Ámuñegueinarügüti igaburi wuribati le gádanbalin leredúniwa luagu gürigia lun lagamaridun. Másiñati ladügün aban gürigia lun basandiragun bungua wuriba, ladüga layanuhan bun luagu agamariduni o lau laguruhan buagu. Le turobulibei, anihein lan dan ibidiñewati anhein siñagei lubéi, o adarihani lan o ladügüdarúña lan buagu lun bagamaridun.

 Anti buguya, subuditi san bun dan le héreduña lan buagu lun bagamaridun?  Bagüba ya lun basubudiruni lóunabagüle.

 Anhein ñǘdüngidibu lubéi leskuela, másiñati bagagibudaguña lan luma turobuli le. Lau sun lira, susereti giñe katei le lidan sun libagari aban gürigia, kei burí dan le bagumesera lan awadigimarida. Íbini ítara, ánhabu afurendeira óunigiragua bungua guentó, gayaraabei bóunigiragun bungua ámuñegü. Másiñati giñe bibihin lun madügün lan ananihati le damichi houn amu.

 Ménrengunti bararamuni léredun gürigia buagu, anhein basubudira lagumeseha, subudi ligíame le lunbei badügüni bun. Danme abunha lan aliihei ǘrüwa abahüdaguni le, álügüdaguaba bungua: “Kaba hamuga san nadüga?”.

SÜGǗ:

“Lidan nuadigimari, ábaha hariñagun fiu eyeriñu ha wéinamuhaña nuéi nun, luagu weiri lan numagadiñe, ani hínsiñe lan hamuga houn lun nibureingiña lan. Luagu aban weyu, aban layarafadun aba hádangiñe nanagangiñe, irimichei nídiburi” (Tabita, 20 irumu tau).

 Gayaraati hamuga tasaminarun Tabita: “Ánhaña nawanda ani meberesen nuguya hau, másiñati labuchadun hawagu”.

 Ka uagu mabuidun lubéi saminaü le?: Ariñagati burí le aturiahóubei hawagu ha asufurirubani leredúniwa hawagu lun hagamaridun, ánhaña lan madügün ni kata, lasigiruba lan turobuli le, ani gayaraabei lan lanarimeduntima.

 Áfaaguaba badügüni le: Gagibuguabá luma gürigia lau darangilaü, ariñagabá lun furangu, mínsiñe lan layanuhóun bun ítara ni lun bouserúniwa wuriba. “Anhein aguura somubadi nuagu lau aban igaburi le mínsiñeti nun —tiña Taryn, 22 irumu tau— aba narihin ligibuagun, ani aba nariñagun lun madügadigiabei. Adügati le lun taweiridun hanigi gürigia”. Anhein asigira, mígiraguagüdaba bungua. Dan le luáguti lan waricha le lánina arumani, ariñagatu Bíbülia woun lun mígiraguagüdün wamá woungua, lun deregüdagu wamá lidan wafiñen (Kolosana 4:12).

 Ánhabu lasiadira aban gürigia, magagibudaguaba luma. Beiba ñéingiñe lau lóufudagun áluahaba aban gürigia le wéiyaali ani le gafiñerúati luagu.

SÜGǗ:

“Dan meha sestuñadina lubéi, rárama hamutina biama nupaanágu hiñaruñu. Hínsiñetiña meha hiñaruñu tun aban hándangiñe ani busentu meha lun tadari nan. Máhatina. Íbini ítara, sigitu éreda nuagu sagü weyu labadinagua lasansirun külase. Luagu aban weyu, dáhamutina tóubawagun muna” (Victoria, 18 irumu tau).

 Gayaraati hamuga tasaminarun Victoria: “Ka un hu lan nayanuhan? Hariñaguba luagu madügün nan amu katei luéidigia abuyaaha, ani másiñati mafiñenbaña lan nun”.

 Ka uagu mabuidun lubéi saminaü le: Anhein mariñagunba lun ni aban, lasigiruba gürigia ligía ananiha bun ani masiñati ladügüni houn amu (Apurichihati 8:11).

