Anha, ladüga busenti Bungiu lun hadamuridagun gürigia lun háhuduragun lun. Ariñagatu Bíbülia: “Lunti giñe wáfaagun wíderaguniña wíbirigu lun hínsiñehabu hamá, luma lun hadügüni le buídubei. Wagía afiñetiña, moun lumuti wafalaruni hénpulu hani ha héchubaña lun midin hamá lidan wadamuridagun” (Ebüréu 10:​24, 25).

 Arufudati Hesusu tídanbaña lan buga aban óundaruni lani disipulugu dan le lariñagunbei houn: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:35). Ligíati, lun harufuduni lani Hesusu disipulugu ínsiñeni le hádangua, mosu hadamuridagun hama amu kristiánugu. Lun habihini lira, mosu ñein lan aransehani hadan lun gayara lan hadamuridagun súnwandan lun háhuduragun lun Bungiu (1 Korintuna 16:19). Ítara luba gayara lan aban hamá óundaruni ha ítarabaña kei iduheñu luéigiñe Hesukrístu lidan sun ubóu (1 Féduru 2:​17).

Mégeiwati amu katei bóugudin luéi tílana wamá aban relihión

 Arufudahatu Bíbülia mosu lan hóundaragun gürigia lun háhuduragun lun Bungiu. Lau sun lira, mariñaguntu gayara lan lagundaarun Bungiu lau aban gürigia ladügarügü tídanñein lan aban relihión. Mosu larihíniwa tubafu lani relihión lidan libagari. Kei hénpulu, ariñagatu Bíbülia: “Anihán agunfuliruni [o relihión] le harumabei, le aubei lagundaara Wáguchi Bungiu: Lun wíderaguniña méteñuhaña hama würiña ha hilaañabaña hámarigu lidan hadiheri, luma lun madaseirun wamá lau burí katei wuribati le lani ubóu le” (Santiagu 1:​27).