Damuriguatiña gefentiña luagu Heowá bián wéiyaasu luagu dimaasu tidan Luban Hadamuridagun. Ka adügǘbei ñein ani kaba buiti bibiha ánhabu ñüdün lidoun adamuridaguni?

•  Ka adügǘbei tidan Luban Hadamuridagun gefentiña luagu Heowá?

•  Ka uagu buidu lubéi hamuga lun bidin?

•  Le hariñagubei amu nibureintiña

 Aban fulasu Luban Hadamuridagun gefentiña luagu Heowá lánina arufudahani le ñein lubéi lichugúa adundehani lun ladügǘniwa le tariñagubei Lererun Bungiu. Líderagubadibu adamuridaguni le adügǘbei ñein lun:

•   bafurendeiruni inarüni luagu Bungiu.

•   gunfuranda bani katei burí le asuseredubei uguñe.

•   buídutima lan bigaburi.

•    badarirun umadagu buítiña.

 Subuditi san bun? Wáwati lun fulasu le ñein lubéi hadamuridagua Gefentiña, Luban Hadamuridagun gefentiña luagu Heowá, ladüga luágutima Larúeihan Bungiu layanuhóua ñein (Matéu 6:​9, 10; 24:14; Lúkasi 4:​43).

 Líderagubadibu ariñahani le akutihóubei ñein. Líderagubadibu adundehani tídangiñeti Lererun Bungiu le akutihóubei lidan hadamurin Gefentiña ibiha lichú aau (Ariñawagúni 4:5). Mini lan lira gayara lan tíderagunibu Lererun Bungiu anúadaha buidu lidan bibagari. Gayaraati giñe tíderagunibu adarira lóunabagüle fiu álügüdahani súdiniti, kéiburi:

•   Ka lisuunibei ibagari?

•   Bungiu san adügübei lun wasufurirun?

•   Anihein san ibagari lárigiñe óunweni?

 Anihán burí liri fiu yanu le ichugúbei lidan adamurini le adügǘbei samudi o dimaasu:

•   Ka uagu lunti lubéi wígirun lun tadundehaniwa Bíbülia?

•   Kaba san úmoun woudin dan le nidiheri wamá?

•   Ka ladügübei Larúeihan Bungiu wawagu?

 “Chülüti aban nupaaná tídangiñe leskuela lidoun adamuridaguni. Aba lañuurun hama niduheñu ani aba waliihan úara tídangiñe líburu. Lárigiñe, aba lariñagun wéirigüda lanu óunabagülei le híchugubei gürigia lanigi. Ani ariñagati giñe uá lan ariñahani lun aturiahani le wámabei tidan liligilisin” (Brenda).

 Subuditi san bun? Mama mosu bafayeihan lun bebelurun tidan Luban Hadamuridagun gefentiña luagu Heowá ani mamuriahóunti seinsu ñein.

 Híchuguba gürigia ha lúnbaña basubudirun gurasu bun. Ariñagatu Lererun Bungiu anihán lan aban lídangiñe resun le uágubei wadamuridagua: lun wíchugun gurasu wóuniwagua (Ebüréu 10:24, 25). Lidan ubóu le buinbei hau saragu gürigia ha asaminarubaña hóunguarügü, dan básügürün dan hama gürigia ha wéiritimati hebereserun lau Bungiu luma hau amu sügǘ lau hawougua sanditibu gurasu.

 “Anihein dan aba nasandirun íruni luma lubucha uagun lárigiñe násügürüni sun weyu, Iau sun lira, adügatiña gürigia ha ñǘdünbaña tidan Luban Hadamuridagun gefentiña luagu Heowá lun buídutima lan nasandiragun nungua. Gúndaatina dan le nachülürün núbiñe lárigiñe adamuridaguni ani sanditina aranseedina lan lun amu weyu” (Elisa).

 Subuditi san bun? Lidan sun ubóu, anihein lóugiñe 120,000 damuriguaü hani gefentiña luagu Heowá ani anuhein lóugiñe 60,000 Luban Hadamuridagun. Adügǘwatu kéiburi 1,500 Luban Hadamuridagun Gefentiña sagü irumu lugundun laganwounduña hanumerun gürigia ha achülürübaña tidan. a