ADUNDEHANI TÍDANGIÑETI LERERUN BUNGIU: “Mámarügüla katei le buídubei hun háluaha, áluaha huméi giñe le buídubei houn amu” (Filipuna 2:4).

KA UAGU SÚDINI LUBÉI? Lun wanaagun woungua buidu hama amu mosu aranseñu wamá lun wíchugun, mámarügü lun weresibirun. Adügati lasaminarun gürigia luouguounrügü lun lagadeirun ligaburi lanaagun lungua luma furumiñeguarügü gürigia. Kéiburi anhein luouguounrügüñein lubéi lasaminara aban maríeiti, gayaraabei lagabarahanu lani weiriou ani anhein tuouguounrügüñein lubéi aban maríeitu tasaminara, gayaraabei giñe tagabarahani tani weiriei. Ani anhein eredera aban gürigia apantaha súnwandan luagu lúmati o luagu le lasubudirubei, lerederuba mamadaguga. Kei tafuranguagüdüni líburu El camino del carácter, manügünti lasaminarun gürigia luouguounrügü ni kata buiti.

LE GAYARAABEI HADÜGÜNI

• Híderaguniña amu. Gayaraati lafiñerúniwa luagu aban umadaü buiti ani aranseñu liña lun lídehan. Arufudati fiu akutihani le adügǘbei dísegua lan ladagarun sandi le lánina lanarime íruni hawagu gürigia ha saminabaña hawagun amu ani sanditimatiña gebegi hamá.

• Arufuda humá gudemehabu. Gunfuranda lumuti gürigia le gudemehabubei ligarigu amu. Ánhadün arufuda gudemehabu, hénrengutimabei hayusurun dimurei le adügati lun wuriba lan hasandiragun amu houngua.

  Adügati giñe warufudun gudemehabu lun wánharun houn sun hawuyeri gürigia. Ligíati, gayaraati líderagunün igaburi le lun hínsiñe hamá gürigia lídangiñetiña amu rasa o échuni hun luma lun gamadagua humá hama.

•   Sügǘ humá dan hama amu. Wásügürün dan hama amu ligía igaburi buídutimabei lun wasubudiruniña. Lun wadarirun umadagu buítiña mosu wayanuhan hama luagu katei súdiniti. Ligíati, ru humá arigei lun le hariñagubei humadagu ani berese humá luagu haturóbulin. Ariñagati aban akutihani le sun líñabei ladügǘn “gúndaatima hamá gürigia ha ayanuhabaña luagu katei súdiniti”.

ADUNDEHANI TÍDANGIÑETI LERERUN BUNGIU: “Féridigüda hamuti hagübüri umadagu lubuidun igaburi” (1 Korintuna 15:33).

KA UAGU SÚDINI LUBÉI? Wéiriti habafu wamadagu wawagu lun lan yebe buiti o lun wuribati. Ariñagatiña sásaamu inarüni lan lira. Kei hénpulu, ariñagatiña gayaraatima lan lagumeserun aban gürigia agumulaha o lígiragun tuma lani weiriou, anhein gamadagua lubéi hama gürigia ha adügübalin lira.

LE GAYARAABEI HADÜGÜNI. Áluaha humá umadagu ha arufudubalin igaburi buiti le hínsiñebei hun, busén huguya háyeihani. Kéiburi gürigia ha asaminarubaña lubaragiñe hadügün o hariñagun somu katei, ha inebehabutiña, gíchigaditiña hama ha buídubei heresibiruniña amu.

MARIÑAGA HUMÁ DIMUREI GÁRITI

“Añahein gürigia, abuleseihatiña láurügü hererun” (ARIÑAWAGÚNI 12:18).

GÍCHIGADI HUMÁ

“Ha gareinibaña, awansetiña” (ARIÑAWAGÚNI 11:25).

WÓUSERUNIÑA AMU KEI WABUSENRUN WOUSERÚN

“Súnwandanla lubeiti hadügün houn amu kei le habusenrubei lun hadügün hun” (MATÉU 7:12).