“Aban lídangiñe katei le hénrengubei nun lidan aweirideina nan, aba lan hínsiñe hamá wügüriña níledi nun. Saminatina yebe fiúrügübei lan dan nau ítara, lau sun lira, anahagua asandirei ligiaméme” (David, 23 irumu lau).

 Aban kristiánu David le busenti gaganbadi lan lun Bungiu. Gayaraati san lagunfulirun aban gürigia kei ligía lau le lamuriahabei Bungiu luma? Ka lasaminarubei Bungiu luagu magüsi lan aban gürigia?

•  Ka tariñagubei Bíbülia?

•  Mini lan san le...?

•  Ánheinti...?

 Sánsiti le hasaminarubei gürigia hawagu magüsi según dan le ídanbei hawinwanda luma hechun. Ánhañati kristiánugu, mafalarun hamutiña hiibe-agei gürigia masaminarunga. Mabusenrúntiwa lun “laduruhaniwa ligarabalin furumiñeguarügü iseri luwuyeri arufudahani”, kei aubei lariñagei Éfesuna 4:14. Bíbülia lébunaboun le wafiñerubei luagu furumiñeguarügü échuni, habagari magüsi laganagua.

 Furangutu Bíbülia dan le tayanuhan luagu habagari magüsi. Ariha waméi le tariñagubei.

•  “Magamaridabá aban wügüri kamá hamuga aban würi, wíyeti katei lira” (Fádirigu 18:22).

•  “Ligía ígira laaña lubéi Bungiu lun hadaagun katei nibusigarídünati; íbini würiña adaaguatiña katei burí hama würiña háledigu lubaragiñe hamuga hagamaridun wügüri keisi lubudubu” (Rómana 1:​24, 26).

•  “Ibidiñeti san hun luagu mafanranbaña lan ha marichabaña lidan larúeihan Bungiu? Meyeedaguagüda humá hungua: Ni ha agamaridubaña mamarieidunga, ni ha áhuduragubaña houn guáriua, ni ha agabarahatiña hámarigu, ni magüsi, ni ha agamaridubaña wügüriña háledigu, ni híwerutiña, ni igaaduatiña, ni bacharuatiña, ni marasualugutiña, ni ha anügübalin hálagu amu lau ibibuni —sun ha adügübaña libe burí wuribani le, siñabei hebelurun lidoun larúeihan Bungiu” (1 Korintuna 6:​9, 10).

 Le linarün katei, hounti sun gürigia lilurudun Bungiu. Meberesenga ka lan layumahabei kada aban wádangiñe lidan luáguti agamariduni, sun wagía mosu wárügüdagun woungua luéi wadügün aban katei le mínsiñeti lun Bungiu (Kolosana 3:5).

 Mini lan san le ínchaha tániña Bíbülia gürigia lun heyereegudun magüsi houn?

 Uá. Arufudahatu Bíbülia moun lumuti lan heyereegudun amu gürigia woun. Ínchaha tumutiwa Bíbülia lun wáluahani “darangilaü hama sun gürigia”, meberesenga ida liña lan hanügüni habagari (Ebüréu 12:14). Ligíati, mabuidunti wadügün bula hau magüsi, wéibaahaniña o wóuseruniña wuriba.

 Mini lan san le mosu lan hebedaagun kristiánugu lun lúrudu le ígiruti lun lamarieidun wügüri luma wügüri o würi tuma würi?

 Según Bíbülia, lúnrügüñein lamarieidun wügüri tuma würi lánhara Bungiu (Matéu 19:4-6). Mídintiña kristiánugu luéigiñe lóubadina lúrudu le ígirubei lun hamarieidun magüsi, mebedaagun hagía lun. Aban katei lánina polítika lasagarún o masagarún lan lúrudu luagu hafulesein magüsi. Ani ariñagatu Bíbülia moun lumuti lan wádaragun woungua lidoun katei le lánina polítika (Huan 18:36).

 Ánheinti gumeseeli lubéi aban gürigia awinwanda kei magüsi? Gayaraati san lasansirun gürigia ligía?

 Anha, gayaraati lasansirun. Le linarün katei, ayanuhatu Bíbülia hawagu gürigia ha adügübalin asansiruni le lidan furumiñeti sígulu. Tidan ligaradan apostolu Pábulu houn korintuna, ariñagati furangu mebelubaña lan wügüriña ha agamaridubaña wügüriña háledi lidoun Larúeihan Bungiu, ani ariñagati: “Añahein hídangiñe ítara hiña meha” (1 Korintuna 6:11).

 Mini lan san le aban lan mayumahandigiaaña lan hanügüni ibagari ligía? Uá. Ariñagatu Lererun Bungiu: “Iserihali higaburi le iserideinábei” (Kolosana 3:10). Ítara liña, mararamunti asansireina lani gürigia ligaburi.

 Ánheinti ígira laali lubéi wügüri lagamaridun wügüri líledi o würi würi tíledi ani sandimémegiña luriban ayumahani?

 Kei lasuseredun lau amu ayumahani, mosu lanúadahan gürigia anhein líchuguba lubéi lubúa ayumahani ligía o lígiraguagüdüba lan lungua lun. Ida lubati lárügüdagun gürigia lungua? Óunabatu Bíbülia: “Abagarida humá kei labusenruni Sífiri, ítara luba michu humá gúnfuli lun layumahan ǘgürügü” (Galasiana 5:16).

 Ánhabu íchiga fe, mariñagunti bérusu le luagu masandirunhaali lanme gürigia luriban ayumahani. Lubaragiñe lira, ariñagati ñein ánhawa lan échuda aturiahoun Lererun Bungiu ani afurieida wagíame lun súnwandan, hérebadiwa lan lun wararamuni luriban ayumahani luma lun míchugun wamá gúnfuli lun.

 Ibihati David, le uágubei wayanuha lidan lagumeseha, erei, lárigiñetima labahüdaguni le asuseredubei lun houn lagübürigu. Ariñagati: “Gídatina aban óunwenbu ihürügu nuáriua, ani másiñati buídutimabei hamuga lan meha nibagari dan le nibureintimagidina lun hamuga meha ayanuhagia nan hama”.

 Gúndaatimatiwa dan le gaganbadi wamá lun lilurudun Heowá. Gayaraati wachoururuni le: “richaguati” lilurudun ani “barüti ugundani tun anigi”, ani ánhawa lan afalarei wibihiba lan óunwenbu burí abiniruni (Sálumu 19:​8, 11).