Hátuadi
Lau sun mama tan aban líburu lánina agaranihani Lererun Bungiu, ínchaha tumutiña gürigia óunigirei hátuadi. Akutiha wamá fiu adundehani tídangiñeti Lererun Bungiu le gayaraabei líderaguniwa abuiduragüdei wátuadi.
HÓUNIGIRAGUN HUNGUA
ADUNDEHANI TÍDANGIÑETI LERERUN BUNGIU: “Úati gürigia meberesenti lau lúgubu guánarügü; hóugüdarügü lumuti, góunigilei” (Éfesuna 5:29).
KA UAGU SÚDINI LUBÉI? Ínchaha lumutiwa adundehani tídangiñeti Lererun Bungiu le adügei sun wayaraati lun wóunigiruni wátuadi. Anihein ariñahani le arufudati lídangiñe lan luriban échuni liabin saragu sandi. Ánheinti échuni buiti, adügati lun buídutima lan wátuadi.
LE GAYARAABEI HADÜGÜNI
-
Hóunigiruni le héigibei. Áfaagua humá lun heigin katei le buiti lun hátuadi ani gurá humá bandi duna.
-
Hánhingichuni húgubu. Meberesenga átiri lan irumu hau, gayaraati ladügün hánhingichuni húgubu lun buídutima lan hátuadi, íbini anihein lan somu sandi le máraninati huagu o somu danimaü. Lau sun gayara lan híderagunün hiduheñu o aban surusia, súnwandan huguyaba lan anúadira.
-
Hemeraagun buidu. Gíbetiña gürigia ha marumuguntiña buidu ladüga herederun adüga amu burí katei lidan burí oura le lunbei hamuga añaha lan arumuga. Gayaraati ladügün échuni le lun ladagarun lanarime burí sandi hawagu gürigia. Ligíati, anhaün arumuga buidu, buídutimabei hasandiragun hungua.
HÍGIRUNI LURIBAN ÉCHUNI
ADUNDEHANI TÍDANGIÑETI LERERUN BUNGIU: Chibá waméi “sun luwuyeri iwiyei wawariua, dandu luéi wágubu kei tuéi wawani” (2 Korintuna 7:1).
KA UAGU SÚDINI LUBÉI? Buídutimabei hátuadi anhein mawiyedun humá húgubu lau katei le adügüti damichi, kéiburi agumulahani, le subudiwabei ligíatima lan adügübei lun hasandirun luma hóunwegun saragu gürigia.
LE GAYARAABEI HADÜGÜNI. Anúadira huméi weyu le ídanba lubéi hígirei agumulahani, makü huméi tidan kalendáriu ani ariñaga huméi houn gürigia ha gayaraabei híderagunün ígirei échuni le. Lubaragiñe lachülürün weyu ligía, chagá huméi sun sígaru le húmabei, le ñein lubéi háfurudei, le aubei hébedei o furumiñeguarügü katei le gádanbalin échuni wuribati le. Midin humá lidan burí fulasu le ñein lubéi hagumulaha gürigia.
AMU ADUNDEHANI TÍDANGIÑETI LERERUN BUNGIU
Anhein busén hubéi aban Bíbülia, ariñaga huméi lun somu gefenti luagu Heowá le awinwandubei yarafa hun.
DUARI HUMÁ
“Danme lábunagun aban hídangiñe aban muna iseri, lunti líchugun baríeiru geyegua lau tábulugu; ítara, ha éiguadutiña ñéingiñe aba hounwen, madurunbaña liduheñu lidan”(2 LÚRUDU 22:8).
DARANGILU HUMÁ
“Arufuda lumuti gaguraasuni lichú aau; anhein maguraasuni, arufudati óunwenbu libidiounigan aau”(ARIÑAWAGÚNI 14:29).
MEIGA HUMÁ SARAGU
“Móundaraguaba hama [...] wéinamu teigin” (ARIÑAWAGÚNI 23:20).