 Áfaaguaba badügüni le: Amuriahabá ídemuei. Gayaraabei híderagunibu bagübürigu o bumaisturugu aranserei turobuli le. Ánhañati meberesen bau? Ságüme héredun gürigia buagu, bürübei le asuseredubei. Bürübeime weyu, oura le lasuseredunbei, halía lan lasusereda luma le lariñagubei bun. Rubei le babürüdübei houn bagübürigu o lun bumaisturun. Ténitimatiña gürigia lun le abürüdǘbei.

SÜGǗ:

“Ñeinñein meha aban nibureinti lidan sétanu lun láhurerun rugby, letia lúgubu hanufudetina meha luéi. Ítagaraüyebe bián lan méturu liñun lúgubu (sisi ugudi dimí), 135 kilu lihürü (300 líburu). Ruti lisaminan lun luagu lúmaribadina lan. Adügati lun hénrengu lan nibagari luagu aban irumu. Luagu aban weyu, wábuguarügüñadiwa tidan luban furendei, lau lóufudagun aba layarafadun nun, aba nachubarun luéigiñe nala aban nidin ñéingiñe éibaagueina” (Julieta, 18 irumu tau).

 Gayaraati hamuga tasaminarun Julieta: “Ítara haña sun nibureintiña”.

 Ka uagu mabuidun lubéi saminaü le: Maweiyasunbá asaminara lasansirubei lan gürigia luriban ligaburi ítaraguarügü.

 Áfaaguaba badügüni le: Maweiyasunbá áhayacha luagun, manügabeime le ladügübei kei siñagei. Ru láamuga fe danme larihin bigibuagun wuriba lan le ladügübei.

 FURUMIÑETI KESI:

“Mínsiñeti nun nóuseragun ni aban, ligía méredun nubéi hawagu niburentiña ha ananihabaña nun. Íbini ariñaga nan houn lun hígirunina nungua, súnwandan nariñaguni houn hayeina hawagun. Saminatiñati nadarihañanu lan” (Tabita).

•   Lun hamuga buguya lan Tabita, kaba hamuga badüga? Ka uagu?

•   Kaba adüga lun lasaminarun aban adügüdaruti buagu badarihañein lan?

 LIBIAMA KESI:

“Gumeseti sun katei dan le hayanuhanbei fiu nibureintiña bulagiadi nun, dan le wafureindeiruña lubéi físika. Lidan burí furumiñeti dimaasu le ásügürübei meberesentina hau, hénrengutimarügüti katei. Aba hagumeserun añuura nóubagiñe, ábatiha hagulicharunina. Dagua numutiñaha, adügaméme hamuti. Lagumuhóun oura, ruti aban hádangiñe aban abürüdǘni le wéiriti liwiye nun. Aba níchugunu lun numaisturun, aba migirúnwaali lan lun lidin leskuela. Ñein níchiga fe mosu lan yebe ayanuhagiñe nan luma máisturu dan le lagumeserunbei katei le” (Sabina).

•   Saminatibu san ka lan uagu mayanuhan tubéi Sabina lubaramegiua luma tumaisturun? Buiti san le tadügübei? Ka uagu?

 LǗRÜWAN KESI:

“Dǘgüdati aban nibureinti luagu Greg le namulen tidan agowagülei. Mígirun lumuti lun láfuridun ani amuriahati luma lun líchugun aban chuti lun. Máhati Greg, lau sun lira mídinti nibureinti le. Mosu ládaruni, lun lagidaruni luáriua” (Suzanne).

•   Bariñaguña hamuga san ladügüdaruña lan luagu Greg lun lagamariduni? Ka uagu?

•   Ka uagu afiñe bubéi añahein lan nibureintiña himei hamuti mariñagun hamá ni kata dan le ladügüdarun amu nibureinti hawagu?

•   Afiñetibu san buidu lan le ladügübei Greg? Lidan bikesin kaba hamuga badüga?