Ka hasaminarubei?

•   Wuribati san laliihóun oroskopo, láhurerun tau bali lánina ubunuruni o haluahóun garíaahatiña?

•   Abahüdaguni luagu katei le aubei hádaragua gürigia houngua hamoun máfianu, úraga san luagu lageindagun le buídubei luma le wuribabei odi abahüdaguni inarüniti?

 Lidan artíkulu le warihubei ka lan uagu lachawahei katei le aubei hádaragua gürigia houngua hamoun máfianu, hasaminan saragu ani ka lan uagu lunti lubéi duari ban.

•  Ka uagu lachawahei hasaminan saragu?

•  Ka uagu lunti lubéi duari ban?

•  Le gayarabei badügüni

•  Le hariñagubei amu nibureintiña

 Bísinisi le ñein lubéi ladügǘwa isebáhari teni tima haña lun katei le aubei hádaragua gürigia houngua hamoun máfianu. Arihúati lidan píkchá, tidan bigibigitu, bidéu lánina huraraü tuma burí líburu. Ani guenlé achawaha laali taturiahóun waruguma hasaminan bandi nibureintiña, máfianu, ha achuuhabaña hitaü hama burí burú. Ka uagu lachawahei katei le aubei hádaragua gürigia houngua hamoun máfianu hasaminan saragu?

•   Ladüga busén hamá hasubudiruni anhein le lubéi lúgubu añahein lan máfianu.

•   Ladüga hadiheridun luagu ámuñegü ani busén hagía hasubudiruni le lunbei lasuseredun.

•   Ladüga busén hamá hayanuhan hama gürigia ha hilaañabaña.

 Maribanti wabusenrun lun wasubudirun aban katei. Kei hénpulu, anihein dan wálügüdagun woungua ida luba lan wabagari ámuñegü, o wálugun lárigi aban waduhe o wamada le hilaali. Anheinti katei le aubei hádaragua gürigia houngua hamoun máfianu denchati.

 Daritiwa eweridihani furanguti tidan Bíbülia libügürü katei le aubei hádaragua gürigia houngua hamoun máfianu. Kei hénpulu ariñagatu:

 “Ualá ni aban hídangiñe [...] maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, marumaagüdün huguyame hewe, málügüdahan huguyame hama garíaahatiña, ni hama búyeigu, ni hama hilaaña. Lugundun mínsiñetiña ha adügübaña katei libeina le lun Bungiu” (2 Lúrudu 18:10-12).

 Ka san uagu furangu lubéi teweridihan Bíbülia luagu katei le aubei hádaragua gürigia houngua hamoun máfianu?

•   Adügati katei le aubei hádaragua gürigia houngua hamoun máfianu lun luéigiñe wamá hóubadina máfianu. Ariñagatu Bíbülia aba lan hebedaagun somu ánheligu lun Bungiu aba hayabin lun láganiñu hama (Agumesehani 6:2; Húdasi 6). Lun heyeeduniña gürigia, yusutiña máfianu salufuritiña ha, gürigia ha egesihatiña, ha aturiahabaña waruguma o ha nege ayanuhabaña hama hilaaña o ha ariñagubalin katei le lunbei lasuseredun ámuñegu. Ánhawa ádaragua woungua lidoun burí katei le ladügüba lun hádangiñe wamá láganiñu Bungiu.

•   Adügati katei le aubei hádaragua gürigia houngua hamoun máfianu lun wafiñerun añahein lan gürigia ha gayarabei hasubudiragüdüni le lunbei lasuseredun ámuñegü. Gama lumoun, Bungiu rügüñein gayara lariñaguni “le lunbei lasuseredun lúmagiñe furumiñeti dan, ariñaga numuti le anitebei saragu dan lubaragiñe” (Isaíasi 46:10; Santiagu 4:13, 14).

•   Adügati katei le aubei hádaragua gürigia houngua hamoun máfianu lun wasaminarun gayara lan wayanuhan hama hilaaña. Íbini ítara, ariñagatu Bíbülia habügürü hilaaña “ibidiñeti ni kata houn, [...] madügǘnti ni kata ñein maritawagún ni kata, úati subudi ni lichú aau ñein” (Apurichihati 9:5, 10).

 Anihán burí lébunabei, mádaragun hama gefentiña luagu Heowá houngua lidoun katei le hani máfianu luma katei burí le aubei hádaragua gürigia houngua hamoun máfianu. Manhatiwa giñe lun isebáhari le gánibei hama zombis, ha achuuhabaña hitaü luma katei hámagiñeti máfianu (fenómenos paranormales). Ariñagatu María aban nibureintu libügürü katei le: “Anhein anihein lubei somu katei le gániti luma katei le aubei hádaragun gürigia houngua hamoun máfianu, moun lumuti narihini”. a

•   Disebá luéi sun luwuyeri isebáhari o katei le aubei hádaragua gürigia houngua hamoun máfianu, lun madurun ban ligibugiñe Bungiu (Adügaü 24:16).

•   Lunti báguduni furumiñeguarügü bumégen le gániti hama máfianu. Aliihabei Adügaü 19:19, 20 ani arihibei lubuidun hénpulu le híchugubei kristianugu lánina furumiñeti sígulu woun.

 Haritaguabei le: Ánhabu adiseda luéi isebáhari le gániti luma katei le aubei hádaragua gürigia houngua hamoun máfianu, luéigiñe badibu lóubadina Heowá. Ani ítara luba bagundaaragüdüni (Ariñawagúni 27:11).