Arufuda lumuti san profesía Hesusu lan Mesíasibei?

GUMESELÁ LIDAN

Óunabagülei le tíchugubei Bíbülia

Anha. Dan meha le ya lubéi Hesusu ubouagu, gúnfuliti saragu profesía luáguti “ábuti [o Mesíasi] le anuadirúabei”, le lóunahabei Bungiu ubouagun “lun […] lasalbaruniwa” (Danieli 9:25; 1 Huan 4:14). Íbini lárigiñe lounwen Hesusu, sigiti agunfulirei profesía luáguti Mesíasi (Sálumu 110:1; Adügaü 2:34-36).

Ka mini lubéi dimurei “Mesíasi”?

“Anuadirúaali” mini lubéi dimurei ebüréu Maschíah (Mesíasi) luma dimurei güriegu Khristós (Kristu). Ligíati, “Hesusu le anuadirúaalibei” o “Hesusu le Mesíasi” mini lubéi iri Hesukrístu.

Lidan meha tidaani Bíbülia, lau meha leserún garaba lábulugun aban gürigia lanuadirúa lun lagunfulirun lau aban wadagimanu espechaliti (Fádirigu 8:12; 1 Samueli 16:13). Anúadira lumuti Bungiu Hesusu lun ligíaba lan Mesíasi: arufudati lira ru lan óunwenbu ubafu lun (Adügaü 2:36). Ani mama lau garaba lanúadirei Bungiu Hesusu, lau sífiri sandu lanúadirei (Matéu 3:16).

Gayaraati san lagunfulirun profesía luáguti Mesíasi luagu lóugiñe aban gürigia?

Uá. Ítara kei mouba lan luhabárigi aban gürigia, luágurügüñein giñe aban Mesíasi o Kristu layanuha profesía le tídanbei Bíbülia. Eweridihatu Bíbülia: “Ladüga hayabinba eyeehatiña lun harufudagun houngua kamá Kristu, kamá burí profetagu; ani hadaaguba óunwenbu burí seini luma milaguru lun heyeeduniña íbini ha anúadira láañabaña Bungiu ánhaña gayara” (Matéu 24:24).

Gayaraati funa san lachülaagun Mesíasi ámuñegü?

Uá. Ariñagatu Bíbülia lidan profesía liábinba lan meha Mesíasi hádangiñe ladügawagun Dawidi, aban hádangiñe binadu lurúeitegu Ísüraeli (Sálumu 89:3, 4). Gama lumoun, gumutiña rómana tau burí dugumedu to arufudubalin kátaña lan ladügawagunbaña urúei Dawidi dan meha le hábürühanbei luagun uburugu Herusalén lidan irumu 70. a Lúmagiñe dan ligía, úati gayaraati larufuduni hádangiñeti lan ladügawagun urúei Dawidi. Ánheinti lidan lidaani Hesusu, anuhagua meha dugumedu burí to. Ni meha láganigu Hesusu siñati meha hasigeneruni hádangiñeti lan ladügawagun urúei Dawidi Hesusu (Matéu 22:41-46).

Átiriñein san profesía luáguti Mesíasi tidan Bíbülia?

Siñati lariñawagún lau ichouruni átiriñein lan profesía luáguti Mesíasi. Hénrenguti labahüdǘniwa profesía burí le íbini lidan burí fánreinti tídangiñeti Bíbülia le ayanuhabei furangu luagu Mesíasi. Kei hénpulu, lidan Isaíasi 53:2-7 iridúati saragu sügǘ lánina profesía le agunfulirubei luagu Mesíasi. Añahein gürigia saminatiña abahüdǘwa lan sügǘ le kei ábanrügü profesía ani añahein amu, saminatiña mosu lan labahüdǘn profesía le aban lárigi aban.

