Máhatiña saragu gürigia lun Bungiu ladüga samina hamá ligía lan gadurunbei luagu wasufurirun.

Furangu lan yebe o lábugiñegua, arufudahatiña saragu tábutigu ligilisi Bungiu lan adügübei lun ñein lan asufuriruni. Kéiburi dan le hariñagun...

• ... aban lan abeichúni lúmagiñeti Bungiu hárabaganali, herigini o katei líbeina lira.

• ... hilá hamá irahüñü ladüga megei lan Bungiu hanwoun ánheligu sielu.

• ... dagua lan Bungiu lungua lidoun burí wuribu.

Gayaraati funa san iyeeni lan le hariñagubei lábutigu relihión luagu Bungiu? Ánheinti maha lubéi Bungiu houn ábutigu ha?

Mama ladüga Bungiu wasufurirunbei

Lun hamuga lidurun lan, múaranbei hamuga lira luma ligaburi. Kei hénpulu, ariñagatu Bíbülia:

“Richaguati sun le ladügübei ligía Búngiubei [...], úati marichaü lidan, richaguati ani inarüniti” (2 LÚRUDU 32:4).

“Maritagua humá luagu adüga lan Bungiu Suntigabafu wuribani odi marichaü!” (HOBU 34:10).

“Madügünti Bungiu Suntigabafu ni kata le [...] marichati” (HOBU 34:12).

Máhati Bungiu lun burí relihión le arufudahabei iyeeni luagu

Kéiburi relihión le arufudahabei ligía lan gadurunbei luagu wasufurirun, dagua hagía lílana houngua lidoun burí wuribu luma anarimeni.

“Anhein ligía lubéi hariñagubei profetagu lidan niri [liña Bungiu], heyeehaña. Móunahan numutiña, mariñagun au ni kata houn, madimurehangubeitina houn. Uénedü yeeti sun lira, hadüga houngua, hasaminan houngua” (HEREMÍASI 14:14).

Arufuda lumuti Hesusu furangu anihein lan relihión le ídanti biangua lan hagibu lílana

“Mama sun ha ariñagutiña nun: ‘Nabureme, Nabureme’ lun hebeluruba lan lidoun arúeihani le siélubei, liña Hesusu. Hárügübaña adügübalin lugundan Núguchi Bungiu le siélubei ebelura. Danme lachülürün weyu lánina aguseragüdüni, saragubaña ariñagutiña nun: ‘Wabureme, Wabureme, apurichihatiwa méhatia luagu biri, sagá wagía sífirigu wuribatiña lidan biri, adüga wagía saragu milaguru lidan biri’. Ábameti nariñagun houn: ‘Ibidiñegubeiñadün nun; dise humá nuéi, huguya le adaagubei wuribani!’” (MATÉU 7:21-23).