HOUN AGÜBÜRIGU
7. Larufudahóun lubuidun igaburi
KA MINI LUBÉI?
Kei agübürigu, anúadiratün hanügüni hibagari según le hasubudirubei buidu lan o wuriba lan. Kei hénpulu, áfaaguatün san lun haruma lan hanügüni hibagari? Anhein ítara liña lubéi, chóuruti háfaaguba lan giñe lun híderaguniña hisaanigu lun ítara hamá.
Gürigia le afalarubalin lúrudu luáguti le buídubei luma le wuribabei, benefati, bereseti hau amu ani úati himei lan aban gürigia luéi aban, ani dan le nibureingili gürigia, ménrenguntimati lafurendeiruni lubuidun burí igaburi le.
ADUNDEHANI TÍDANGIÑETI BÍBÜLIA: “Arufudahabá buiti lun irahü dan le ñǘraügili; íbini danme le wéiyaali mabulieidun lubéi” (Ariñawagúni 22:6).
KA UAGU LUNTI LUBÉI HADÜGÜNI?
Lídantima lidaani teknolohía le lemegeirúa igaburi le. “Gayaraati gamadagua hamá wasaanigu hama gürigia wuribatiña luéigiñe gágamuru tuma konputadora furumiñeguarügü oura —tiña aban úguchuru gíritu Karyn—. Gayaraati ñun haña lan wóubagiñe ani añaha aríagua katei wíyeti”.
ADUNDEHANI TÍDANGIÑETI BÍBÜLIA: “Ha wéinamuhañabaña [subudi hamuti] arufudahani le buídubei lumoun le wuribabei” (Ebüréu 5:14).
Huuti giñe lubuidun umenei. Kéiburi lariñawagún “adüga humá fulesei nun”, “teinki” o “seremei”, lunti giñe warufudun berese wamá hau amu, aban igaburi le lóugaalibei larihíniwa ubouagu, lugundun himei hamagili gürigia hetenirun lun hagagamurun sügǘ lau hetenirun houn amu.
ADUNDEHANI TÍDANGIÑETI BÍBÜLIA: “Le babusenrubei ladügǘn bun, ligialá badüga houn amu” (Lúkasi 6:31).
KA GAYARAABEI HADÜGÜNI?
Furangulá harufuduni ka lan buídubei lumoun le wuribabei. Anihein aturiahani arufuduti dan le lan furangu lan larufudún houn nibureintiña hábiñe wuriba lan agamariduni mamarieidunga, chóurutimati madügün habéi lan.
LE GAYARAABEI HADÜGÜNI: Yusu humá somu ñunsu le málügili lúmagiñe láfuridun lun hayanuhan hama hisaanigu luagu katei le buídubei lumoun le wuribabei. Kéiburi hamuga anhaün aganba ínchaha laaña lan iyereehabúni gürigia lun hadügün aban wuribani, gayaraati hariñagun: “Ma luriban katei, adián? Ka bisaminanbei luagu? Ka funa san uagu hóusera gürigia ítara?”.
“Lun ménrenguntima lan houn isaanigu hadügüni le buídubei, mosu hasubudiruni furumiñe ka lan buídubei luma ka lan wuribabei” (Brandon).
Arufudaha humá lubuidun umenei houn. Íbini irahüñü hátima ñǘbürigiña gayaraati hafurendeirun eberesera hau amu luma ariñaga “adüga humá fulesei nun”, “teinki” o “seremei”. “Éibutima hasubudiruni irahüñü añahein lan amu gürigia gebegitiña bóugudin hawéi —o ábanrügüñanu lan hádangiñe tílana haban, aban hádangiñe hapanaagu leskuelarugu luma aban hádangiñe lílana fulasu le ídanbei hawinwanda—, aranseñutima haba lun hadügün katei buiti hawagu amu”, tiña líburu to gíriboun Parenting Without Borders (Agübürigu meberesenga ageiraü).
LE GAYARAABEI HADÜGÜNI: Ru humá hafisiute hisaanigu lun hafurendeiruni lunti lan híderaguniña amu.
“Ánhaña afurendeira hisaanigu adüga fisiu hábiñe, maweirinbei hadiheridun danme le hóunguaaña lan. Héchuhañame agunfulira lau hani buligasion” (Tara).
