Maríeitiña ha nadagimeinbaña úara, ítara haña kei aban abugahati awión luma le íderagubalin dan le haweiyasuhaña lan lidoun ábanmeme fulasu. Masaminaruntiña hawouguounrügü, lubaragiñe lira, saminatiña luagun le buídutimabei houn biángubei, íbini dan le liábingua lénrengunga.

ADUNDEHANI TÍDANGIÑETI BÍBÜLIA: “Mámaaña lubeiti biama, ábanrügaaña” (Matéu 19:6).

“Mosu hídehan biángubei lun buidu lan léibugun katei lidan habagari keisi maríeitiña” (Christopher).

Dan le mawadigimaridun hamá maríeitiña lidan aban, aba líchuguni aban duru luagun le aban dan le hadunragun luma somu turobuli, lubaragiñe hamuga háluahan haransehani, ábati laweiridagun turobuli le yebe maweirinbei.

“Mégeitiña maríeitiña hawadigimaridun lidan aban. Lun hamuga mawadigimariduntiwa úara luma nani weiriei, ítara luba hamuga kéigubeirügü wínwanrügütiwa wámagua: bián gürigia ha awinwandubaña úara, labu sun lira mayanuhantiña hámagua lubaragiñe hanúadiruni kaba lan hadüga” (Alexandra).

ARÍAGUA HUMÁ HUNGUA

• Saminatün san hánirügüñein lan seinsu le hagañeirubei?

• Mégeitün san ua tan hani weiriou lun hasandiragun hungua darangilañu?

• Lóuguati san hanaagun hungua hama tiduheñu hani weiriou íbini buidu lan tanaagun tungua hama?

LUN HAYANUHAN HÚMAGUA

• Lídangiñe sun le wadügübei keisi maríeitiña, ka idan wemegeira buídutima lan wawadigimaridun lidan aban?

• Ka lunbei wadügüni lúntima buidu lan wadügüni katei?

• Ka gayaraabei wadügüni lun buídutima lan wawadigimaridun úara?

LE GAYARAABEI HADÜGÜNI

• Samina humá ítara liña lan maríei kei tahurerúniwa bali. Ka gayaraabei hadügüni lun háhurerun lidan ábanmeme ekipu?

• Lubaragiñe hasaminarun ida luba lan hagañeirun, samina humá ida luba lan hagañeirun huguya biángubei.

“Meberesenga ka lan garichabei. Le wabusenrubei lun ñein lan darangilaü luma úarani lidan wabagari keisi maríeitiña” (Ethan).

ADUNDEHANI TÍDANGIÑETI BÍBÜLIA: “Mámarügüla katei le buídubei hun háluaha, áluaha huméi giñe le buídubei houn amu” (Filipuna 2:3, 4).