Ariñagati aban nibureinti gíriti Will, “Anhein ibidiñe lan bun ida luba lan baliihanu Bíbülia gayaraati tíchugun lidabu agu bun”.

 Busentibu basubudiruni ida luba lan línsiñedun taliihóun Bíbülia bun? Líderagubadibu ariñahani le.

•  Adügabá lun gabagari tan Lererun Bungiu

•  Áluahaba ariñahani!

•  Le hariñagubei amu nibureintiña

 Rúguaba bungua lidan le baliihabei. Gayaraati badügüni ítara:

1.   Anúadiraba aban abahüdaguni tídangiñeti Bíbülia le babusenrubei baturiahan. Gayaraati banúadirun aban abahüdaguni o aban fánreinti lídangiñe aban Ewanhéliu o aban dürama tídangiñeti Bíbülia le lídanbei wani páhina lidan Internet jw.org.

2.   Aliihabei abahüdaguni. Gayaraati baliihani bábuguarügü o úara hama bumadagu o biduheñu. Gayaraati laliihan aban gürigia ani ha híbiri gayaraati hadügüni le uágubei labahüdawagúa.

3.   Adügabá aban lídangiñe adundehani le:

   •   Adügabá aban dibuhu o fiu dibuhu le burí afuranguagüdübalin abahüdaguni ligía lidan ligaburi lasuseredun. Ábürühaba fiu dimurei le afuranguagüdübalin kada fánreinti.

   •   Dan le baliihaña lan luagu aban gürigia le uágubei tabahüdagua Bíbülia, áluahabei ka lan lánibei le ladügübei, ligaburi luma burí abiniruni le libihubei.

   •   Adügabéi kei hamuga bíchuguña ñunsu. Ru humá ariñahani luagu le anügübei fulasu ani adügabá “álügüdahani” houn ha gafanranbaña lidan.

   •   Anhein adüga lubéi aban gürigia charati, samina humá luagu ámubei lan lagumuchun. Kei hénpulu, saminabá luagu dan le lariñagubei Féduru ibidiñe lan Hesusu lun (Márükosu 14:66-72). Ida luba hamuga san lóunabun Féduru lidan amu igaburi lun óuchawaguni le?

   •   Anhein busén bubéi, abürühaba aban dürama luáguti aban sügǘ tídangiñetu Bíbülia. Bürübei le lunbei lafurendeirúniwa lídangiñe abahüdaguni ligía (Rómana 15:4).

 Anhein bakutiha aban o biama dimurei burí le ayusurubei lidan abahüdaguni tídangiñeti Bíbülia, gayaraati badarirun lichú aau lúmagiñeti Bungiu le wéiriti lebegi.

 Kei hénpulu, agoubaguagüdabei Matéu 28:7 luma Márükosu 16:7.

•    Ka uagu labürüha Márükosu luagu larufudagubá lan meha Hesusu lungua houn lani disipulugu “luma Féduru”?

•  Murusun lídangiñe ariñahani: Marihin lumuti meha Márükosu le asuseredubei, genegeti lúmagiñe lan Féduru libihei ariñahani libügürü katei le.

•  Áluahabei pérüla lánina lichú aau: Ka uagu libiha Féduru gurasu dan le lasubudiruni lau busén lan meha Hesusu lunya larihini? (Márükosu 14:66-72). Ida liña larufuduni Hesusu ligía lan aban umadaü inarüniti lun Féduru? Ida luba báyeihani Hesusu lun aban ban umadaü buiti houn amu?

 Ligíati, danme le basaminarun luagu le baliihabei tidan Bíbülia, áluaha buguyame lanwoun ariñahani, hínsiñetimabei taliihóun Bíbülia bun.