Lidan aban wéiyaasu le adügǘbei tídangiñe aban leskuela, iridahóuatiña fiu nibureintiña luagu háguragun aban hapaaná, wügüri háledi. Haturiahaña meha sun hagía tidan aban luban furendei to fáyeiwarügütu ani súdinitu ageiraü Kanadá. Lárigiñe sügǘ le, abürühati Leonard Stern tidan periodiku Ottawa Citizen: “Ni lualin ichügü, ni furendei ni hagüriarúniwa hadan rísitiña, meredehan lumutiña nibureintiña luéi hadaagun katei wuribati”.

Ariñagati giñe Stern lidan arütíkulu le labürüdübei: “Agurabúati yebe lun súdinitima lan houn agübürigu lun hafurendeiruni hasaanigu ka lan buídubei lumoun le wuribabei. Lubaragiñe lira, genegeti luágutima lan buidu lan lidin houn hasaanigu leskuelarugu luma hadarirun isaanigu hagía wadagimanu le fáyeiti aubei heberesera agübürigu”.

Inarüni súdini lan aturiahani, íbini ítara, ka lan yebe buidu lan furendei le ibihúbei leskuelarugu, siñati líderaguni gürigia ageindagua luma luriban layumahan o luriban ligaburi. Ka luwuyeri arufudahani gayaraabei líderaguniwa lun haruma lan wabagari?

Ítara tiña Lererun Bungiu kei aban isubusei. Dan le waliihanu, gayaraati wasubudiruni halía lan lébeda le wayaraabei adüga luma ka lan igaburi wuribabei wawagu (Santiagu 1:23-25). Íderagua tumutiwa giñe Lererun Bungiu asansira luma áyeiha igaburi le ídehati lun ñein lan darangilaü luma úarani, kéiburi areiduni, gamadóuni, gaguraasuni, ragüguaü unguaü luma ínsiñeni. Ariñagatu Lererun Bungiu ínsiñeni lan “íchugubalin sun katei lidan aban” (Kolosana 3:14). Ka adügübei lun aban lan igaburi espechaliti ínsiñeni? Teni humá lun le tariñagubei Lererun Bungiu luagu igaburi le.

• “Le hínsiñehabubei gaguraasunti, areidati, ani magimuganti; mapantanti, manaagun ligía lungua. Manarimeguti, mámarügüñein luougua laritagua; magañidunti, máguyugüdünti wuribani luagu wuribani. Magundaarunti lau marichaü, lagundaarun lau inarüni. Súfuri lumuti le hínsiñehabubei sun katei [...]; ani awanda lumuti giñe sun katei. Magumuchagunbei ínsiñeni” (1 Korintuna 13:4-8).

• “Le hínsiñehabubei, madügünti wuribati lun ni aban” (Rómana 13:10).

• “Lóugiñe sun katei, ñeinlá saragu ínsiñeni hidan houn híbirigu; lugundun daruguati ínsiñeni lau saragu figóu” (1 Féduru 4:8).

Ma inarüni darangilu lan ani chouru ligía wasandiragun woungua dan le hádanñadiwa lan wamadagu o waduheñu? Susereti lira ladüga subudi wamani busén hamá buiti woun ani mabuseerun hamá hadügün wuribati woun.

Adügati giñe ínsiñeni lun wadügün sákürifisiu luma lun wasansiruni ligaburi wawinwandun. Kei lasuseredun lun aban gürigia le unbei wagúara George, wéiriti meha labusenrun lásügürün dan luma libari le sun líñabei lágurahoun. Keiti weiri lan meha lagumulahan George, máhati meha libarimu lun lagumulahan yarafa lun irahü ligía. Ka ladügübei George? Lau sun meha barühali lan dimí-san irumu agumulaha, ígira lumuti luriban échuni ligía lun gayara lan lásügürün dan luma libari. Wéiriti lubafu ínsiñeni!, adián?

Furendeiwarügüti ínsiñeni, ani agübürigutima  lúnbaña harufudahan houn hasaanigu lun hínsiñehabu hamá. Rútiña heigin, góunigi hamutiña ani ténitiña houn dan le habuleseirun o hasandirun. Ayanuhatiña agübürigu buítiña hama hasaanigu ani arufudahatiña houn. Eweridihatiña giñe houn ani arufudaha hamuti le buídubei lumoun le wuribabei houn. Ani rútiña aban buiti hénpulu houn.

Híruti añahein lan agübürigu ha magunfuliruntiña lau hani buligasion. Mini lan san lira ua lan emenigini houn hasaanigu? Uá. Añaheinhaña gürigia, ha meha magüriahounbaña keisi lubudubu, ha adügaaña óunwenbu burí asansiruni lidan habagari ani guentó hínsiñehabuhaaña, gayara ligía lafiñerúniwa hawagu. Íbini meha ha genegebei máraninaali lan hawaguti, ibihaaña hasansirun, keime warihini lidan leweñegua arütíkulu.