Según aban akutihani, furíeitiña 80 hádangiñe san nibureintiña merigana lun Bungiu, lau sun lira, hamidanrügüñanu hádangiñe afurieida sagü weyu. Másiñati añahein lan álügüdagutiña houngua: “Lúnrügüñein san hasandiragun gürigia houngua buidu lahuuda furíei?”.

•  Kátima san mini lubéi furíei?

•  Le san lúgubu aganba lánina Bungiu?

•  Ka burí katei uágubei gayara lan nafurieidun?

•  Le hariñagubei amu nibureintiña

 Layanuhan gürigia luma Heowá, le adügübalin sun katei, mini lubéi furíei. Saminabá luagun le mini lubéi le: Lau sun íñutima lan Bungiu hawéi gürigia, madiseti “luéi kada aban wádangiñe” (Adügaü 17:27). Le linarün katei, darí wamuti agunbirahani le tidan Bíbülia: “Yarafa humá lun Bungiu, ábame giñe layarafadun hun” (Santiagu 4:8).

 Ka gayaraabei badügüni lun bayarafadun lun Bungiu?

•   Bafurieidun. Ítara liña layanuhóun luma Bungiu.

•   Baturiahanu Bíbülia. Ítara liña “layanuhan” Bungiu buma.

 Líderagubadibu ligaburi ayanuhani le —bafurieidun luma baturiahanu Bíbülia— lúntima lumada ban Bungiu.

 “Layanuhóun luma Heowá, lidan amu dimurei, layanuhóun luma Suntigabafu, ligía aban lídangiñe lubuidun chansi le gayaraabei libihini aban gürigia” (Jeremy).

 “Dan le nadaarunu nanigi lun Heowá, ábatima yarafañu lan nasandiragun nungua lun” (Miranda).

 Íbini afiñe ban luagu Bungiu —ani furíei buguya lun— másiñati hénrengu lan bun bafiñerun aganba lánibu. Lau sun lira, ariñawagúati lun Heowá tidan Bíbülia: “Aganba bumuti afurieiduni” (Sálumu 65:2). Darí lun agunbiraha lánibu lun babahüdaguni sun bidiheri lun. Ka uagu? “Lugundun lóunigiruñad[ibu] le tímatimaati” (1 Féduru 5:7).

 Saminabá luagun le: Gabügürüguati san bayanuhan hama bumadagu? Gayaraati giñe badügüni ligiaméme luma Bungiu. Gabügürügualá bayanuhan luma ani waba lun Heowá lau liri (Sálumu 86:​5-7; 88:9). Le linarün katei, agunbiraha tumutiwa Bíbülia afurieida lun Bungiu súnwandan (1 Tesalónikana 5:​17).

 “Dan le nafurieidun, nayanuhaña luma Núguchi le siélubei ani dará numutu nanigi lun sunsuinagubei” (Moises).

 “Abahüdahatina katei súdiniti lun Heowá, ítara kei nadügüni dan le nayanuhan tuma núguchu luma hama numadagua ha úmabei buídutima lan nanaagun nungua” (Karen).

 Ariñagatu Bíbülia: “Ariñagarügü huméi sun katei lun Bungiu súnwandan dan le hafurieidun; amuriaha humá luma, mabulieidagunga lun híchugun eteingiruni lun” (Filipuna 4:6).

 Mini lan san lira gayara lan bayanuhan luagu biturobulin lun? Anha, ítara liña! Bíbülia guánarügü agunbirahabaliwa lun wadügüni le: “Ígirabei bidiheri lun Aburemei, ábame líderagunibu” (Sálumu 55:22).

 Lau sun lira, moun lumuti turobulirügü lan babahüdagua lun Heowá. Ariñagatu aban nibureintu gíritu Chantelle: “Mámabadina hamuga aban buitu lumada Heowá anhein lúnrügüñein lubéi namuriahan nafurieida”. Ani ariñagatu giñe: “Saminatina le lan furumiñeti katei le lunbei wadügüni: weteingiruni. Ani le linarün katei, lunti migife tan lísüta lau katei le uáguti weteingirei”.

 Saminabá luagun le: Ka katei lidan bibagari uágubei basandira eteingiruni? Saminabá luagun ǘrüwa katei le uágubei gayara lan beteingiruni Heowá uguñe.

 “Íbini luagu aban liraüraü katei, kéiburi aban lubuidun fuluri, gayaraati línchahaniwa afurieida lun wíchugun seremei lun Heowá” (Anita).

 “Ráramaguaba asaminara luagu aban bérusu tídangiñeti Bíbülia le hínsiñeti bun, o luagu aban lídangiñe katei le adüga láalibei Heowá le uágubei taweirida banigi, lárigiñe, ábame beteingiruni luagu” (Brian).