Aban gürigia le benefati, méibaagunti luéi wadagimanu, lubaragiñe lira, wéiriti línsiñe wadagimanu lun lun gayara lan lanuriagun lungua luma lun líderaguniña amu, íbini adüga lan wadagimanu le manügünti uéiriguni lun.

Hínsiñe lan yebe woun o mínsiñe lan, buin liña ibagari lau buligasion. Keiti mínsiñe lubéi houn hiibe-agei gürigia lun hadügün wadagimanu dereti, barüti benefa ban buiti bun (Apurichihati 3:​13).

“Dan le nawadigimaridun saragu, adügati lun buidu lan nasandiragun nungua. Ligíati, eibu lásügürün dan, ábatima ínsiñedeina lan wadagimanu nun. Dan le buidu lan ligaburi bawadigimaridun, adügati lun buidu lan layanuhóun buagu” (Reyon).

ADUNDEHANI TÍDANGIÑETI BÍBÜLIA: “Sagawati katei buiti lídangiñe sun áfaaguni” (Ariñawagúni 14:​23).

Líderagubadibu adundehani burí le lun buidu lan ligaburi barihini wadagimanu.

Furendeibá adügei katei keisi lubudubu. Tenibá lun le badügübei, meberesenga anhein badügüña lubéi fisiu múnada, leskuelarugu o lidan buadigimari. Anhein furendeibaali lubéi ladügǘn aban wadagimanu buidu, aluahabá ida luba lan buídutima lan ani furesetima lan badügüni. Éibutima buidu lan badügüni wadagimanu ligía, éibutimaame línsiñedun bun.

ADUNDEHANI TÍDANGIÑETI BÍBÜLIA: “Ha adügütiña hawadigimari buidu, heseriwiduba houn urúeigu, mama houn furumiñeguarügü gürigia” (Ariñawagúni 22:​29).

Saminabá hawagun ha híbiri. Liibe-agei dan, dan le bagunfulirun lau bidasin buidu, sagatiña amu gürigia buiti lídangiñe. Kéiburi dan le bagunfulirun lau fisiu le ichugúbei bun múnada, ídehatibu lun lawalidagun hanügün ha híbiri tílana huban.

ADUNDEHANI TÍDANGIÑETI BÍBÜLIA: Gúndaatimati le íchugubei sügǘ lau le eresibirubei (Adügaü 20:​35, Lererun Bungiu to lánina Iseri Daradu).

Adügabá lóugiñe le amuriahóubei buma. Mámarügüla le amuriahóubei buma badüga, adügabá murusun lanwoun. Ítarati, barufudubei buguya lan anúadirubalin kaba lan badüga lidan bibagari. Lau sun gíbetimabei lan badüga, badügüñeinme ladüga busén ban, mama ladüga bafosurúña lan (Matéu 5:​41).

ADUNDEHANI TÍDANGIÑETI BÍBÜLIA: “Lun mama lan lauti afosuruni fulesei le badügübei […] lun lauti lan bugundan guánarügü” (Filemón 14).

Masügürabá. Úati mini lan benefa ban, hanarimebei lan bíchaagun bungua lun wadagimanu. Mosu báfaagun lun barihini katei keisi lubudubu lau badireirun dan dandu lun bawadigimaridun kei lun bemeraagun.

ADUNDEHANI TÍDANGIÑETI BÍBÜLIA: “Buítimati aban úhabu buin lau emeraaguni sügǘ lau biama lau lubucha uagu ladügarügü labusenrun lárügüdüni garabali” (Apurichihati 4:6).