Lau sun mayanuhan tan Bíbülia furangu luagu taríawagun iyawaü o bidéu lánina agamariduni ni luagu katei lánina agamariduni luéigiñe Internet, furanguti tarufuduni ka lan lisaminanbei Bungiu luagu katei burí le gayaraabei lawiyeduni wasaminan o ladügün lun gadan lániwa agamariduni hama ha úmabaña mamarieidun wamá. Ariha humá fiu lídangiñe adundehani le tíchugubei Bíbülia:

•   Ariñagati Kolosana 3:5 lunti lan wígiruni luriban waritagun le gayaraabei lanügüniwa adüga katei wíyeti o lun wagamaridun mamarieidunga. Ánheinti taríawagun iyawaü o bidéu lánina agamariduni, magida lumuti luriban ayumahani, rúrügütu lubúa. Adügati wígiraguagüdün woungua lun luriban ayumahani lánina laríawagun agamariduni lun wiye wamá ligibugiñe Bungiu.

•   Ariñagati Matéu 5:28 “luagu furumiñeguarügü lan le awamadirutu aban würi, agabarahaali [lan] tuma tidan lanigi”. Adügati taríawagun iyawaü o bidéu lánina agamariduni lun liábingua liwiye saminaü wachügüwagun le gayaraabei ladügün lun wéiguadun lidoun magíaguni.

•   Ariñagati Éfesuna 5:3 houn kristiánugu moun lumuti lan “ni lun hadimurehan luagu salufuri, ni amu luwuyeri iwiyei, ni [luagu] igaaduaü”. Anhein wuriba lubéi wayanuhan luagu burí katei le, gúbumeti lun wanügüni laríawagun agamariduni wisebáharime?

•   “Ménrengunti larihíniwa katei lan burí katei le hadügübei ha afalarubalin layumahan ǘgürügü: Agabarahani, gámariguatiña hámagua mamarieidunga, adaaguatiña burí katei wíyeti [...]; adüga hagía amu burí katei lenege burí le. Nariñaguñein hun kei nariñaguni lubaramegiua luagu mebelurunbaña lan ha adügübalin katei le lidoun larúeihan Bungiu” (Galasiana 5:19-21). Ítara kei ha arihibaña iyawaü o bidéu lánina agamariduni, wíyeti giñe lanügüniña Bungiu sun ha gadan lubaña katei lánina agamariduni luéigiñe Internet, ha ayusurubalin hagagamurun lun hóunahan luma lun heresibirun katei burí wíyeti o katei lánina agamariduni. Ánhawa échuda luagu katei líbeina le, gayaraabei weferidiruni lugundan Bungiu sunsuinagubei.