Gürigia le uágubei gayara lan lafiñerúniwa, súnwandan inebehabu lan lun lúrudu, gúnfuli lumuti lererun ani súnwandan lariñaguni inarüni. Ítara liña libihin lun hafiñerun lagübürigu, lumadagu hama liyubudirigu luagu.

Liibe-agei dan, lun gayara lan bigirúniwa lun badügün saragu katei, mosu barufuduni gayara lan lafiñerúniwa buagu.

“Ménrenguntimabei hafiñerun bagübürigu buagu ánhabu óusera kei aban gürigia le derebuguhali lisaminan sun oura, mámarügü dan le hagibugiñeñadibu lan” (Sarahi).

ADUNDEHANI TÍDANGIÑETI BÍBÜLIA: “Hóuchagua humá hungua” (2 Korintuna 13:5).

Líderagubadibu adundehani burí le lunya hafiñerun bagübürigu buagu o lúntima hafiñerun buagu.

Ariñagabéi inarüni súnwandan. Ánhabu ariñaga iyeeni, furesebei heferidiruni gürigia hafiñen buagu. Ánheinti bariñaga inarüni súnwandan, ani óusera buguya lau arumani dántima le adügaadibu lan somu charati, hafiñeruba ha híbiri gürigia buagu.

“Lau sun ménrengun lan lariñawagún inarüni dan le lanügüba lan buiti bun, adügatimati lun hafiñerun gürigia buagu dan le bariñaguni inarüni íbini dan le gayaraabei lan lanügün lira turobuli bun” (Caiman).

ADUNDEHANI TÍDANGIÑETI BÍBÜLIA: “Kei busén wabéi buidu lan wóuserun lidan sun katei” (Ebüréu 13:​18).

Gunfulibá lau dasi le ichugúbei bun. Arufudati aban aturiahani le adügǘbei Meriga, ariñaga hamá 78 % gürigia ha íchugubaña wadagimanu tidan burí kónpeni larufudun lan gürigia luagu gúnfuli lan lau le agurabúbei lúmagiñe “ábanbei lídangiñe ǘrüwa katei létima mégeiwabei lun lichugún furumiñeguarügü wadagimanu lun”. Ánhabu lubeiti agunfulira guentó lau sun dasi le ichugúbei bun, líderagubadibu lira danme le baweiridun.

“Anhein nadüga katei sin lariñawagún nun saragu wéiyaasu, rútiña nagübürigu fe. Éibutima nagunfulirun lau le agurabúbei númagiñe, ábatima hafiñerun nuagu” (Sarah).

ADUNDEHANI TÍDANGIÑETI BÍBÜLIA: Chóurutina “luagu baganbadi, ani subuditi nun luagu badügüba lan sügǘ lau le uágubei namuriaha buma” (Filemón 21).

Gaguraasunbá. Ménrengunti larihíniwa linchun lúgubu aban gürigia, ánheinti larihíniwa anhein derebuguhali lubéi lisaminan, barüti dan.

“Siñabei badügün lun hafiñerun bagübürigu o amu gürigia buagu lidan murusun dan, lau sun lira, ánhabu etenira lun burí bani buligasion súnwandan, éibume lásügürün dan, ábatimaame hafiñerun buagu” (Brandon).

ADUNDEHANI TÍDANGIÑETI BÍBÜLIA: “Abagarida humá keisi lánigu, lau [...] gaguraasuni” (Kolosana 3:​12).