Ligaburi lóunabun wágubu lun sügǘ hénrenguti arufudubalin gíbeya lan katei lun wachügü. Buíngüda lumuti wasesun wágubu lau burí orümóna le adügübei lúntima tádühan wanigi, lun liñurun wata, lun hámaru lan o lun furese lan wawaragun luma lun lederaagüdün wágubu. Lubaragiñe wíchugun fe luagu le asuseredubei, aranseeli wágubu lun lánhingichun. Dan le míbeeli lan katei lun wachügü, ábaya lárügüdagun wágubu lungua ani ábaya ítara lan kei súnwandan.

Sanditi wágubu gíbeya lan katei lun wachügü lun líderaguniwa agagibudagua dandu luma lénrengunga kei luma denchaü. Lidan wasesun lagumesera sun katei. Buiti lun wasandiragun woungua ítara dan le adüga lan lun wánhingichun lau lóufudagun luma lun wadügüni sun wayaraati lun wibihini le uágubei wáfaagua o lun buídutima lan lidin woun kéiburi dan le wadügüña lan somu egüsámini, wálügüdawaguña lan lidan wáluahan wadagimanu o dan le gafanran wamá lidan somu huraraü.

Íbini ítara, denchati wasandirun gíbeya lan katei lun wachügü dan le wálüdün asandiragua woungua ítara, dan le hanarimeya lan o dan le magidaradi lan. Anhein sandí wabéi súnwandan gíbeya lan katei lun wachügü, gayaraati ladügün lira lun ladagarun sandi wawagu, lun wasandiragun woungua wuriba luma lun wasandirun luéigiñe wachügü. Másiñati giñe ladügün lun wuriba lan wóuseruniña amu. Gürigia le asandirubei súnwandan gíbeya lan katei lun lichügü, gayaraati lagumeserun ayusura düroga o lárügüdün amu échuni wuribati. Gayaraati íbini lasandirun lueirin íruni, saragu lubucha uagu o labusenrun láfaragun lungua.

Lau sun ámuñegueinarügü lan katei le hasandirubei gürigia dan le gíbeya lan katei lun hachügü, gayaraati ladügün hasandiragun houngua ítara lun ladagarun ámuñegueinarügü luwuyeri sandi hawagu, lidan furumiñeguarügü fánreinti luagu hágubu.