Gabafuti ariñahani le tídanbei Lererun Bungiu lun labuiduragüdüni habagari gürigia. Ariha waméi ida liña lan tíderaguni Ricardo luma Andrés.

RICARDO. Dan meha le kéinsirügügili irumu nau, aba nádaragun nungua hadoun aban sétanu wuribatiña. Kei meha nibureingidina lan, wéiriti meha nafalaruniña iseri numadagu. Darí meha lun busén nan násügürün diisi irumu furisunrugu. Lau sun lenege lan aban libidiounigan aau lira, inebewatiña meha gürigia ha áfuridubaña furisunrugugiñe lidan fulasu le ñein lubéi naweirida. Busentina méhati ítara nan kei hagía.

Wíyeti meha nanügüni nibagari, yúsutina meha düroga ani fásitina meha giñe. Aban guñoun, aba haduuragun áganiñu balu hawouguoun ani au meha aban hádangiñe. Lau sun yebe samina nan háfaraadina lan hilagubei, séfutina. Ábati nagumeserun asaminara buidu luagu nibagari luma luagu le nabusenrubei nibihin. Busentina meha nasansirun, ida luba méhati nibihini? Kaba meha íderaguana?

Gíbeti meha haturóbulin hiibe-agei niduheñu ani magundanti meha habagari, ánhañati liduheñu aban hádangiñe niyauritenu, mítarantiña meha. Subudi numuti meha buidu lan hagaburi ani winwan hamani le tarufudahabei Lererun Bungiu. Ariñagaaña meha nun Heowá lan líribei Bungiu. Ligíati, murusun dan lárigiñe aduuraguni ligía, aba nayusuruni liri Heowá dan le nayumuragunbei lun ani amuriahatina luma lun líderagunina. Larugan, aba ladaünhan aban gefenti luagu Heowá luagu nubenari, mafiñengidina meha lasusereduña lan lira. Gumesetina aturiahoun Lererun Bungiu luma.

Murusun dan lárigiñe, aba nagagibudagun luma aban óunwenbu turobuli. Ábaha hagúahan binadu numadagu nun luéigiñe gágamuru lunya nóundarun hamoun. Lau sun meha hénrengu lan, ariñagatina houn madügün nubéi lan. Busentina meha nasigirun aturiahoun Lererun Bungiu, ani gúndaatina lau nanúadiruni lira. Sánsihali nibagari ani gúndaahadina le tímatimaati.

Aranseñu niña meha lun násügürün diisi irumu furisunrugu lun nagañeiruni linebese aban sétanu hani wuribatiña. Ligía aba lubéi namuriahan luma Bungiu lun líderagunina ásügüra íbini diisi irumu lidan nibagari ayusuroun Lererun lun níderagun amu gürigia tau, ítara kei meha híderagunina amu. Óunaba lumuti Bungiu nayumuragun, lugundun disedühali irumu nau adügei. Ani le linarün katei, madaürǘnwatina ni aban wéiyaasu.

Saragu hádangiñe ha meha numadagubaña, añahein furisunrugu guentó ani siadiwaaña lun hagunfulirun saragu irumu ñein, ani añahein amu, hilagua. Wéiriti neteingiruniña niduheñu ha Gefentiña ladüga háfaagun lun mítaran hamá kei ha híbiri luma luagu hafalaruni le tarufudahabei Lererun Bungiu lidan habagari. Wéiritimati inebesei le nasandirubei hawagu sügǘ lau le meha gayaraabei nasandiruni luagu furumiñeguarügü lílana sétanu hani wuribatiña. Ani lóugiñe sun katei, wéiriti neteingiruni Bungiu luagu larufudahani ibagari le buídutimabei nun.

 ANDRÉS. Lidan aban fulasu gudemeti nasirua nan ani ñein giñe nagüriarúa, hanarimeti meha léibaagun düroga ñein, anihein meha giñe áfarahani, anufudehóuatiña meha gürigia lun lagidarúniwa hámati hawéi luma ahoruhani. Gátaditi meha núguchi ani yúsuti meha giñe aban düroga to unboun hagúara fulúaru. Sun meha dan tau núguchu éreragua luma núguchi luma agayuaha hawougua.

Ñǘraügidina meha dan le nagumeserunbei átagua luma ayusura düroga. Sügütina meha saragu dan ǘmadarugu íweruha luma alugurahei le níweruhabei. Saragu irumu lárigiñe, lidan láfaagun núguchi lidan aban igaburi mabuidunti lun layarafadun nun, aba larufudahan nun ida luba lan nebelaagüdün düroga lidoun ageiraü luma amu burí katei le unti maha lan lúrudu lun nalugurahani. Gáñeitina saragu seinsu lidan murusun dan. Aban weyu, aba hárügüdünina súdaragu núbiñe ladüga meha álugaadina lan náfarun aban gürigia hilagubei. Aba nasiadirún lun nerederun seingü irumu furisunrugu.

Aban binaafin, aba hagunbirahóuniwa sun adaürǘtiña lidoun aban liraüraü adamuridaguni le hadügübei gefentiña luagu Heowá ani ñǘdüntina. Arihúati furangu luagu inarüni lan sun le hariñagubei, ligía aba lubéi nánharun lun lichugúniwa aturiahani tídangiñeti Lererun Bungiu nun. Máfaaguntiña Gefentiña hagía lun hahamaruhani le tariñagubei Lererun Bungiu nun, lubaragiñe lira, aba harufudahani sun liñun-agei lilurudun Bungiu nun luáguti laruman ibagari.

Fureseti níchugun fe nemegeiruba lan meha ídemuei lun nasansirun, dántima le narihinbei aba lan hagumeserun amu adaürǘtiña ariñaga nun hadügüba lan wuribati nun ladüga mínsiñe lan houn lun naturiahanu Lererun Bungiu. Amuriahatina luma Heowá lun líchugun lichú aau luma erei nun. Ídehati lira lun gayara lan nóunabun nuéigiñegua lau nayanuhan houn amu luagu le nafurendeirubei.

Dan le náfuridunbei furisunrugugiñe, hanarimeti meha nidiheri darí lun himei nani lun hamuga meha nerederun murusunraüya dan ñein. Sun meha anangüra lan áfurideina, aba hayouragun fiu adaürǘtiña nun lau háhabu. Añahein meha giñe ariñagutiña nun lau ínsiñehabuni: “Giribubá múnadoun, liraüraü fádiri”.

Ruti anufudei nun nasaminarun luagu ida liña lan hamuga nibagari lun hamuga mígirun nan lun larufudahan Bungiu nun. Rútina seremei lun Bungiu luagu ínsiñeni le lasandirubei nuagu luma luagu marihin lánina kei aban gürigia le máraninaali luáguti. a