Anhein weiri wetenirun lun burí katei le ídanbei mítaran hamá amu kei wagía, warihibei kamá aban katei wuribati, darime lun wasaminarun buídutima wamá hawéi. Ánhawa asaminara ítara, hénrengubei woun wasandirun gudemehabu hawagu o wíchaagun woungua lidoun halugaarun. Ani larufuduba hamuga giñe lira anihein lan iyereehabúni tidan wanigi.

“Gunda humá hama ha gúndaabaña, hayahua hama ha ayahubaña” (RÓMANA 12:15).

Ka mini lubéi le? Gayaraati lafuranguagüdüniwa adundehani le lidan bián dimurei: warufudun gudemehabu. Lun wadügüni lira, mosu wíchaagun woungua lidoun lilugaarun le aban gürigia, sandí wameime le lasandirubei.

Dan le sandí wamá gudemehabu hawagu amu, rútiwa fe ítara haña lan kei wagía, sandí hamani lememe wasandirubei ani ábanmeme lan ligaburi wóunabun lun ligiaméme burí katei. Adügati gudemehabu lun gunfuranda wamani iduheñu lan súngubei wagía meberesenga kátawa lan. Éibume wáfaagun lun warihini katei burí le ídanbei genegegua wamá hama amu, hénrengutimabei wasaminarun wuriba hawagun.

Íderagua lumutiwa giñe gudemehabu lun inebehabu wamá houn ha híbiri. Mínsiñetiña meha ítaga gürigia tun Anne-Marie, to awinwanduboun Senegáli. Abahüdagua tumuti ka lan íderagubarun arufuda gudemehabu: “Dan le narihinbalin lanarime hasufurirun gürigia hagía, aba nasaminarun luagun ida luba lan hamuga nasandiragun nungua lun hamuga nuguya lan hagía. Ábati nagumeserun íchiga fe ua lan súdinitima nan hawéi ani madügüngidina lan ni kata le adügüti lun buídutima nan hawéi”. Ligíati, anhein gunfuranda wamá haturóbulin gürigia, gunfuranda wabaña giñe ani mayanuhanbadiwa wuriba hawagu.

Houcha humá harihini katei burí le ídanbei genegegua humá hama gürigia ha mínsiñebaña hun lubaragiñe hetenirun lúnrügü le ídanbei amu hamá huéi. Samina humá ida liña lan hasandiragun gürigia hagía houngua lidan sügǘ líbeina le:

• Dan le heigin úara hama haduheñu.

• Dan le hagumuchuni wadagimanu le lunbei hadügüni lidan weyu.

• Dan le hásügürün dan hama hamadagu.

• Dan le haganbahani uremu le hínsiñebei houn.

Guentó, áfaagua humá lun híchaagun hungua lidoun halugaarun. Álügüdagua humá hungua:

• Kaba hamuga nadüga anhein adüga somu gürigia lun nasandiragun nungua kamá mebegitina ni kata?

• Ida luba hamuga nasandiragun nungua ánhaña asaminara amu wuriba nuagun ibidiñega nuguya houn?

• Lun hamuga hádangiñe nan gürigia hagía, ida luba hamuga nabusenrun lun nouserúniwa?