Megei hamuti irahüñü hadundehan luma heweridihan gürigia wéinamugaaña. Ani lau sun agübürigutima lan lúnbaña hadügüni lira, gayaraati giñe hafurendeirun isaanigu katei buiti hámagiñe amu gürigia wéinamugaaña.

Lidan saragu ageiraü, lóuguati dan hásügürün nibureintiña hama gürigia wéinamugaaña. Samina humá luagun le:

• Liibe-agei dan wéyuagu, leskuelaruguñanu irahüñü, le ñein lubéi gíbetima hamá aturiahatiña hawéi máisturugu o amu gürigia ha wéinamugaaña.

• Dan hagiribudun irahüñü hábiñoun, málougati múnada ladüga añangüra lan hagübürigu awadigimarida.

• Arufudati aban ariñahani sügǘ hamá irahüñü ha gúnfulihaña lúmagiñe 8 darí 12 irumu ageiraü Meriga kéiburi sisi oura luagu weyu adibiriha lau gágamuru, konputadora o katei líbeina lira. *

Ariñagatu líburu Hold On to Your Kids (Badüle humá hawagu hisaanigu): “Máyeihan hamaaña nibureintiña hagübürigu, máisturugu o amu gürigia wéinamugaaña ha gayaraati lafiñerúniwa hawagu, mamuriahan hagía adundehani hama, hamoun haali [...] amu nibureintiña háledi houdin áluaha adundehani”.

Sügǘ humá dan hama

ADUNDEHANI TÍDANGIÑETI BÍBÜLIA: “Arufudahabá buiti lun irahü dan le ñǘraügili; íbini danme le wéiyaali mabulieidun lubéi” (Ariñawagúni 22:6).

Áluaha hamuti irahüñü hadundehan hagübürigu. Ariñagatiña sásaamu, íbini lan houn irahüñü ha wéiriaraühaña gebegitimati adundehani le heresibirubei hámagiñe hagübürigu sügǘ lau le heresibirubei hámagiñe hamadagu. Ariñagati aban máisturu gíriti Laurence Steinberg tidan líburu You and Your Adolescent (Huguya luma hisaani le wéiriaraühali): “Dandu dan le wéiriaraühaña irahüñü kei lidan burí furumiñeti irumu le ásügürübei lúmagiñe haweinamudun, wéiriti habafu agübürigu luagu hagaburi luma hóuserun”. Ani ariñagati giñe: “Gebegiti le hariñagubei lun hisaani le wéiriaraühali, íbini mariñagun lani, ani aganba lumuti, íbini magundan lan lau sun le hariñagubei”.

Kei garíaguadi habéi sun irahüñü houn hagübürigu lau ínsiñehabuni, sagá humá buiti lídangiñe le hasandirubei hisaanigu huagu. Sügǘ humá dan hama. Ariñaga huméi houn ka lan hasaminanbei luagu burí katei luma ka lan burí katei súdinibei hun ani abahüdagua huméi houn ka lan arufudaha láalibei ibagari hun.

 Amuriaha huméi hídehan gürigia wéinamugaaña ha gayaraati lafiñerúniwa hawagu

ADUNDEHANI TÍDANGIÑETI BÍBÜLIA: “Ha óundaragutiña hama chu tau, lachuuduba hau” (Ariñawagúni 13:20).

Subuditün san gürigia wéinamugaaña ha gayaraati híchugun hénpulu buiti lun hisaani le wéiriaraühali? Ka gayaraabei hadügüni lun lásügürün dan hama? Úati mini lan lira hígiraali lan huádigimari keisi agübürigu houn amu. Íbini ítara, anhein heresibira hídehan gürigia wéinamugaaña ha gayaraati lafiñerúniwa hawagu ani ha lúnbaña madügün hamá damichi lun hisaani, hóustaragüdübei adundehani le híchugubei lun. Abahüdaguatu Lererun Bungiu sagá lan meha aban nibureinti gíriti Timotéu saragu buiti lídangiñe lásügürün dan luma apostolu Pábulu, íbini meha dan le wügürihali Timotéu ani sagati meha giñe Pábulu buiti lídangiñe lásügürün dan luma (Filipuna 2:20, 22).

Fánreinguañu haña saragu iduheñu uguñe weyu ladüga lidan lan ámuñegueinarügü fulasu ubouagu hawinwanda árugutinu, agütünu, iyawuritenu hama amu iduheñu. Anhein susere lubéi ligiaméme hun, áluaha humá chansi lun hásügürün hisaanigu ha wéiriaraühaña dan hama gürigia wéinamugaaña ha arufuda hamuti igaburi burí le habusenrubei lun hafurendeiruni hisaanigu.