Fiu lídangiñe profesía luáguti Mesíasi le agunfulirubei luagu Hesusu

Profesía	Sügǘ	Lagunfulirun
Ladügawagun Abüraámü	Agumesehani 22:17, 18	Matéu 1:1
Ladügawagun Isaakü le liráü Abüraámü	Agumesehani 17:19	Matéu 1:2
Lídangiñeti hani ísüraelina türibu le gíribei Hudá	Agumesehani 49:10	Matéu 1:1, 3
Hádangiñeti ladügawagun urúei Dawidi	Isaíasi 9:7	Matéu 1:1
Tiráü aban nibureintu gañüngiru	Isaíasi 7:14	Matéu 1:18, 22, 23
Belén nasirua lan	Mikeasi 5:2	Matéu 2:1, 5, 6
Emanuéli b laguarúa lun	Isaíasi 7:14	Matéu 1:21-23
Lidan gudemei nasirua lan	Isaíasi 53:2	Lúkasi 2:7
Lárigiñe nasirua lan, aba háfarawagun saragu irahüñü	Heremíasi 31:15	Matéu 2:16-18
Wáwati lun Ehiptugiñe	Oseasi 11:1	Matéu 2:13-15
Wáwati lun nasarétüna c	Isaíasi 11:1	Matéu 2:23
Ounahóuati aban óunagülei aranserei üma lubá	Malakíasi 3:1	Matéu 11:7-10
Anuadirúati keisi Mesíasi lidan irumu 29	Danieli 9:25	Matéu 3:13-17
Ariñagati Bungiu Liráü lan	Sálumu 2:7	Adügaü 13:33, 34
Emeiditi tau luban Bungiu	Sálumu 69:9	Huan 2:13-17
Apurichihati uganu buiti	Isaíasi 61:1	Lúkasi 4:16-21
Lau lapurichihan, arihúati aban óunwenbu larugounga Galiléa	Isaíasi 9:1, 2	Matéu 4:13-16
Ítara kei meha Moisesi, adügati meha Hesusu milaguru	2 Lúrudu 18:15	Adügaü 2:22
Ítara kei meha Moisesi, ayanuhati Hesusu lidan liri Bungiu	2 Lúrudu 18:18, 19	Huan 12:49
Areidaguagüdati saragu sánditiña	Isaíasi 53:4	Matéu 8:16, 17
Málugunti lun laganbahóun luagu	Isaíasi 42:2	Matéu 12:17, 19
Arufudati gudemehabu houn ha asufurirubaña	Isaíasi 42:3	Matéu 12:9-20; Márükosu 6:34
Arufudaha lumuti liricha Bungiu	Isaíasi 42:1, 4	Matéu 12:17-20
Gíchaahaditi adundehani buiti	Isaíasi 9:6, 7	Huan 6:68
Subudigüda lumuti liri Heowá	Sálumu 22:22	Huan 17:6
Yúsuti hénpulu lun larufudahan	Sálumu 78:2	Matéu 13:34, 35
Aban ábuti ligía	Danieli 9:25	Matéu 23:10
Gíbetiña mafiñeruntiña luagu	Isaíasi 53:1	Huan 12:37, 38
Ligía meha dübü le uágubei hachugeragua amu	Isaíasi 8:14, 15	Matéu 21:42-44
Rútiña mebereseni lun	Sálumu 118:22, 23	Adügaü 4:10, 11
Iyereeguti houn gürigia mébunouga	Sálumu 69:4	Huan 15:24, 25
Rútiña uéiriguni lun dan le lebelurunbei Herusaléun wariñu luagu aban burigü	Sakaríasi 9:9	Matéu 21:4-9
Rútiña irahüñü uéiriguni lun	Sálumu 8:2	Matéu 21:15, 16
Ñǘbuinti lidan liri Heowá	Sálumu 118:26	Huan 12:12, 13
Garabaguati aban lumada luagun	Sálumu 41:9	Huan 13:18
Alugurúati luagu 30 murusun pülata d	Sakaríasi 11:12, 13	Matéu 26:14-16; 27:3-10
Ígira hamuti lumadagu lábugua	Sakaríasi 13:7	Matéu 26:31, 56
Rútiña gefentiña yéetiña lidurun	Sálumu 35:11	Matéu 26:59-61
Móunabunti ni kata dan le híchugunbei lidurun	Isaíasi 53:7	Matéu 27:12-14
Suegua hamuti	Isaíasi 50:6	Matéu 26:67; 27:27, 30
Agayuahatiña lábulugun	Mikeasi 5:1	Márükosu 15:19
Bei hamuti	Isaíasi 50:6	Huan 19:1
Ígirati lun lagayuahóun luagu	Isaíasi 50:6	Huan 18:22, 23
Aba heledegun gumadimatiña lubá	Sálumu 2:2	Lúkasi 23:10-12
Dáwaguati luéigiñe lugudi luma lúhabu luagu aban wagabu	Sálumu 22:16	Matéu 27:35; Huan 20:25
Áhureratiña ubunuruni tuagu ladaüragun	Sálumu 22:18	Huan 19:23, 24
Abahüdǘwati hadan wuribatiña	Isaíasi 53:12	Matéu 27:38
Aba hanabuni ru hagía mebereseni lau	Sálumu 22:7, 8	Matéu 27:39-43
Aranseñu liña lun lasufurirun hawagu gafigountiña	Isaíasi 53:5, 6	1 Féduru 2:23-25
Genegeti meha ígira laali lan Bungiu lábugua	Sálumu 22:1	Márükosu 15:34
Rútiña binigá lau katei gífiti lun	Sálumu 69:21	Matéu 27:34
Sanditi mágürabu lubaragiñe lounwen	Sálumu 22:15	Huan 19:28, 29
Deregeguati lungua lun lounwen	Isaíasi 53:12	Márükosu 15:37
Ru lumuti libagari lebegime hasalbarun saragu	Isaíasi 53:12	Matéu 20:28
Máhalachawagunti ni aban lídangiñe labu	Sálumu 34:20	Huan 19:33, 36
Miragua hamuti	Sakaríasi 12:10	Huan 19:33-35, 37
Bunawati kei rísiti	Isaíasi 53:9	Matéu 27:57-60
Águyuguagüdawati	Sálumu 16:10	Adügaü 2:29-31
Ibiha lumuti amu gürigia ubaraü le meha lánibei gürigia le alugurubalin	Sálumu 109:8	Adügaü 1:15-20
Ñun liña luéigiñe lóunwenren Bungiu	Sálumu 110:1	Adügaü 2:34-36

