2 Wáluahan san wasufurirun woungua?
Ka uagu súdini lubéi álügüdahani le?
Anhein wagía lubéi gadurunbei luagu wasufurirun, lunti hamuga gabafu wamá lun wadügün lun míbedigia lan.
Samina huméi le
Ǘnabunmeme liridúba fiu lídangiñe katei le adügübei lun wasufurirun. Darí halía lébeda gadurun wamá luagu?
-
Lagayuahóun luagu gürigia
Arufudati aban akutihani tídangiñeti Organización Mundial de la Salud (OMS) másiña lan súfuri hamá 1 hádangiñe kada 4 gürigia ladüga lagayuahóun hawagu lidan somu dan lidan hañüraü ani súfuri hamá 1 hádangiñe kada 3 würiña ladüga lagayuahóun hawagu o hágurawagun (o biángubei katei le) lidan somu dan lidan habagari.
-
Hilagia hamá gürigia
Según Estadísticas sanitarias mundiales 2018, to tasagaruboun OMS, “másiñati afarúa hamá 477,000 gürigia hilagubei lidan sun ubóu lidan irumu 2016”. Mabahüdünga 180,000 ha saminawabei hilagua hamá lidan burí wuribu luma amu ageindaguni irumuméme ligía.
-
Sandi
Ariñagatu aban íchugutu ñunsu gíritu Fran Smith lidan aban arütíkulu tani garüdia National Geographic: “Agumulahatiña hóugiñe milu-míñunu gürigia lidan sun ubóu. Agumulahani lébunabei seingü sandi létima adügübei lun hóunwegun gürigia: tisandi anigi, esturóku, lisandi awaraguni, tisandi pulmón luma kánserü tidan pulmón”.
-
Múarani le hádanbei gürigia
Ariñagatu aban lisurusian ichügü gíritu Jay Watts: “Gudemei, múarani le hádanbei gürigia, iyereehabúni houn lílana amu rasa, hínsiñewatima hamá wügüriña hawéi würiña o würiña hawéi wügüriña, lanarime hásügüragun gürigia hámagua luma hasandirun gürigia mosu lan hígirunu haban, adügati lun ménrenguntima lan ladagarun sandi le lánina lueirin idiheri luma lueirin íruni hawagu”.
ANHEIN BUSÉN HUBÉI LANWOUN ARIÑAHANI
Ariha huméi bidéu Ka un ladügei Bungiu Ubóu? lidan www.pr418.com/cab.
Le tarufudahabei Lererun Bungiu
Gaduruntiña gürigia lidan liibe-agei asufuriruni
Gumadimatiña magudemehábutiña gadurunbaña luagu liibe-agei wasufurirun ladüga adügatiña lun hénrengu lan habagari gürigia ha nege únbaña heseriwida.
Yusu lumuti gürigia “ubafu le luágubei [...] lun ladügün damichi lun gürigia líledi” (APURICHIHATI 8:9).
Ka gayaraabei wadügüni lun masufurirun wamá saragu?
Gayaraati ladügün adundehani le tídanbei Lererun Bungiu lun buídutima lan wátuadi luma ligaburi wanaagun woungua hama amu.
“Ichügü darangilati ibagaribei lun úgubu; ánheinti gimugaü, ágürüha lumuti íbini abun” (ARIÑAWAGÚNI 14:30).
“Ígira huméi sun magundani, sun iyereehabúni, sun agúaraguni lánina igañi; sun anabahani, luma sun wuribani” (ÉFESUNA 4:31).
