Humadagua luma Bungiu
Kei aubei warihei lidan furumiñeti arütíkulu, ariha hamutu saragu gürigia Lererun Bungiu kei aban líburu sagüráutu. Dan le haliihanu ani falá haméi adundehani le tídanbei, sanditiña yarafatima hamá lun Bungiu ani aba gunfuranda hamani gasuuni lan ibagari.
Tidan Lererun Bungiu ariñawagúati anihein lan sífiri sandu hadan gürigia lun layanuhóun luagu igaburi le harufudubei lidan habagari o luagu ligaburi hawinwandun (Húdasi 18, 19). Gürigia le mamadaguabei lungua luma Bungiu, wéiriti lafiñerun luougua lubaragiñe hamuga lafiñerun luagu Bungiu. Ánheinti gürigia le buídubei lumadagua luma Bungiu, súnwandan gabaroun lani lugumadin Bungiu (Éfesuna 5:1).
EMENIGINI
ADUNDEHANI TÍDANGIÑETI LERERUN BUNGIU: “Anhein ábürüha barüna dan le lidan ban lénrengunga, lóuguabei bere” (Ariñawagúni 24:10, TNM).
KA UAGU SÚDINI LUBÉI? Adügati íruni lun mere wamá lun wagagibudagun luma lénrengunga le lánina sagü weyu. Ánheinti emenigini, ruti ganigi woun lun wasigirun wabaruaguóun, haritaguagüda lumutiwa madurabei lan lénrengunga burí le úmabei wagagibudagua lun sun dan ani gayara lan wibihin buiti lídangiñe le wásügürübei íbini hanarimeya lan.
LE GAYARAABEI HADÜGÜNI. Áfaagua humá lun hasaminarun ñeinbei lan katei buiti ámuñegü. Lubaragiñe hadiheridun luagu le gayaraabei lasuseredun o hagurabahan lun labuidurun katei, áfaagua humá lun hibihini le habusenrubei hadügün. Inarüni gayara lan lasuseredun katei le magurabúnti (Apurichihati 9:11, TNM). Ani liibe-agei dan, buítimati lagumuchun katei sügǘ lau le wasaminarubei. Yusu tumuti Lererun Bungiu hénpulu luáguti ábunaguni lun tayanuhan luagu katei le, ariñagatu: “Bunabei binadüri binaafin, bunabei giñe rábounweyu, lugundun ibidiñewati kaba lan buídutima, anhein le lubéi bábunubei furumiñe o le lan libiaman o buídubei lan biángubei” (Apurichihati 11:6).
HADARIRUNI LÓUNABAGÜLE ÁLÜGÜDAHANI LE SÚDINITIMABEI
ADUNDEHANI TÍDANGIÑETI LERERUN BUNGIU: “Ruba gunfurandaü nun [...]. Lídanñein bererun inarüni” (Sálumu 119:144, 160).
KA UAGU SÚDINI LUBÉI? Rutu Lererun Bungiu óunabagülei lun álügüdahani burí le hadügübei hiibe-agei gürigia hóuniwagua, kéiburi:
-
Ka san lisuunibei ibagari?
-
Ka uagu wasufurira?
-
Ka asuseredubei woun dan le wóunwegun?
-
Ida luba ibagari ámuñegü?
Añahein saragu míñunu gürigia ubouagu ha gúndaatimahaña guentó ladüga akutiha hamaali lan óunabagülei le tíchugubei Lererun Bungiu lun burí álügüdahani le.
LE GAYARAABEI HADÜGÜNI. Agunbiraha wamutün akutihei le tarufudahabei Lererun Bungiu. Amuriaha humá luma aban gefenti luagu Heowá lun líderagunün lun gunfuranda humanu. Gayaraati giñe hebelurun lidoun wani páhina lidan Internet www.pr418.com/cab o hachülürün lidoun aban lídangiñe adamuridaguni le wadügübei. Mafayeihanbadün lun hebelurun ani úabei amuriahati seinsu huma.
AMU ADUNDEHANI TÍDANGIÑETI LERERUN BUNGIU
Ariha huméi bidéu Ka uagu lunti lubéi haturiahanu Bíbülia? lidan www.pr418.com/cab. Anihein lidan lóugiñe 880 iñeñein.
HASUBUDIRUNI MEGEI HUMANI LÍDEHAN BUNGIU
“Fuleseiwatiña ha asubudirubalin luagu megei hamani lídehan Bungiu” (MATÉU 5:3).
FURENDEITIMA HUMÁ LUAGU BUNGIU LE UÁGUBEI TAYANUHA BÍBÜLIA
“Yarafa humá lun Bungiu, ábame giñe layarafadun hun” (SANTIAGU 4:8).
HALIIHANU LERERUN BUNGIU, SAMINA HUGÍAME TUAGUN
“Fuleseiwatiña gürigia ha [...] lídanñein lilurudun Aburemei hínsiñehabu, luagu lúrudu ligía hasaminara, áriebu wéyuagu. [...] Buíduti lidin houn lidan sun le hadügübei!” (SÁLUMU 1:1-3).