a Ariñagatu lani McClintock luma Strong Cyclopedia: “Chóuruti gumuguagüdawa tan burí dugumedu to arufudubalin ka lan burí türibu hama iduheñu ídangiñebei hayabin huríu dan le lagünrinchawagunbei Herusalén, mama lubaragiñe dan ligía”.

b “Bungiu wama” mini lubéi iri ebüréu Emanuéli ani arufuda lumuti buidu ka lan ligaradanboun Hesusu keisi Mesíasi. Ani dandu lau ya lan ubouagu kei lau le ladügübei, arufudati meha anihein lan Bungiu hama ha áhuduragubaña lun (Lúkasi 2:27-32; 7:12-16).

c Lídangiñe dimurei ebüréu nétser liabin dimurei nasarétüna ani “láhüchagun” mini lubéi.

d Lau sun tídanñein lan liliburun Sakaríasi profesía le, ariñagati Matéu ítara liña lan “lagunfulirun le meha lariñagubei profeta Heremíasi” (Matéu 27:9). Genegeti liliburun lan meha Heremíasi furumiñetuboun lídangiñe fánreinti tídangiñeti Bíbülia le subudiwabei kei “haliburun profetagu” (Lúkasi 24:44). Másiñati yusu lani Matéu iri “Heremíasi” lun layanuhan luagu sun fánreinti ligía, liliburun Sakaríasi taganagua.

Háfuga hínsiñebei lan giñe le hun

LE TARUFUDAHABEI LERERUN BUNGIU

Houcha huméi ida liña lan

Gumese humá aban aturiahani tídangiñeti Bíbülia mafayeihanga lau lídehan aban Gefenti.

ÁLÜGÜDAHANI LE TÓUNABUBEI BÍBÜLIA