Saminatün san lachülürüba lan dan lun haransehani gürigia sun turobuli le adügübei lun nidiheri wamá luma lun machourun lan wabagari ámuñegü? Lun waranseruni waturobulin, mosu wasubudiruni ka lan lébunabei.

Ru wamá aban hénpulu. Aba meha lasandirun aban wügüri gíriti Tom ani dan lárigiñe, aba lounwen. Ka uagu lounwe? “Dan le lagumeserunbei asandiragua lungua wuriba, úati akutihati kátima lan lisandibei”, liña labürühan surusia le nadagimeinbei tidan háspitali to ñein lubéi letenirúa lun Tom murusunbei dan lubaragiñe lounwen. Genegeti rúrügü hamá surusiagu ha larihubaña furumiñe árani lun lun ladilirun gáriti luéi.

Ladügǘña san ligiaméme lau burí turobuli le lídanbei ubóu? Samina wamá luagun le: áfaaguatiña gumadimatiña lun lalouguadun íweruhani lau hadügagüdün burí lúrudu, híchaahan adiraahagülei lidan ámuñegueinarügü fulasu luma lau híchugun hanwoun hasudaranigu. Lau sun ídeha lan lira, magaranihantiña lun lébuna turobuli: hayumahan gürigia, hagaburi luma le hafiñerubei. Lugundun anihán burí katei le ínchahabaliña gürigia adügei le hadügübei.

Ariñagati Daniel, aban wügüri le awinwandubei lidan aban lídangiñe ageiraü le lídanbei Suedi Meriga, le ñein lubéi wéiritimahali lan hagudemen gürigia: “Luagu aban dan, maweirinti meha luriban léibugun katei lidan wabagari. Masandiruntiwa meha anufudei luagu wíweruhouba lan tau áruma, ánheinti guentó, siñaali lawinwandúniwa darangilu lidan ni aban fulasu. Adügaali turobuli lánina seinsu lun larihíniwa gibe hamá gürigia güridítiña ha únbaña mineben lan ni habagari gürigia ni hamegen”.

Anurahati aban wügüri lídangiñe aban lídangiñe ageiraü le luéigiñebei oubaü le ñéingiñe lubéi laboucha weyu libiti barana Mediteraniu, ani lárigiñe, aba laturiahanu Lererun Bungiu, ariñagati: “Lidan nageira, dǘgüdatiña iduheñu, polítiku hama tílana ligilisi hawagu nibureintiña lun houdin awuribuha, subudiwa hamaamuga kei gürigia gabafutiña. Ligiaméme giñe hadügübei áganiñu. Aba níchugun fe moun lumuti lan lafiñerúniwa hawagu gürigia ha arúeihabaña”.

Ariha huméi le tariñagubei binadu líburu to ídanboun ladarirúa dimurei lánina lichú aau:

• “Lúmagiñe hañüraü gürigia luágugubeirügü wuribani [h]asaminara” (Agumesehani 8:21).

• “Úati ni kata geyeedaguaditi ani salufuri kei hanigi gürigia. Kaba gayara gunfurandalanu?” (Heremíasi 17:9).

• “Tídangiñe anigi láfurida saminaü wuribati, áfarahani, [...] agamariduni mamarieidunga, íweru, iyeeni luma lanabúniwa Bungiu” (Matéu 15:19).

Siñaguagidiwa woungua, wagía gürigia, lun wagidaruni igaburi wuribati le wawagubei wawariua. Lubaragiñe lira, genegeti wuribatimarügüti lan, kei larufuduni turobuli burí le uágubei layanuhóua lidan arütíkulu le ásügürübei (2 Timotéu 3:1-5). Susereti lira lau sun gíbeeli lan ariñahani wama uguñe weyu luma ámuñegueinarügü igaburi le aubei gayara lan wayanuhan hama amu. Kati uagu siñá lubéi wadügün lun ñein lan darangilaü luma ichouruni ubouagu? Wáluguña san wadügün lóugiñe le wayaraabei? Wáfaaguña san luagu le siñabei ladügǘn?

