Gayaraati lafiñerúniwa hawagu gürigia ha gúnfulibaña lau le agurabúbei hámagiñe lugundun adüga hamuti wadagimanu le ichugúbei houn lidan dan le lunbei hadügüni.

Íbini lúmagiñe hañüraü irahüñü, gayaraati hafurendeirun agunfulira lau le agurabúbei hámagiñe. Ariñagatu líburu Parenting Without Borders (Agübürigu meberesenga ageiraü): “Anihein fisiu le ídanti gayara lan lídehan aban irahü lúmagiñe keinsi hati lau ani lumoun lagunfulirun disiwídü hati, busenhali ladügüni. Lidan saragu fulasu, gumesetiña agübürigu ínchahaña hasaanigu lúntima buidu lan hadügüni hafisiute múnada lúmagiñe hagunfulirun labadinagua seingü luma sedü irumu. Íbini lau irumudiri le, gayaraati hagunfulirun irahüñü buidu lau dasi le ichugúbei houn múnada”.

Anihein burí fulasu le ídanti hagiribuda nibureintiña ha hóunguaaña hábiñoun hagübürigu dan le hasandirun siñá lan houn. Añahein úntiña lasusereda lira ladüga marufudahan hamá hagübürigu houn ida luba lan hahandilihani seinsu lau lichú aau, hadügün fisiu múnada o hagunfulirun lau le lunbei hadügüni sagü weyu.

Ligía buídutima lubéi haranseruni hisaani lubá burí buligasion le lunbei lagunfuliruni danme le wéiriaali. Ariñagatu líburu How to Raise an Adult (Le lunbei hadügüni lun haranseruni hisaani lubá danme wéiriaali): “Chóuruti mabusenrun humá lun huguya lan ariha lau sun lemegeirun hisaani darí lagunfulirun 18 irumu lun ligíaali lanme hígiruni lun larihini lungua ka lan ibagaribei”.

Ru humá dasi houn múnada

ADUNDEHANI TÍDANGIÑETI BÍBÜLIA: “Sagawati katei buiti lídangiñe sun áfaaguni” (Ariñawagúni 14:23).

Busentiña irahüñü ñǘbürigiña híderaguniña hagübürigu adüga fisiu. Gabaroun huméi lira meferidirun humaamugei chansi lun híchugun dasi houn hisaanigu múnada.

Añahein agübürigu saminatiña gíbeyaali lan dasi le igirúbei houn harahüñü leskuelarugu sagü weyu ani mabusenruntiña híchugun lanwoun hahürügu.

Íbini ítara, chóurutimati buídubei lan lidin houn irahüñü leskuelarugu ánhaña ídeha lau fisiu múnada,  lugundun furendeitiña ánhara luma agunfulira lau le lunbei hadügüni. Ariñagatu giñe líburu Parenting Without Borders: “Ánhawa mígirun lun híderaguniwa wasaanigu dan le nǘbürigiña ani busentiña hadügüni, hasaminaruba ua lan súdini lan híderawagun amu [...]. Héchuduba giñe lun adügǘwarügü lan sun katei houn”.

Kei larufuduni dimurei burí le, ánhaña ídeha irahüñü lau fisiu múnada, hafurendeiruba mama lan resibirügübaña, lunti lan giñe híchugun masaminarunga hawouguounrügü. Lídehaba giñe lira lun hasandirun súdini lan habara hadan haduheñu ani anihein lan wadagimanu lunti hagunfuliruni.

Íderagua humaña gunfurandei hagagibudaguba lan luma le lanügübei ligaburi hóuserun

ADUNDEHANI TÍDANGIÑETI BÍBÜLIA: “Aganbabá eweridihani, anha buguyame lun ererehóuni, ítara luba biabin lun lachuudun bau” (Ariñawagúni 19:20).

Danme lachararun hisaani, madouragua humá lau lichara íbini ligía lan habusenrubei hadügün. Gayaraati hánharun irahüñü lun le lanügübei wuribati le hadügübei. Kéiburi anhein abouchagua aban katei le mama lani, gayaraati lamuriahan ferudun ani anhein gayara, fáyeilei katei ligía lun labureme.

Ánhaña ánhara hisaanigu lun le lanügübei hachara...

• ... maramudun habéi.

• ... míchugun habéi duru hawagun amu.

• ... málugunbaña híchugun lébuna le hadügübei.

• ... hamuriahaba ferudun danme mégeiwa lan.