Inebehabutiña gürigia ha ǘnabugubaña. Míñugunti hanaagun houngua, magurabahan hagía lun espechali lan houserúniwa. Lubaragiñe lira, beresetiña tídangiñe sun hanigi hau ha híbiri ani aranseñu haña lun hafurendeirun hámagiñe.

Lau sun añahein lan gürigia ha saminatiña lumalan lan ani ǘnabuguni, le linarün katei, íderagua lumutiwa igaburi le ánhara lun wachara luma gunfurandei anihein lan katei le wásiñarun adüga.

• Lídehaba lun ménrenguntima lan houn hisaanigu hadarirun umadagu. Ariñagatu líburu La epidemia del narcisismo ménrenguntima lan houn “hiibe-agei gürigia ha ǘnabugubaña hayanuhan hama amu, ménrengun ligía hanaagun houngua buidu”.

• Lídehaba lun buidu lan lidin houn lidan habagari. Anhein afurendeira hisaani óusera lau ǘnabuguni, líderagubei lira dandu guentó kei ámuñegü, kéiburi danme lidin áluaha wadagimanu. Abürühati aban sásaamu gíriti Leonard Sax: “Nibureinti le íñubei lanaagun lungua, ua ligía gabaroun lani le lásiñarubei adüga, mabuidunbei lidin lun lidan lálügüdawagun danme láluahan wadagimanu, ánheinti nibureinti le arufudati berese lan tídangiñe sun lanigi lau le lariñagubei gürigia le álügüdagubalin, ménrenguntimabei libihini yabu”. *

Íderagua humaña aríagua houngua keisi lubudubu

ADUNDEHANI TÍDANGIÑETI BÍBÜLIA: “Anhein asaminara gürigia luougua luagu wéirigu lan ani ni kata ligía, leyeedaguña lungua” (Galasiana 6:3).

• Mayusura humá dimurei le múaranti luma inarüni. Háfuga genege lan hun hínchahañein lan hisaani lun lasigirun lubaruaguóun lau hariñagun dimurei kéiburi le lun: “Lagunfuliruba sun le bayumahabei” o “gayaraabei bibihini sun le babusenrun”. Le linarün katei, magunfulirunti liibe-agei katei lira. Chóuruti buídutimabei lan lidin houn hisaanigu lidan habagari ánhaña áfaagua luagu katei le gayara hamuti ibiha.

• Ariñaga huméi lun hisaani ka lan uagu hariñaga lun buidu lan ladüga. Anhaün ariñaga lun hisaani ligía lan buídutimabei hádangiñe sun irahüñü, mama híderaguñein lun ǘnabugu lan. Áfaagua humá lun hariñaguni lun ka lan ladügübei buidu.

• Góunigi huméi ligaburi hayusuruni hisaanigu páhina lánina Internet. Yusu hamuti hiibe-agei gürigia páhina lánina Internet le ídanbei hadügǘwa umadagu lun harufudagun houngua luma lun hapantahan luagu le habihibei o le hayaraabei adüga, múaranti échuni le luma ǘnabuguni.

•   Ínchaha humaña hisaanigu amuriaha ferudun lau lóufudagun. Danme lachararun hisaani, íderagua huméi ánhara lun lichara.

Arufudaha humá houn lun geteingiradi hamá

ADUNDEHANI TÍDANGIÑETI BÍBÜLIA: “Geteingiradi humá” (Kolosana 3:15).

• Luagu katei burí le adüga láalibei Bungiu. Lunti hasubudiruni irahüñü gebegi lan sun le adüga láalibei Bungiu ani megei wamani katei burí le lun wawinwandun. Lun hamuga ua lan katei kéiburi garabali, duna luma éigini, wóunweguña hamuga. Línchahabaña hasubudiruni lira lun hasandirun inebesei luma eteingiruni luagu lubuidun burí katei le adüga láalibei Bungiu.

• Luagu lubuidun hagaburi amu. Íderagua huméi hisaani gunfurandei anihein lan katei le ídanti buídutima hamá amu luéi ani lubaragiñe lan lasandirun gimugaü hawagu lunti lafurendeirun hámagiñe.

• Arufudaha humá houn lun geteingiradi hamá. Arufudaha humá houn hisaanigu lunti lan híchugun seremei houn amu tídangiñe sun hanigi, mámarügü lau dimurei. Lun ǘnabugu lan aban gürigia súdiniti lun geteingiradi lan.

Arufudaha humá houn lunti lan híderagun amu

ADUNDEHANI TÍDANGIÑETI BÍBÜLIA: Ǘnabugu humá “ani buidulá hanügüniña amu gürigia huéi guánarügü. Mámarügüla katei le buídubei hun háluaha, áluaha huméi giñe le buídubei houn amu” (Filipuna 2:3, 4).

• Amuriaha humá hama hisaanigu lun hídehan lau fisiu múnada. Anhaün mígirun lun ladügün hisaani fisiu múnada, kéigubeirügü hariñaguña lan lun: “Wéiriyati bisudinin lun badügüni katei burí le”. Lunti hídehan irahüñü lau fisiu múnada furumiñe, lubaragiñe hetenirun lun huraraü. Afuranguagüda huméi lun ka lan buiti hasagarubei amu lídangiñe lagunfulirun lau le yuubei lun ani adüga lan lira lun hasandirun ha híbiri inebesei luma ínsiñeni luagu.

• Íderagua humaña gunfurandei lubuidun lan chansi ladügǘniwa katei burí buiti hawagu amu. Lídehaba lafurendeirun hisaani eberesera hau amu lun derebugu lan lisaminan. Ligía buídubei lubéi lun hakutihani úara ka lan gürigia mégeibei ídemuei luma ka lan gayaraabei ladügüni hisaani lun líderaguni gürigia ligía. Ariñaga humá lun hisaani buidu lan ladüga danme le líderagun somu gürigia ani ínchaha huméi lun lasigirun adügei.