ariñagati: “Inebewalá biri” (Matéu 6:9; Huan 17:6, RVA).
Ha afurendeirubaña ani gumese hagía ayusurei liri Bungiu, hagumeseruña ádarei furumiñeti pasu lun gamadagua hamá luma Heowá (Sálumu 9:10; Malakíasi 3:16, RVA). Adügati umadaguaü le lun gachansin hamá lun hasagarun buiti lídangiñe füramasei le ladügübei Bungiu: “Ru laali línsiñehabu nun, níchugubei iñu, le ñein lumuti siñá lan lachülürǘniwa lumoun, ladüga subudi lumuti niri” (Sálumu 91:14, RVA).
Ariñagatu Bíbülia: “Gama lumoun íbini hamuga añahein lan búngiugu hama aburemeigu, sielu hamá yebe o ubouagu yebe (kei añahein lubéi saragu búngiugu hama saragu aburemeigu)” (1 Korintuna 8:5, 6). Gama lumoun, arufudati liri Heowá furangu ligíarügüñein lan Bungiu inarüniti (Sálumu 83:18, RVA).
a Añahein sásaamu lidan ebüréu himei hamuti hásügüragüdüni liri Bungiu kei “Yahweh”.
Háfuga hínsiñebei lan giñe le hun
ÁLÜGÜDAHANI LE TÓUNABUBEI BÍBÜLIA
Ka san Heowabei?
Habungiute san lílana aban ageiraü kei meha ísüraelina?
ARUFUDAHANI TÍDANGIÑETI BÍBÜLIA LE SÚDINITI
Gíriti san Bungiu?
Wáwati lun Bungiu lidan ámuñegueinarügü igaburi, kéiburi, Suntigabafu, Le Adügübalin sun katei luma Aburemei. Arufudati bidéu le fua lan liri Bungiu 7,000 wéiyaasu tidan Bíbülia.
WAWAGU
Amuriaha humá habisidahóun
Ayanuha humá hama gefentiña luagu Heowá luagu óunabagülei le tíchugubei Bíbülia lun somu álügüdahani o lúntima hasubudirun hawagu.