Ligaburi hahandilihani seinsu
Ibihaaña saragu gürigia lun mibe lan haturóbulin lánina seinsu lau hafalaruni adundehani le tídanbei Lererun Bungiu.
ADÜGA HUMÁ ARANSEHANI BUITI
ADUNDEHANI TÍDANGIÑETI LERERUN BUNGIU: “Aransehani le saminawati buidu, buiti lasalirun, anhein le adügǘbei lau furesei, barüti günringuaü” (Ariñawagúni 21:5).
KA UAGU SÚDINI LUBÉI? Lun buidu lan lidin hun, wéiriti lisudinin lun habürüdüni ida luba lan hahandilihani hiseinsun ani gúnfuli humá lau. Haritagua huméi háfuga lan siñabei hagañeihani sun le habusenrubei. Ligíati, subudi huméi ida luba lan hagastaruni hiseinsun.
LE GAYARAABEI HADÜGÜNI
-
Magastara humá lóugiñe le direi humaalibei. Bürǘ huméi sun le lunbei hagañeihani o hafayeiruni ani fánreingua huméi según luwuyeri, kéiburi éigini, daüguaü luma le mégeiwabei múnada. Lárigiñe, ábame hanúadiruni átiribei lan seinsu hagastarun luagu kada katei. Anhaün emegeira lanwoun seinsu lun hagañeinhan ítaga katei, ragǘ humá seinsu lídangiñe le yebe húmabei lun amu katei. Kéiburi, anhaün agastara saragu lidan hagañeinhan gasi tun hugune, ragǘ humá seinsu lídangiñe le yebe húmabei lun katei le maweirinti lisudinin, kéiburi le hadireirubei lun hagañeinhan éigini tidan éigagülei.
-
Mádaragua humá hungua lidoun dúeiti anhein mama lubéi mosu. Áfaagua humá lun mádaragun humá hungua lidoun dúeiti. Lubaragiñe lira, areidaha humá seinsu lun hagañeihan somu katei. Anhein yusu hubéi tárüheta lánina dúeiti, houcha humá hafayeiruni sun seinsu le hagastarubei lau hayusurunu sagü hati maguburahóun láamuga lóugiñe huéi. Ánheinti aniheinhali lubéi dúeiti huma, adüga humá aransehani libügürü ida luba lan hafayeiruni ani gúnfuli humá lau.
Arufudati aban akutihani, liibe-agei lan dan, gíbetima lan lagastarun gürigia dan lafayeihan tau tárüheta lánina dúeiti. Ligíati, anhein yusu hubéi tárüheta lánina dúeiti, subudi huméi ida luba lan hayusurunu.
ÁYEIHA HUMÁ IGABURI BUITI
ADUNDEHANI TÍDANGIÑETI LERERUN BUNGIU: “Lidan lidaani awouhani, mawouhantiña ha magúalibaña; dánmeti lidaani alubahani, háluahaba gama lumoun madaribaña” (Ariñawagúni 20:4).
KA UAGU SÚDINI LUBÉI? Gayaraati ladügün magúali lun gudeme lan gürigia. Ligíati, áfaagua humá lun benefa humá luma lun hahandilihani hiseinsun buidu ñein láamuga le hemegeirubei huma ámuñegü.
LE GAYARAABEI HADÜGÜNI
-
Hawadigimaridun here. Anhein buidu lubéi hadügüni huádigimari, gayara ligía lafiñerúniwa huagu, hénrengubei heferidiruni huádigimari. Gebegitiña nadagimeintiña ha gúnfulibaña lau hawadigimari houn iyubudirigu.
-
Óusera humá lau arumani. Gayaraati ladügün móuserun humá lau arumani lun layanuhóun wuriba huagu ani hénrengutimabei hun hadarirun wadagimanu.
-
Maweinamunlá hagu luagu seinsu. Anhein marihin humá seinsu keisi lubudubu, gayaraabei lagadeiruni hátuadi luma ligaburi hanaagun hungua hama amu. Haritagua huméi mama lan seinsu súdinitimabei lidan ibagari.
AMU ADUNDEHANI TÍDANGIÑETI LERERUN BUNGIU
Aliiha humóun Lererun Bungiu lidan www.pr418.com/cab, anuhein lidan saragu san iñeñein.
MEWESIRA HUMÉI HIDAANI LUMA HISEINSUN LIDAN LURIBAN ÉCHUNI
Ha “gátaditiña hama wéinamu teigin, lidan günringuaü hagumucha; ha magúalibaña huchecheeru hadaüragunboun” (ARIÑAWAGÚNI 23:21).
MADIHERIDA HUMÁ SARAGU LUAGU SEINSU
“Madiheri humá luagu kaba lan heiga o kaba lan hata lun habagaridun, ni tuagu daüguaü to lunboun hadaürünu” (MATÉU 6:25).
UALÁ IGAADUA HUMÁ
“Ha igaaduabaña, afuresehatiña lun harisidun, gama lumoun ibidiñeti houn luagu lábürühaba lan gudemei hawagun” (ARIÑAWAGÚNI 28:22).
