Uá. Mariñaguntu Bíbülia wuriba lan seinsu, ni ligía lan lébunabei sun wuribani. Kamaniti lariñawagún “seinsu lébunabei sun wuribani”, ani añahein afiñetiña tídangiñeti lan Bíbülia dimurei burí le. Le linarün katei, ariñagatu Bíbülia: “Línsiñegu seinsu ligía lílagülebei sun luwuyeri wuribani” (1 Timotéu 6:10).

•  Ka tariñagubei Bíbülia luagu seinsu?

•  Ka uagu wuriba lubéi línsiñegu seinsu?

•  Buiti le wasagarubei lídangiñe gaganbadi wamá lun le tariñagubei Bíbülia

•  Adundehani le tíchugubei Lererun Bungiu luáguti seinsu

 Ariñagatu Bíbülia ánhawa lan ayusurei seinsu lau lichú aau gayara lan líderaguniwa ani góunigi láwame (Apurichihati 7:12). Ayanuhatu giñe buidu hawagu ha gíchigadibaña ani íderagua hamutiña amu lau le hámati (Ariñawagúni 11:25).

 Lau sun lira, wéridi tumutiwa Bíbülia moun lumuti lan wígirun lun séinsuba lan katei létima súdinibei lidan wabagari. Ariñagati Ebüréu 13:5: “Míchiga huméi hínsiñehabu luagun seinsu; gunda humá lau le húmati”. Ka wafurendeirubei lídangiñe le? Lau sun mégeiwa lan seinsu, moun lumuti ligía lan furumiñe lidan wabagari. Lun wibihini lira, mosu gunda wamá lau gama wamani létima wemegeirubei: éigini, daüguaü tuma muna (1 Timotéu 6:8).

 Mibihinbaña gürigia ha igaaduabaña ibagari magumuchaditi (Éfesuna 5:5). Furumiñe, ladüga barǘ lani gürigia le igaaduaübei irisini kei Bungiu o áhuduraguni mama inarüniti (Kolosana 3:5). Libiaman, ladüga dürügua hamani gürigia ha igaaduabaña lúrudu lánina laruman ibagari lun habihini le habusenrubei. Ariñagati Ariñawagúni 28:20: “Ha afuudubaña luagu irisini, meredebaña mabeichúnga”. Másiñati busenbaña lan híweruguniña gürigia o hanügüni hálagu hawéi lau ibibuni o hariñagun houn hadügüba lan wuribani houn ánhaña míchugun seinsu houn, gayaraati íbini háfarahan o hárügüdüniña haduheñu gürigia lun hamuriahan seinsu haweigiñe.

 Ani íbini madügün wamá ni kata wuribati, gayaraati lanügün línsiñegu seinsu amu burí turobuli woun. Eweridihatu Bíbülia: “Ánhaña ha busenbaña harisidun, mawandun hamuti óuchawaguni, aba hábürühan tidoun lisadaraana saragu lagübüri aritaguni” (1 Timotéu 6:9).

 Mǘnabudaguagüdünbadiwa woungua ani gúndaabei Bungiu wama, ánhawa inebehabu lun lilurudun ani madüraagun wameime lúnrügü wibihin seinsu. Ánhawa áfaagua tídangiñe sun wanigi lun wagundaaragüdüni Bungiu, füramaseti woun: “Nóunigirubadibu; mígirun nubadibu” (Ebüréu 13:5, 6). Ani chóurugüda lumuti le woun: “Gürigia ha hemenigiwati hawagu, ladimurehóuba buiti hawagu” (Ariñawagúni 28:20).