Sanditibu san siñá lan bun? Anhein ítara liña lubéi, líderagubadibu arütíkulu le.

•  Ka adügübei lun basandiragun bungua ítara?

•  Ka uagu súdini lubéi?

•  Le gayaraabei badügüni

•  Le hariñagubei amu nibureintiña

•   Gíbeya lan le lunbei badügüni. Ariñagatu aban nibureintu gíritu Julie: “Lidan sun le wadügübei, ariñawagúati woun súnwandan mosu lan wáfaagun lun buídutima lan wadügüni, lun wadügün lóugiñe le wayaraabei adüga, wayumahan wadügün katei wéirigutimati luma wibihin katei le buídutimati. Hanarimeti lénrengun lawinwandúniwa lau sun ihürügu le!”

•   Gágamuru, konputadora o katei líbeina lira. Adügati gágamuru tuma ámuñegueinarügü tuwuyeri konputadora lun gayara lan háluahaniwa gürigia 24 oura lidan weyu, sédügubei weyu lidan dimaasu. Gayaraati ladügün katei le lun hanarime lan wadiheri darí lun wasandirun siñá lan woun.

•   Lougua lan barumugun. Ariñagatu aban nibureintu gíritu Miranda: “Adügatu leskuela, isebáhari luma wadagimanu lun héchudun saragu nibureintiña arumuga tarü luma lun saragia hamá”. Gayaraati ladügün échuni le lun labuchadun wawagu saragu.

 Ínchaha tumutiwa Lererun Bungiu lun benefa wamá (Ariñawagúni 6:​6-8; Rómana 12:11). Lau sun lira, mariñaguntu lunti lan wawadigimaridun saragu darí lun metenirun wamá lun le líbiri katei, kéiburi lun wátuadi.

 “Aban wéiyaasu, aba níchugun fe méigingidina lan meha sun weyu ladüga nerederun etenira lun sun dasi le unbei nánhara. Furendeitina mabuidun lan bánharun lun sun dasi le ichugúbei bun dan létima adüga lan lun lagadeirun bátuadi” (Ashley).

 Ligía tariñagunbei Lererun Bungiu: “Buítimati ounli wínwangili sügǘ lau liñún hilaali” (Apurichihati 9:4). Dan bafosuragun bungua lun badügün saragu katei, másiñati sandigua ban bungua kei aban liñún íbini luágurügü fiu dan. Ánheinti abuchada buagu saragu, gayaraabei lagadeirun bátuadi.

•   Manharabá lun sun katei. Ariñagatu Lererun Bungiu: “Hámañein ǘnabugubutiña lichú aau” (Ariñawagúni 11:2). Gabaroun lumuti gürigia le ǘnabugubei halía lan lébeda le liyaraabei adüga ani mánharunti lun sun dasi le ichugúbei lun luéidigia lun le liyaraabei agunfulira.

   “Áfaaguatiña gürigia ha ánharubaña lun sun katei lun hagunfulirun lau sun le amuriahóubei hama ani ligía labuchadunbei saragu hawagu. Mama larufudún ǘnabuguni lira. Ani ítara, lachülürüba dan lun hanarimeya lan basandirun lubucha uagu” (Jordan).

•   Emeraaguabá buidu. Ariñagatu Lererun Bungiu: “Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (Apurichihati 4:6). Ariñawagúaali ítara liña lan arumuguni kei “bíchugun éigini lun bisesun”. Lau sun mosu lan harumugun nibureintiña kéiburi widü o diisi oura sagü guñoun, madügün hamuti hiibe-agei hádangiñe.

   “Marumuguntina meha buidu dan ñein lan saragu katei numa tidan nilisütan le lunti nadügüni. Ani anihein meha dan buídurügü lan lun narumugun aban oura lanwoun le narumugubei sagü weyu lun héretima nan luma lun narugadun lau ugundani” (Brooklyn).

•   Adügabá aban lísüta lau sun le lunbei badügüni. Ariñagatu Lererun Bungiu: “Aransehani le saminawati buidu, buiti lasalirun” (Ariñawagúni 21:5). Furendeibá ahandilihei bidaani ani anúadirabei le biyaraabei adüga, leseriwiduba katei le bun lidan sun bibagari.

   “Gayaraati wagidaruni liibe-agei lídangiñe lubucha uagu le wasandirubei lau wadügün aban lísüta lau sun le lunbei wadügüni. Dan le barihini sun le lunbei badügüni bürüwañu ménrenguntimati bun lun badügün asansiruni lun mabuchadun lan buagu saragu” (Vanessa).