Íderagua lumutiwa igaburi le lun...

• ... gagurabaguadi wamá

• ... mígiraguagüdün wamá woungua lun le wa sandirubei

• ... wagumuchuni dasi le ichugúbei woun íbini mínsiñe lan woun

• ... wíchuguniña amu luma le hemegeirubei furumiñe

Mábürühantiña irahüñü ha ragüguabaña houngua lidoun óuchawaguni ka lan yebe lubuidun harihin lun. Ánhaña irahüñü ha mafurendeirunbaña árügüdagua houngua, ménrenguntimabei lun...

• ... fasi hamá

• ... ladagarun lueirin íruni hawagu

• ... hagumulahan, hátagun o hayusurun düroga

• ... heigin katei le mabuidunti lun hátuadi

Arufudati aban aturiahani, dan le lan haweinamudun hiibe-agei irahüñü ha afurendeirubaña árügüdagua houngua, hénrengu lan hasandirun, gaturobulin hamá luma lúrudu o luagu seinsu. Aturiahani ligía adügübei lun tariñagun Angela Duckworth, aban máistara to arufudahaboun tidan Luban furendei íñuti le uburugubei Pensilbánia: “Machülübei dan lun gíbeya lan ragüguaü unguaü”.

Furendei humá ariñaga uá ani gúnfuli huméi

ADUNDEHANI TÍDANGIÑETI BÍBÜLIA: “Ariñagarügü humá ‘anha’ o ‘uá’” (Matéu 5:37).

Anihein dan hagúaragun irahüñü ñǘbürigiña ayahuaha, íbini hagibugiñe gürigia, lun harihini anhein habiha le habusenrubei hámagiñe hagübürigu. Anhein libiha irahü le labusenrubei, lafurendeiruba gayara lan lagúaragun ayahuaha ságüme labusenrun aban katei adüga láamuga lun hasansiruni lagübürigu uá le hariñagubei luagu aban anha.

Ánhañati agunfulira agübürigu lau hererun dan le hariñagun uá, lafurendeirubei hasaani inarüni súdiniti le: lidan ibagari, mama súnwandan libihini gürigia le labusenrubei. Abürühati aban sásaamu gíriti David Walsh: “Lau sun yebe agurabúa lan gúndaabei lan libagari gürigia le ibihubalin sun le labusenrubei, mítaranti”. Ariñagati giñe mama lan wadügüña fulesei “houn wasaanigu ánhawa arufudaha houn gayaraabei lan habihini sun le habusenrubei”. *

Anhaün ariñaga uá lun hisaani guentó, ménrengunbei giñe lun lariñagun uá ámuñegü  danme hálugun amu hínchahani ayusura düroga, agamarida mamarieidunga o adüga amu katei wuribati.

Íderagua humaña gunfurandei barǘ lan sun le hadügübei buiti o wuribati houn

ADUNDEHANI TÍDANGIÑETI BÍBÜLIA: “Le lábunagubei gürigia, ligíaba giñe lalubaha” (Galasiana 6:7).

Mosu lafurendeiruni hisaani barǘ lan sun le ladügübei buiti o wuribati lun ani wuribabei lan lidin lun anhein mafurendeirun árügüdagua lungua. Kéiburi anhein safagua lubéi sagü lasuseredun katei le mínsiñeti lun, lóuguabaña lumadagu. Ánheinti afurendeira árügüdagua lungua luéi igañi o gaguraasun lan lun laganbuniña amu madüraagungalaña, busenbaña amu hásügürün dan luma. Íderagua huméi gunfurandei anhein lan afurendeira árügüdagua lungua, buídutimabei lan lidin lun lidan libagari.

Íderagua humaña asubudirei ka lan súdinitimabei

ADUNDEHANI TÍDANGIÑETI BÍBÜLIA: “Chouru huméi heteniruña lan lun le súdinitimabei” (Filipuna 1:10, TNM).

Mámarügüñein lun wamahadun lun le wuribabei lahuuda ragüguaü unguaü, íderagua lumutiwa giñe lun wadügüni le lunbei wadügüni íbini masandi wamá ugundani lau wadügüni. Mégeiti hisaani lafurendeiruni mosu lan letenirun lun burí katei le súdinitimabei furumiñe. Kéiburi ladügüni dasi le igirúbei lun leskuelarugu lubaragiñe lidin adibiriha.

Ru humá aban hénpulu buiti

ADUNDEHANI TÍDANGIÑETI BÍBÜLIA: “Rúhadina aban hénpulu hun lun hadügüni libeméme le nadügübei” (Huan 13:15).

Ténitiña isaanigu lun le hadügübei hagübürigu dan lasuseredun katei le mínsiñeti houn, ligía lunti lubéi háfaagun lun harufuduni houn, lau le hadügübei, buídutima lan léibugun katei dan le larufudúniwa ragüguaü unguaü. Álügüdagua humá hungua: Ka nadügübei dan le líchugun nisaani lidere dan nun? Gáñitina san lau lóufudagun o áfaaguatina lun darangilu nan?