Larúeihan Bungiu, ligía arúeihani lídanti sun ubóu le lǘhadiwabei agurabaha, ani málühali adüga lun wawinwandun súngubei lidan darangilaü luma úarani. Kei füramase lani Sálumu 72:7, ñeinbei “saragu darangilaü” ubouagu. Ídabati lagumesera Larúeihan Bungiu agumadiha? Ida luba ladügüni? Ani ka buiti gayaraabei lanügüni Larúeihan Bungiu hun?

Ariñagaaru meha Lererun Bungiu lasusereduba lan burí katei hanarimeguti ani ligíaba lan “liseinin” yarafaali lan liabin Larúeihan Bungiu. Lidan burí seini ligía iridúati wuribu hadan burí néchanigu, ilamaü, sandi, saragu hárabaganali luma laganwoundun wuribani (Matéu 24:3, 7, 12; Lúkasi 21:11; Arufudúni 6:2-8).

Ariñagati amu profesía: “Lunti giñe basubudiruni luagu liábinburiba lan weyu hénrenguti lídounme lagumuhóun dan. Ladüga hóunguarügübei burí gürigia habusenra buiti, hínsiñebei seinsu houn, [...] maganbunhabaña hagübürigu, meteingiradibaña, minebenme katei lánina Bungiu houn. Mínsiñehabubaña, magudemehabu, marasualugubaña, siñabei hárügüdagun houngua, hanarimebaña, láganibaña sun le buídubei. [...] Hanarimebei hanaagun houngua, háluahabei hagundan guánarügü lubaragiñe hamuga háluahani Bungiu” (2 Timotéu 3:1-4). Inarüni añaheingubeiñanu lan gürigia ítaratiña, íbini ítara, manarimeti meha hiibe kei guentó.

Gumeseti profesía burí le agunfulira lúmagiñe irumu 1914. Saminatiña giñe fiu abürühatiña abahüdaguni, polítiku hama burí amu abürühatiña sansi lan katei ubouagu lúmagiñe irumu ligía. Kei hénpulu, abürühati aban abahüdaguti dinamárükana gíriti Peter Munch: “Dan le lagumeserunbei wuribu lidan irumu 1914, aba lasansirun sun katei lidan habagari gürigia. Lídangiñe aban lubuidun dan lánina awanseruni, sódini, [...] aba webelurun lidoun aban dan le ñein lumuti saragu chagaguaü, katei le hanarimeti luriban, iyereehabúni ani anihein machouruni lidan sun fulasu”.

Anihein giñe ñunsu buiti. Súnwandan liabin gálumaü lárigiñe liñawan dan. Arufudati seini le uágubei wayanuha yarafaali lan dan lun lagumadihani Larúeihan Bungiu Ubóu. Dan le líridunbalin Hesusu seini, ayanuhati luagu lubuidun katei le: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Matéu 24:14).

Aban fánreinti súdiniti lídangiñe uganu buiti le wapurichihabei wagía gefentiña luagu Heowá uganu le. Ligía ítara liña lubéi tiri wani garüdia tótima subudiwaboun: Garüdia Awisahatu. Tasubudiragüdüñein Larúeihan Heowá. Ayanuhatu luagu sun le lunbei ladügüni Larúeihan Bungiu luagu Ubóu luma hawagu gürigia.

Lun lounabún álügüdahani le, ariha wamá gádürü katei súdiniti:

1. Míchugunbei Larúeihan Bungiu chansi houn gürigia ha lánina polítika ha lídanbaña ubóu le lun gafanran hamá lidan.

2. Háfaaguba ábutigu lidan polítika lun magidarúniwa lan ubafu hawéi, ábameti hebedaagun lun Larúeihan Bungiu (Sálumu 2:2-9).

3. Mósume lagünrinchaguni Larúeihan Bungiu sun le líbiri arúeihani lugundun busenbaña hasigirun arúeiha (Danieli 2:44; Arufudúni 19:17-21). Arümahedón, liña tagúarun Lererun Bungiu lun lagumuhóun wuribu lídanti sun ubóu le (Arufudúni 16:14, 16).

4.   Sun ha anúadirutiña herederun lábugiñe Larúeihan Bungiu, hásügürüba wínwanñu lídangiñe Arümahedón ani hawinwanduba lidan aban iseri ubóu le darangiluti. Ariñagatu Bíbülia gíbebaña lan ani másiñati saragubaña lan míñunu gürigia (Arufudúni 7:9, 10, 13, 14).

Subudi, ábanbei lídangiñe furumiñeti katei le wemegeirubei lun wawinwandun lábugiñe Larúeihan Bungiu. Aba lariñagun Hesusu lun Bungiu dan le layumuragunbei lun: “Anihán lébunabei ibagari le magumuchaditi, lun hasubudirunibu buguya le Bungiu ábanrügüti, le inarüniti, luma lun hasubudirunina, au Hesukrístu le bóunahabei” (Huan 17:3).

Íderagua lumutiwa wasubudiruni Bungiu lidan saragu katei. Ariha wamá bián lídangiñe. Furumiñeti, ídehati lun wederebudagüdüni wafiñen luagu Bungiu. Adügati afiñeni gébunati le lun wachoururuni inarüniti lan Larúeihan Bungiu ani yarafaali lan dan lun liabin (Ebüréu 11:1). Libiaman, ídehati lúntima línsiñedun Bungiu hama gürigia woun. Ínchaha lumutiwa ínsiñeni le wasandirubei luagu Bungiu lun gaganbadi wamá lun lau sun taruman wanigi ani ínchaha lumutiwa ínsiñeni le wasandirubei hawagu gürigia wáledi lun wafalaruni lúrudu subudiwati le líchugubei Hesusu, dan le lariñagunbei: “Le katei le babusenrubei ladügǘn bun, ligialá badüga houn amu” (Lúkasi 6:31).

Kei aban úguchili buiti, busén lumuti Bungiu le buídutimabei woun. Busenti lun wabihini le unbei tagúara Lererun “ibagari magumuchaditi” o ibagari le tímatimaati (1 Timotéu 6:19). Mama ibagari le wabagaridubei uguñe weyu. Mosu háfaagun saragu míñunu gürigia sagü weyu lun hasigirun habaruaguóun. Ida luba ibagari le tímatimaati? Ariha wamá fiu lídangiñe katei buíduburiti le lunbei ladügüni Larúeihan Bungiu hawagu gürigia.