Gani hamuti isaanigu ha wéinamugaaña buligasion lun hóunigiruniña hagübürigu. Ariñagatu Lererun Bungiu houn isaanigu kristiánugu, “lunti hafurendeirun irahüñü hagía lun hetenirun furumiñe lun le hemegeirubei haduheñu luma lun háguyugüdüni ínsiñehabuni le hadúeirubei houn hagübürigu; lugundun buiti katei le, gúndaati giñe Bungiu lau” (1 Timotéu 5:4). Dan le híchuguni le hemegeirubei hagübürigu houn, harufuduña gaganbadi humá lun le tariñagubei Lererun Bungiu luagu lunti lan inebe hamá hagübürigu hun (Éfesuna 6:2, 3).

 Mariñagun tumuti Bíbülia furangu ida luba lan hounigirúniwa agübürigu ha derebuguhaña, lau sun lira, abahüdagua tumuti ida liña lan meha hadügüni wügüriña hama würiña ha lánina binadu dan. Rutu giñe fiu adundehani le gayaraabei líderaguniña ha óunigirubaña gürigia derebuguhaña.

•  Ida liña hóunigiruniña fiu gürigia ha lánina tidaani Bíbülia hagübürigu ha derebuguhaña?

•  Ka adundehani tíchugubei Lererun Bungiu?

•  Ariñagatu san Bíbülia lunti lan hóunigiruniña isaanigu hagübürigu hábiñe?

 Ámuñegueinarügüti ligaburi hadügüni, según meha le gádanbaliña.

•   Wínwanti meha Hosé dise luéi Hakobu, lúguchi le derebuguhalibei. Dan le gayara lubéi, adügati meha aransehani lun lidin awinwanda yarafa lun. Adügati giñe aransehani lun ñein lan éigini luma Hakobu luma aban fulasu chóuruti lun lawinwandun (Agumesehani 45:9-11; 47:11, 12).

•   Ñǘdüntu meha Rudu awinwanda tageira tágürü ani nadagimeintu saragu lun tóunigirunu (Rudu 1:16; 2:2, 17, 18, 23).

•   Lubaragiñe meha lounwen Hesusu, áluahati kaba lan óunigiroun María to lúguchu, to meha hilaalibei tani weiriei (Huan 19:26, 27). a

 Tidan Bíbülia, anihein adundehani le gayaraabei líderaguniña ha óunigirubaliña hagübürigu ha derebuguhaña ani anihein dan hasandirun lubucha uagu luma maguraasuni.

•   Inebe hamá hagübürigu hun.

   Le tariñagubei Lererun Bungiu: “Ruba inebesei lun búguchi luma tun búguchu” (Áfuriduni 20:12).

   Ida luba wafalaruni? Anhein gayara lubéi, ígira humaña hagübürigu lun hanúadiruni hagía houngua kaba lan hadüga, lun hariñaguni ida liña lan habusenrun lun hounigirúniwa. Gunfuranda humaña ani íderagua humaña lidan le gayara hubéi. Ani adüga huméi lau inebesei súnwandan.

•   Gunfuranda humaña ani feruduna humañame.

   Le tariñagubei Lererun Bungiu: “Ragüguaü unguaü luéi agañiduni ligía lubuidunbei ichügü; lichugún mebereseni luagu anabawaguni inebeseibei” (Ariñawagúni 19:11).

   Ida luba wafalaruni? Másiñati hariñagun hagübürigu somu katei le gáriti hun, o harufudun meteingiradi luagu burí katei le hadügübei. Anhein ítara liña lubéi, álügüdagua humá hungua: “Ida luba hamuga san nasandiragun nungua anhein ásiñara nadügün somu katei le nabusenrubei? Ma mínsiñebei hamuga nun?”. Anhaün íchaagua hungua lidoun halugaarun ani feruduna humañame, hídehaba lun maweiridagun lan katei.

•   Áluaha humá ariñahani.

   Le tariñagubei Lererun Bungiu: “Dan le ua lan álügüdahani, wuribati aransehani; según hibe eweridihatiña labuidura aransehani” (Ariñawagúni 15:22).

   Ida luba wafalaruni? Áluaha humá ariñahani luagu ida luba lan lagaranihóun lun sandi le hawagubei agübürigu. Akutiha huméi ka burí lan ídemuei aniheinbei lidan fulasu le ñein lubéi hawinwanda. Ayanuha humá hama amu gürigia ha giñe óunigirubaliña hagübürigu ha derebuguhaña. Anhein gábirigu hubéi, gayaraati san hayanuhan hama luagu katei le gayaraabei hadügüni lun hóunigiruniña hagübürigu ha derebuguhaña?

•   Subudi huméi lébeha le hiyaraabei adüga.

   Le tariñagubei Lererun Bungiu: “Hámañein ǘnabugubutiña lichú aau” (Ariñawagúni 11:2).

   Ida luba wafalaruni? Subudi huméi le hiyaraabei adüga. Le linarün katei, kada aban wádangiñe gébehati wadaani luma were, ani siñati wadügüni sun le hamuga wabusenrubei wadügüni hawagu wagübürigu. Anhein gíbeya lubéi katei le lunbei hadügüni lun hóunigiruniña hagübürigu, amuriaha humá ídemuei hama amu hiduheñu o fayei humá aban óunigihatu.

•   Góunigigua humá hungua.

   Le tariñagubei Lererun Bungiu: “Úati gürigia meberesenti lau lúgubu guánarügü; hóugüdarügü lumuti, góunigilei” (Éfesuna 5:29).

   Ida luba wafalaruni? Íbini huguya lan gánibalin buligasion lun hóunigiruniña hagübürigu, lunti giñe hóunigiragun hungua ani anhein maríeihadün lubéi, lunti hóunigiruniña hiduheñu. Hou humá buidu, emeraagua humá ani arumuga humá buidu (Apurichihati 4:6). Anihein dan mégeiwa lan lun hasagarun dan lun hemeraagun. Ítara, buítimabei hasandiragun hungua lun hóunigiruniña hagübürigu ha derebuguhaña.

 Mayanuhantu Lererun Bungiu furangu luagu katei le. Añahein iduheñu, anúadiratiña lun hasigirun hagübürigu eredera tidan haban sun gayara lan. Másiñati lachülürün dan lun hasaminarun buídutimabei lan hounigirúniwa tidan aban muna to ñein lubéi hounigirúa wéiyaaña. Buiti lun hóundaragun iduheñu lun hayanuhan luagu kátima lan buídubei houn súngubei (Galasiana 6:4, 5).