“Dan le naranseraguña lan nungua binaafin, aganbahatina músika. Aganbahatina giñe músika dan le nabugahaña lan, dan le múnada nan, dan le nemeraaguña lan, dan le narumadahaña lan íbini dan le naliihahaña lan. Súnwandan naganbahañein lan numusikan” (Carla).

 Agia buguya, wéiriti san línsiñe músika bun kei tun Carla? Anhein ítara liña lubéi, líderagubadibu ariñahani le lúntima línsiñedun músika bun, lun banúadahani músika buidu luma lun badisedun luéi denchaü.

•  Buiti le lanügübei

•  Peliguru le lanügübei

•  Le hasaminarubei amu nibureintiña

 Gayaraati wariñagun ítara liña lan músika kei éigini. Ítara kei súdini lan wanúadiruni éigini le lunbei wéigini luma átiribei lan, lunti giñe wanúadiruni kaba lan luwuyeri músika waganbaha luma átiribei lan dan wau aganbahei. Samina humá luagu le:

•   Gayaraati labuiduragüdüni músika ligaburi basandiragun bungua.

   “Dan le wuriba lan nuéyuri, aba naganbahani músika létima hínsiñebei nun, ani aba labuidurun nasandiragun nungua” (Mark).

•   Adügati músika lunya baritaguni lubuidun dan.

   “Gíbeti uremu adügati lun naritagun luagun katei buiti ani dan le naganbahani aba nagundaarun” (Sheila).

•   Óundaraguagüdati músika saragu gürigia.

   “Lidan aban adamurini hani gefentiña luagu Heowá le ídanbei hóundaragua íbirigu lídangiñetiña ámuñegueinarügü ageiraü, dan le heremuhanbalin lílana adamurini lagumuhóun uremu, aba nayahun. Íbini ámuñegueinarügü lan iñeñein wayanuhabei, óundaragua lumutiwa músika” (Tammy).

•   Gayaraati líderagunibu músika lun labuidurun bigaburi.

   “Lun bafurendeirun áfara músika, mégeitibu basayahan saragu lau gurasu. Mama aban katei le afurendeirúbei lau lóufudagun. Mosu badügüni sagü weyu” (Anna).

 Subuditi san katei le bun? Subuditi san bun lóundaragun lan 150 uremu líburu to migifetimaboun tidan Bíbülia, to gíriboun Sálumu.

 Ítara kei aban éigini le gádeihali, gayaraati giñe léiguadun músika bun wuriba. Saminabá san:

•   Le ariñawagúbei lidan saragu uremu luagu magíaguni layanuha.

   “Genegeti sun lan uremu létima aganbahóubei uguñe weyu mosu layanuhan luagu agamariduni. Móuchungubeitiña haramuduni” (Hannah).

   Ariñagatu Bíbülia: “Moun lumuti ni lun hadimurehan luagu salufuri, ni amu luwuyeri iwiyei, ni igaaduaü” (Éfesuna 5:3). Álügüdaguaba bungua: “Adügati san uremu le naganbahabei lun siñá lan nafalaruni adundehani le?”.

•   Anihein músika ruti maguraasuni.

   “Anihein dan aba narounrun gabanarugu guñoun aganbaha uremu le adügati lun naritagun luagun katei le híruti, le adügati lun nadiheridun luma lun maguraasun nan. Adügati músika le híruti lun nasaminarun luagun katei wuribati” (Tammy).

   Ariñagatu Bíbülia: “Lídangiñe sun katei ubouagu, góunigiboun banigi” (Ariñawagúni 4:23). Álügüdaguaba bungua: “Aba san nagumeserun asaminara wuriba dan le naganbahan somu músika?”.

•   Anihein músika adügati lun furunde hamá gürigia.

   “Músika le adügübei lun hagañidun gürigia luma lun hasandirun iyereehabúni íbini hawougua, peligurutimati sügǘ lau le hasaminarubei. Subuditi nun dan le lan naganbahani luwuyeri músika le, aba lasansirun nigaburi, ani íbini niduheñu rúhaña fe luagu” (John).

   Ariñagatu Bíbülia: “Ánheinti guentó, ígira huméi sun burí katei le: Igañi, iyereehabúni, wuribani, anabahani, luma burí dimurei wíyeti” (Kolosana 3:8). Álügüdaguaba bungua: “Lárigiñe naganbahan somu músika, arihatina san aba lan furunde nan o aban lan meberesen nan lau le hasandirubei amu?”.

 Kaba wariñaga: Anúadirabei músika le lunbei baganbahani buidu. Ligía tálugubei aban nibureintu gíritu Julie lun tadügüni. Ariñagatu: “Súnwandan náguyuguagüdüni músika le númabei, ani dan le narihin mabuidun lan somu lídangiñe, aba nagidaruni ñéingiñe. Íbini anihein lan dan hénrengu lan nun nadügüni, subudi numuti ligía lan lunbei nadügüni”.

 Tafurendeiruña giñe aban nibureintu gíritu Tara adügei ligiaméme. Ariñagatu: “Anihein dan lichugún somu uremu tidan radiu le erederubei nichügüwagu lau lóufudagun, ani dan le nararamagun aganbei lila, aba níchugun fe mosu lan nagidaruni ñéingiñe. Ítara liña kamá hamuga báguruña aban fein semeetu lidoun ifei lárigiñe bóuchunu. Ligíati, anhein here nubéi lun namahadun lun aban uremu le adimurehabei luagu agamariduni, másiñati hérebadina lan giñe lun marounrun nan luma aban gürigia lubaragiñe namarieidun. Mabusenruntina narufudun meberesehabuni lun le ladügübei uremu nun”.