Íbini hamuga anhein asusereda aban milaguru le adügüti lun gayara lan wagidaruni igaburi wuribati le hawagubei gürigia, lasigiramémeba machouruni lidan ubóu. Ka uagu? Ladüga gébehati le liyaraabei gürigia adüga.

 Le linarün katei: “Úati yu lan lun wügüri [...] ladundehani lupasun guánarügü” (Heremíasi 10:23, TNM). Ítara liña, madügǘntiwa lun wagumadiragun woungua. Ítara kei madügǘniwa wamá lun wawinwandun lábugiñe duna o huánriñurugu, ítara liña giñe madügǘniwa wamá lun wagumadihan hawagu gürigia wáledi.

Samina humá luagun le: Hínsiñeti san houn gürigia lun lariñawagún houn ida luba lan hanügüni habagari o kaba lan adundehani hafalara? O ida luba lan harihini haragahóun irahüñü, lasiadirún gürigia lun lounwen o ida luba lan hagüriahaniña hasaanigu? Anihán burí fiu lídangiñe katei le adügübei lun hafanreinragun gürigia. Íbini hénrengu lan lanharúniwa lun, inarüni le tariñagubei Lererun Bungiu: mabafu waña lun wagumadihan hawagu amu, maricha wagía lun wadügüni. Kati gayaraabei líderaguniwa?

Furanguti Bungiu lan lugundun ligía adügübaliwa. Mítaranti kei hasaminaruni saragu, mabulieidagunti Bungiu wawéi. Adügati lubuidun burí adundehani le tídanbei Bíbülia lun wasubudiruni weiri lan lebereserun Bungiu wau. Íderagua lumutiwa gunfuranda wamanu tubuidun líburu to lun wíchugun fe gébeha lan le wayaraabei adüga luma lun gunfuranda wamani ka lan uagu gíbeeli lubéi katei híruti asusereduti lidan habagari gürigia. Kei lariñaguni aban sásaamu yámanina: “Mafurendeirungiña néchanigu hama gumadimatiña lídangiñe sun le susereelibei lidan dan le sügühalibei, ligía masansirun hamagili lubéi ligaburi hóuserun”.

Ariñagati Salomón, aban urúei le meha chubei aau: “Lóunigirubadibu lichú bau luma gunfurandaü le bídanbei súnwandan” (Ariñawagúni 2:11). Gayaraati tíderaguniwa Bíbülia lun wibihin lichú aau luma gunfurandaü. Ariha wamá aban hénpulu. Lidan Sálumu 146:3, aliihatiwa: “Míchiga huméi hafiñen hawagu gürigia wéirigutiña”. Ídehati adundehani buiti le lun míchugun wamani wemenigin luagun katei machourunti o le genegeti masuseredunbei lan. Ariñagati Kenneth, le awinwandubei lidan aban uburugu le wéiriti dencha lan Nórute Meriga: “Lau sun füramase hamá sun gürigia ha lánina polítika haransehabei lan katei, siñá hamuti aransera. Haritaguagüda lumutiwa lira inarüni lan le tariñagubei Bíbülia”.

Abürühati Daniel, le buga uágubei wayanuha: “Eibu dan, ábatima nachoururuni siñá lan lagumadihan ni aban gürigia buidu. Madügünti wareidahan seinsu halaürugu, o wadügün aransehani lun weresibirun seinsu danme le rúaali wadaani woun lídangiñe wadagimanu, lun wachoururuni wawinwanduba lan lidan darangilaü. Subuditina gürigia ha sandí hamaali lueirin íruni le lanügübei harihin masuseredun lan le hagurabubei”.

Ídehatu Lererun Bungiu lun mafiñerun wamá luagu katei le lunbei masuseredun lan, ani keime warihini, rutu emenigini woun.