•   Mínsiñeti san bun lun baganbuniña amu anabaha?

  •  Uá, míchugungubeitina fe; héchuhadina aganbahei.

  •  Murusunraü, lau sun lira, siñati nadügün ni kata.

  •  Anha, mínsiñeti nun; mawandun numuti.

•   Anihein san dan banabahan?

  •  Uá, manabahantina.

  •  Anha, anihein burí dan.

  •  Anha, sun oura.

•   Wéiriti san luriban?

  •  Uá, anihein katei wuribatimati luéi le.

  •  Anha, aban katei le wéiriti luriban.

 Le san lúgubu wuriba lan bariñagun bulagiadi? Háfuga bariñagun: “Uá, maribanti. Anihein katei wuribatimati. Ani sun mutu anabahatiña”. Inarüni san le?

 Íbini mafiñenbani, añahein gürigia áfaagutiña lun mariñagun hamá bulagiadi. Ani gabarountiña fiu katei le uágubei masaminarun hamá amu. Kei hénpulu:

•  Dan le banabahan arufuda bumuti kátañadibu lan. Arufuda lumuti ligaburi bayanuhan ka lan tídanbei banigi. Dan le bayusurun liwiye iyumaü, barufuduñein meberesen ban lau le hasandirubei amu. Anihán san le bigaburibei?

   Ariñagatu Lererun Bungiu: “Dimurei le áfuridubei lídangiñe iyumaü, tídangiñe anigi liabin” (Matéu 15:18).

•  Adügati bayanuhan bulagiadi lun hasaminarun amu wuriba buagu. Ariñagatu líburu Cuss Control: “Arufuda lumuti ligaburi bayanuhan kaba lan hawuyeri gürigia bumadagu, anhein inebebadibu lubéi houn biduheñu luma houn bupanaagu lidan wadagimanu, ida luba lan banaagun bungua hama amu, kaba lan hafurendeira amu gürigia búmagiñe, anhein badariruba lubéi yabu o anhein liñurúba lubéi bubara lidan wadagimanu luma kaba lan hasaminara gürigia ha ibidiñehabúbaña bun buagu”. Ariñagatu giñe líburu to: “Álügüdaguaba bungua anhein habuiduruba lubéi bumadagu anhein bígira liwiye iyumaü”.

   Ariñagatu Lererun Bungiu: “Ígira huméi […] sun anabahani” (Éfesuna 4:31).

•  Masaminarabá buídubei lan béiguadun houn amu lau banabahan. Ariñagati aban sásaamu le gíribei Alex Packer tidan liliburun ¡Qué maleducado!, aba lan labuchadun hawagu gürigia dan le haganbuniña amu anabaha súnwandan ani mígirunti bayanuhan lau liwiye iyumaü lun bayanuhan lau “lichú aau, lualin ichügü o lau gudemehabu”. Ani sigiti ariñaga: “Anhein mayanuhadi bubéi, úabei giñe sumadi ban lun basaminarun”.

   Ariñagatu Lererun Bungiu: “Madímureja jumá liwíye dimúrei” (Efesios 4:29, Lerérun Búngiu to lánina Iséri Darádu).

•  Bürübei ídaba lan bígirei anabahani. Áfaaguaba lun mariñagun ban liwiye dimurei luagu aban hati. Bürübei bawanserun tidan aban kuadernu o tidan aban kalendáriu. Lun lagunfulirun le babusenrubei bibihin, mosu badügün amu burí katei. Kéiburi:

•  Badisedun luéi isebáhari le gaganati bulagiadi. Ariñagatu Lererun Bungiu: “Féridigüda hamuti hagübüri umadagu lubuidun igaburi” (1 Korintuna 15:33). Lidan bérusu le, dimurei umadagu, layanuhaña giñe hawagu gürigia ha áfuachubaña tidan pelikula o pikchá, huraraü lauti bidéu luma lidan uremu le baganbahabei. Ariñagati Kenneth, le 17 irumu lau: “Anihein dan, aba beremuhan aban uremu le hínsiñeti bun, ani míchutibu fe luagu bulagiadi lan lila. Ladüga buidu lan ligaburi lasounurun”.

•  Barufuduni chu lan bau. Añahein anabahatiña lun hasandiragun houngua kamá wéinamugaaña. Gama lumoun, ha wéinamuhañabaña subudi hamuti “arufudahani le buídubei lumoun le wuribabei” (Ebüréu 5:14). Mǘnabudaguagüdüntiña houngua lúnrügü buidu lan héiguadun houn amu.

 Le linarün katei, adügarügüti bulagiadi lun lawiyedun bisaminan luma sun le geyegubei bau. Ani gíbeyaali iwiyei ubouagu, memegeiruntiwa lanwoun. Ariñagatu líburu Cuss Control: “Mafalarabaña hiibe-agei. Lubaragiñe lira, adügabéi sun biyaraati lun mayanuhóun lan dimurei wíyeti. Anhein badüga ítara, buídubei basandiragun bungua, ani buídubei giñe hasandiragun amu houngua burugabu”.