HOUN NIBUREINTIÑA
9. Subudiguabá bungua
KA MINI LUBÉI?
Katei burí le adügübei lun buguya lan buguya, mini lan, kátañadibu lan, mámarügüñein luma biri o ligaburi baríawagun gani lan, gániti giñe luma bigaburi, bafiñen luma ligaburi badügüni katei.
KA UAGU LUNTI LUBÉI BADÜGÜNI?
Dan le subudigua ban bungua ani úaraguatibu lun bafiñen, mígiruntibu lun hahandilihanibu amu nibureintiña.
“Gíbetiña gürigia ítara haña kamá pichingu, siñaguatiña houngua lun hanúadiruni ni kaba lan daüguaü hadaüra” (Adrian).
“Furendeihadina adügei le nasubudirubei ligía lan buídubei íbini dan le hénrengu lan. Gayaraati nasubudiruni kátaña lan numadagubaña ha tímatimaatiña luagu ligaburi hóuserun luma ligaburi nóuserun dan le hama nan” (Courtney).
ADUNDEHANI TÍDANGIÑETI BÍBÜLIA: “Hebé habagaridun keisi lirahüñü ubóu le; lubaragiñe lira, sansi huméi ligaburi hisaminan” (Rómana 12:2).
KA GAYARAABEI BADÜGÜNI?
Lun basubudiruni kátañadibu lan guentó luma ida buba lan ámuñegü, arihabéi ka lan biyaraabei luma le básiñarubei adüga, lau sun le bafiñerubei. Gayaraati bagumeserun lau badügüni álügüdahani burí le búniwagua.
Le biyaraabei adüga: “Ka niyaraabei adüga? Ka idan buidu nan? Ragüguatina san nungua? Chülügiaheitina san, benefatina san odi gíchigaditina? Ka burí katei nadügübei buidu?”.
LE GAYARAABEI BADÜGÜNI: Anhein hénrengu lubéi bun basubudiruni ka lan idan buidu ban, álügüdabaña bagübürigu o aban bumada.
ADUNDEHANI TÍDANGIÑETI BÍBÜLIA: “Kada aban gürigia lunti laríaagun lungua ida liña lan ligaburi lóuserun. Ánheinti adariragua lungua buíduñu, gayaraati lanaagun lungua luagu le ladügübei, metenirunga lun le hadügübei amu” (Galasiana 6:4).
Le siñá bubéi adüga: “Ka lídangiñe igaburi le nuágubei lunbei nabuiduragüdüni? Lidan burí ka kesi nabusenra nadügüni le wuribabei? Lidan burí ka sügǘ ídanbei nemegeira lúntima nárügüdagun nungua?”.
ADUNDEHANI TÍDANGIÑETI BÍBÜLIA: “Ánhawa ariñaga luagu mafigoun wamá, weyeedaguña woungua” (1 Huan 1:8).
Le bafiñerubei: “Ka échuni adundehabalin nibagari, ani ka uagu? Afiñetina san luagu Bungiu? Ida liña nasubudiruni anihein lan Bungiu? Ka katei genegebei nun maricha lan, ani ka uagu? Ka nasaminarubei luagun dan le lunbei liabin?”.
ADUNDEHANI TÍDANGIÑETI BÍBÜLIA: “Lóunigirubadibu lichú bau luma gunfurandaü le bídanbei súnwandan” (Ariñawagúni 2:11).
Háfuga hínsiñebei lan giñe le hun
LÓUNABAGÜLE 10 HÁLÜGÜDAHAN NIBUREINTIÑA
Kátana san?
Líderagubadibu basubudiruni bigaburi le buídubei luma le wuribabei ítara kei ka lan babusenrubei luma ka lan súdinibei bun lun desidírü ban buidu danme le basandirun hadügüdaruña lan amu buagu.
