Ínchaha tumutiña Óundaruni hani Néchanigu sun gürigia ídeha hámagua, lun inebehabu hamá lun haricha amu luma lun hóunigiruni ubóu, duna, garabali o katei líbeina lira. Ka uagu? Ladüga kei lariñaguni Maher Nasser tidan garüdia Crónica ONU, “sánsiguati ligaburi dan, óundaragu haña wuribatiña lun hadaagun wuribani, laganwounduña marichaü lidan luáguti lafanreinhóun irisini, anihein sigenei le maranserúnwati, háguyuña saragu gürigia lídangiñe aban fulasu lidoun amu, anihein anarimeni le aubei hadüga wuribatiña lun habuinchun gürigia lau anufudei, anihein giñe sandi galugurahati o katei líbeina lira, meberesenga ka lan wageirabei”.

Díseeli giñe hárigi amu lau háfaagun lun ñein lan aban arúeihani le lídanti sun ubóu, kéiburi abürühati poema, polítiku ani sásaamu italiana le gíribei Dante (1265-1321) luma aban aturiahati siensia gíriti Albert Einstein (1879-1955). Ariñagati Dante siñabei lan wawinwandun lidan darangilaü lidan aban ubóu le fánreinguañu liña ladüga polítika. Ábati líriduni le lariñagubei Hesusu: “Arúeihani le afanreinraguti lun hageindagun hámagua, lagünrinchaguba” (Lúkasi 11:17).

Murusunbei dan lárigiñe taduurúniwa bián áruma wéiriti tubafu lidan Libiaman Wuribu Wéiriti, aba labürühan Albert Einstein aban gárada houn lílana Adamurini tánina Óundaruni hani Néchanigu, to meha gayaraaboun laliihanu furumiñeguarügü gürigia. Ariñagati tidan: “Lílana Óundaruni hani Néchanigu, mosu hánhingichun lau lóufudagun ibiha humaamuga lun ñein lan sun le mégeiwabei lun gayara lan lagumeserun aban arúeihani le lídanti sun ubóu, le gabafuti lun líchugun ichouruni houn lílana burí ageiraü”.

Kati gayaraabei lachoururagüdüni woun móuserunbaña lan hamuga polítiku ha lúnbaña harihin lau arúeihani gabafuti ligía lau iwiyei, gayaraaguabaña lan houngua ani úabei lan deregüda lan halurudun? Ma harufuduñein hamuga giñe luriban burí igaburi le kamanibei hadan ha híbiri? Haritaguagüda lumutiwa álügüdahani burí le luagu aban wügüri gürán büretáñana gíriti Lord Acton, le abürühabei luagu dan le sügühalibei ani ariñagati: “Gádeiti ubafu gürigia, ani gürigia le unti lichugúa sun ubafu gádeiti sunsuinagubei”.

Anhein busén habéi gürigia darangilaü inarüniti, mosu lidan hamá aban súngubei. Ida lubati habihini? Gayaraati san lagurabúniwa lasusereduba lan lira? Ariñagatu Lererun Bungiu gayara lan ani ligíaba lan asusereda. Ida? Miábinbei darangilaü le lídangiñe harúeihan polítiku gafigountiña, ábanbei arúeihani le adüga láalibei Bungiu ibihei. Larufudubei arúeihani le, Búngiurügüñein lan garicha lun larúeihan luagu sun le adüga láalibei. Ani tidan Bíbülia wáwati lun arúeihani le: “Larúeihan Bungiu” (Lúkasi 4:43).

Layanuhaña meha Hesusu luagu arúeihani ligía dan lariñagunbei lidan furíeigi le gíribei Wáguchi Bungiu: “Ñǘbuinla barúeihan; adügüwalá bugundan ya ubouagu” (Matéu 6:9, 10). Ítara liña, ladügüba Larúeihan Bungiu lun chouru lan lagunfulirun lugundan Bungiu ubouagu, mama le habusenrubei gürigia ha busenbaña buiti hóunguarügü hama ha ayumahabaña lun gabafu hamá.

Wáwati giñe lun arúeihani le: Larúeihan Bungiu le siélubei (Matéu 5:3). Ka uagu? Ladüga íbini lagumadirubei lan Ubóu, siélugiñeba lagumadiha, mama ubouagugiñe. Samina humá luagu leme lunbei mini lan katei lira. Memegeirunbei arúeihani lídanti sun ubóu le lun lafayeihóun liseinsuna gumadi. Mame lueirin awalidaguni le lunbei hasandiruni gürigia ha lúnbaña hawinwandun lábugiñe!

Kei larufuduni dimurei arúeihani, garúeiteti Larúeihan Bungiu, Hesukrístu lurúeitebei. Rúhali Bungiu  ubafu lun lun larúeihan. Ariñagatu Lererun Bungiu luagu Hesusu:

• “Le unbei lichugúa ubafu lun lagumadihan [...]; lachawaraguba lubafu le lánina larúeihan lidoun sun fulasu ani magumuchadibei darangilaü” (Isaíasi 9:6, 7).

• “Aba líchugun ubafu luma uéiriguni luma arúeihani lun, aba heseriwidun sun néchanigu lun” (Danieli 7:14).

• “Lánihali Bungiu luma Kristu larúeihan ubóu; ani harúeihaba lun sun dan” (Arufudúni 11:15).

Ladügüba Larúeihan Bungiu lun ladügǘniwa lugundan Bungiu ubouagu, ítara luba lagunfulirun dimurei burí le lídanbei furíei le gíribei Wáguchi Bungiu. Lídounme dan ligía, buin luba ubóu lau ibagari, lugundun furendei hañame sun gürigia óunigirei buidu.

Ani le súdinitimabei, lídanme Larúeihan Bungiu larufudahóuba houn sun ha lúnbaña hawinwandun lábugiñe. Larufudahóuba houn sun gürigia lun inebehabu hamá lun ligiaméme lúrudu. Úabei ageindaguni ni fánreinguaü. Ariñagati Isaíasi 11:9: “Úabei adügüti wuribati [...], ladüga ítara kei labuinchagüdüni duna barana, ítara luba labuinchun sun fulasu lau lasubudirúniwa luéirigun Wabureme”.

Lídanbaña úarani sun lílana Ubóu ani hawinwanduba lidan darangilaü, aban katei le tásiñarubei Óundaruni hani Néchanigu ibiha. Ariñagati Sálumu 37:11: “Habagariduba lidan darangilaü le dayarüti”. Éibume lásügürün dan, mayusurun háadiwame dimurei kéiburi wuribani, lawiyedún ubóu, gudemei o wuribu. Ídabati lasusereda sun le? Ídaba lagumesera Larúeihan Bungiu agumadihei ubóu? Ida luba ladügüni? Ka buiti gayaraabei lanügüni Larúeihan Bungiu hun? Ariha waméi lidan leweñegua arütíkulu.