4 Adüga lumutiwa san Bungiu lun wasufurirun?
Ka uagu súdini lubéi álügüdahani le?
Ídehati lóunabagüle álügüdahani le lun lasansirun ligaburi warihini ibagari.
Samina huméi le
Lanügüñein hamuga san Bungiu lidaani adügei ubóu wéiriti lubuidun le anhein ladügüñadiwa lubéi lun wasufurirun?
Gíbetiña gürigia ha mánitiña relihión ariñagutiña arufuda lani asufuriruni mabuidun lan lébuna ladügüniwa Bungiu o íbini ua lan Bungiu. Afiñetiña arufuda lan asufuriruni aban lídangiñe ǘrüwa katei le: 1) mabafu lan Bungiu lun lagumuchun lau asufuriruni, 2) mabusenrun lan ladügüni o 3) ua lan Bungiu.
Úati funa san amu lébuna hasufurirun gürigia?
ANHEIN BUSÉN HUBÉI LANWOUN ARIÑAHANI
Ariha huméi bidéu Ka uagu chouru wabalin ariñaga tani Bíbülia inarüni? lidan www.pr418.com/cab.
Le tarufudahabei Lererun Bungiu
Mama lun wasufurirun ladügawa Bungiu
Busenti lun buidu lan wabagari.
“Lubuidun-agei [...] katei le lunbei ladügüni gürigia lun lefeduhani libagari ani wínwanleime, lugundun ánhawa eiga, gurá wagía, aríagua wameime buiti le líchugubei wawadigimari, rúrügü liñalin Bungiu woun” (APURICHIHATI 3:12, 13).
Dan le ladügünbaliña Bungiu furumiñetiña gürigia, adüga lumutiña úouga ni murusun mégeiti hawagu ani ru lumuti sun le hemegeirubei houn lun gunda hamá
Mabusenrunti yebe lun hasufurirun ni hagía ni hadügawagun.
“Aba labiniruniña lau dimurei le: Garahüñügua humá saragu, buíngüda huméi ubóu hau hirahüñü ani gumadi huméi” (AGUMESEHANI 1:28).
Anúadiratiña furumiñetiña gürigia maganbadi hamá lun Bungiu
Adügati hamaganbadin lun hasufurirun dandu hagía kei hadügawagun.
“Ítara kei lídangiñe lan meha aban wügüri lebelura figóu ubouagun, belú ligía óunweni lídangiñe figóu, ítara liña giñe hóunweguba lubéi sun gürigia lugundun afigouhaaña súngubei” (RÓMANA 5:12). *
Madügün lumutiwa Bungiu lun wawinwandun mibihinga ladundehan
Ítara kei madügǘn wamá lun wawinwandun lábugiñe duna, ítara liña giñe madügǘn wamá lun wagumadihan hawagu gürigia wáledi.
“Úati yu lan lun wügüri le éibugubei ladundehani lupasun guánarügü” (HEREMÍASI 10:23, TNM).
Mabusenrunti Bungiu lun wasufurirun
Busenti lun wawinwandun lidan aban igaburi le ídehati lun wadireirun luéi sun turobuli le wayaraati.
“Adügaadibu hamuga gasu lau nererun! Aganwoundeina liña hamuga lubuidun dan bun kei duna éibaaguati” (ISAÍASI 48:18).
^ par. 17 Mámarügüñein lun katei burí wuribati le hadügübei gürigia tayusurei Bíbülia dimurei “figóu”, yusu tumuti giñe lun tayanuhan luagu mégeiti le galagante wabéi.
Háfuga hínsiñebei lan giñe le hun
GARÜDIA AWISAHATU
Ka san lasandirubei Bungiu dan le larihiniwa asufurira?
Líderagubadün bérusu tídangiñeti Bíbülia burí le lun gunfuranda hamani ka lan lasandirubei Bungiu luagu asufuriruni.
