Subudi hamuti gürigia ha harumabaña óuserun ka lan buídubei lumoun ka lan wuribabei. Sigitiña arihei le wuribabei kei wuribati luma le buídubei kei buiti meberesenga le gádanbaliña ani falá hamuti adundehani ligía íbini dan le marihin hamaniña amu.

Uguñe weyu, aganbatiña irahüñü sun luwuyeri iyeeni libügürü le buídubei lumoun le wuribabei, hámagiñe hapanaagu leskuelarugu o lidan músika, pelikula o programa le tídanbei bigibigitu. Adügati lira lun hagumeserun álügüdagua houngua anhein inarüni lubéi le arufudahóubei houn hábiñe libügürü le buídubei lumoun le wuribabei.

Dántima le wéinamuraühaña irahüñü lasusereda lira houn. Ariñagatu líburu Beyond the Big Talk (Lárigiñe “layanuhan úguchili luma isaani”) lidan lan dan ligía mégeitima hamá nibureintiña “gunfuranda hamani hadügüdaruba lan hapanaagu hama gürigia ha arihúbaña tidan bigibigitu, Internet o katei líbeina lira hawagu lun hadügün katei lun buidu lan héiguadun houn hiibe-agei gürigia. Mosu hafurendeirun nibureintiña adügei le hasubudirubei ligía lan buídubei íbini magundan hamá hamadagu lau”. Furanguti lubeiti mosu lan hagumeserun agübürigu arufudahei lira houn hasaanigu lubaragiñe hínchadun.

Íderagua humaña asubudirei le buídubei lumoun le wuribabei

ADUNDEHANI TÍDANGIÑETI BÍBÜLIA: Subudi hamuti “ha wéinamuhañabaña [...] arufudahani le buídubei lumoun le wuribabei” (Ebüréu 5:14).

• Ariñaga huméi anhein buidu lubéi o wuriba lan katei le adügǘbei. Lidan sügǘ le ságüti weyu, ayanuha humá luagu igaburi le ámuñegueinarügüti luáriuagua, kéiburi anhein eyeeha somu gürigia, gayaraati hariñagun lun hisaani: “Mama lóuseruña gürigia le lau arumani”. Anhein lariñaga hisaani inarüni, gayaraati hariñagun lun: “Buiti badüga lau bóuserun lau arumani”. Anhein maha aban gürigia líderagun somu wéiyaali mutu, gayaraati hariñagun lun: “Wuribati lira, mama larufuduña gürigia le ínsiñehabuni”. Anhein íderagua hisaani aban wéiyaali mutu, gayaraati hariñagun lun: “Buiti badüga, lugundun barufuduña ínsiñehabuni”. Lau lásügürün dan, afurendeireina lubéi hisaani ka lan katei buiti lunbei ladügüni luma katei burí wuribati le moun lubéi ladügǘn.

• Afuranguagüda huméi houn ka lan uagu buidu lubéi o wuriba lan aban katei. Lun híderaguni hisaani aranserei lisaminan buidu, álügüda huméi: “Ka uagu buidu lubéi louserúniwa lau arumani?”, “Ka uagu adüga lubéi leyeehan gürigia lun leferidiruniña lumadagu?” o “Ka uagu wuriba lubéi íweruhani?”.

• Írida huméi buiti le lanügübei ladügǘniwa le buídubei. Gayaraati hariñagun lun hisaani: “Ánhabu óusera lau arumani, hafiñeruba amu buagu” o “Ánhabu óusera lau gamadóuni, busenbaña gürigia herederun burugabu”.

 Áfaagua humá lun hasubudirúniwa sun tílana huban luagu hafalarun échuni buiti

ADUNDEHANI TÍDANGIÑETI BÍBÜLIA: “Ítarameme humá arufudei kátañadün lan” (2 Korintuna 13:5, TNM).

• Lunti hafalaruni sun tílana muna ligiaméme adundehani libügürü le buídubei, gayara láamuga hariñagun darangilañu:

  • “Úatiña yéetiña tidan muna to”.

  • “Maguaragúntiwa wóuniwagua, magayuahan wagía ni ka uagu”.

  • “Manabahantiwa, mayanuhan wagía wuriba ni ka un”.

Anhein hadüga ítara, gunfuranda lubéi hisaani mama lan rúrügütün gumadi lun luáguti le buídubei lumoun le wuribabei, harufudubei giñe lun ka lan igaburi aubei habusenra lun hasubudirúniwa sun tílana huban.

• Yusu humá sügǘ le ságüti weyu lun harufudahani lun hisaani ka lan buídubei lumoun le wuribabei hun keisi iduheñu. Gayaraati hayanuhan luagu somu katei le hadügübei lupaanágu irahü o gürigia ha arihúbaña tidan bigibigitu, ábameti hálügüdüni: “Agia buguya, kaba hamuga badüga?” o “Kaba hamuga hadüga tílana muna to?”.

Adüga humá lun busén hamá hisaanigu hadügüni le buídubei tídangiñe sun hanigi

ADUNDEHANI TÍDANGIÑETI BÍBÜLIA: “Harumatá hanigi” (1 Féduru 3:16).

• Danme hóuserun hisaanigu buidu, ariñaga humá houn buidu lan hadüga. Danme ladügüni hisaani le buídubei, ariñaga humá lun buidu lan ladüga ani ka lan uagu buidu lubéi le ladügübei. Gayaraati hariñagun lun: “Wéiriti nugundan bau ladüga bariñaguni inarüni nun”. Anhein ariñaga hisaani hun adügaali lan somu katei wuribati, ru humá seremei lun luagu lariñaguni inarüni ani lárigiñe, gayaraahalime hadeinhan lun.

• Erereha humá houn danme hóuserun wuriba. Íderagua huméi hisaani arihei lunti lan laransehani wuribati le ladügübei. Mosu hasubudiruni irahüñü ka lan wuribati hadügübei ani ka lan uagu máhawa lubéi lun igaburi ligía hábiñe. Añahein agübürigu madügün hamuti lira ladüga mabusenrun hamá lun hasandiragun hasaanigu houngua wuriba, gama lumoun, ánhaña ayanuha hama, híderaguñanu aransehei hasaminan lun hasubudiruni le buídubei lumoun le wuribabei.